Umayakon, Oymyakon! Noji Bajet

APAMAN a simmangpet ni Nuyda iti balay, agtintinnag ti niebe a manggabgabur iti aglawlaw. Mariknana ti dagsen, uray gapu laeng iti yelo a kimpet iti abaga ti naingpis a diaketna a kakaisuna a nagatangna iti ruar ti Yakutsk Airport.

Tinaliawna dagiti tugot ti boots-na. Nalagipna ti napalabas a tawen, daydi panangipatulodna kadagiti naipatarus a libro ni Chekhov tapno adda pagliwliwaan ti agkaskasera ditoy nga agkalikagum iti yuumayna.

Nagtoktok iti ridaw, a dagus met a linukatan ti maysa a lakay. Nagkurno. Nagtung-ed ti lakay ket tinuladna sakbay a nagalamanoda. Ammonan nga isu daytoy ti kinasarsaritana iti telepono.

Pinagpag ti mangsangaili ti abaga ni Nuyda ket naregreg ti nagbalay a yelo, sa intudona ti agdan.

Idi makauneg ni Nuyda iti kuarto, minatmatanna dagiti gamigam nga agkaiwara. Daytoy ti kuarto ti laglag? Nabayag a nagtatakder, napalalo ti rurodna. Iti suli, inukradna dagiti nakasagana a sako ken karkarton.

Immuna a sinangona ti pagturogan. Insakona dagiti ikamen, pungan, ules, ken moskitero. Innalana dagiti kawes iti ngato ti double deck. Inakasna dagiti nakasalapay nga uniporme a polo ken pantalon a maong sa inangotna. Nalabaan.

Insarunona ti estante. Sapsapatos a goma, botas, tsinelas. Indalimanekna dagiti bangbanglo, pomada, sagaysay, relo a Mickey Mouse, panio, sinturon, lotion, deodorant. Kasla agim-imbentario. Kasla iti trabahona, kinunana, iti tiendaan.

Itay laeng, itay simrek ti luganda iti Oymyakon, nalabsanda ti tiendaan a mangsangsango iti maysa a batonlagip ti maysa a mannurat a Ruso a nabasa kanon dagiti katrabahuan ti agyan iti daytoy a kuarto dagiti gapuananna. Kayat kano met daytoy basaen dagiti libro daytoy a Ruso. ‘Imbag la ketdi ta adda gayyemna a padana a propesor iti University of Hawaii a nangted kadagiti libro. Dagitoy ti naudi nga inseksekna iti karton.

Iti baba ti double deck, nagidda ni Nuyda a makadungdungsan. Minulenglenganna dagiti libro iti rabaw ti karton— nabasanan dagitoy sakbay nga impatulodna idi.

Nangala iti maysa sa inarakupna. Agtintinnag latta ti niebe iti ruar. Nanindi ni Nuyda iti kandela, insarangna dagiti dakulapna iti agkurkuridemdem a gil-ayab, sa pinagkinniskisna dagitoy, sa sinangawanna. Nagkidem ket sinallukoban ti sipnget, kas iti sipnget ti maysa a parbangon.

NAALIBTAK ti drayber, pati ti lakay, a nangtulong ken ni Nuyda a nangilugan kadagiti gamigam. Agkurno koma manen ni Nuyda ngem nagtung-ed ti lakay. Nagalamanoda. Miningminganna dagiti piligis iti rupa ti lakay ket naamirisna a dumtengto met ti tiempo nga agmaymaysa iti rabaw ti daga, iti rabaw ti niebe iti Russia, nupay mabalinna met ti agsubli iti kadaratan ti Ilokos, ti Hawaii.

Iti uneg ti lugan, sinimpana ti lima a bado a pinagsusukotna— akinrabaw ti uniporme a polo. Sumursurot ti lamiis. Nalabsan manen ti lugan ti batonlagip ngem dina tinaliaw ti batogna a tiendaan. Mamilpilit ni Chekhov iti panunotna: Agbiagka!

Wen, adingko, ipapasmo iti agbiag!

Manen, nagkurno ni Nuyda. Adda kimpet a bassit a yelo iti barukongna, ngem narunaw a kasla nasinit iti dina naigawid a lua, sakbay a nakadanonda iti puneraria.—O