Manila Bulletin

Dagiti Sugat ti Daga (35)

Joel B. Manuel

Ti Napalabas: Pinaserraan ti presidente ti Ylocos Minerals a mangbibiag iti Razon-Colorado Investment Group a pagpapaayan ni Bileg Aurelio a kas CEO. Gapu iti daytoy, inkeddengda a pasanguan ni Carlos Rasos, a presidente, iti masungad nga eleksion. Nagpatulong ni BA iti Amerika ket impatulodanda iti kuarta babaen ken ni Sadiri Melchor a manongna, babaen met ken ni Ashley Mary. Sinurat ni Sadiri Melchor ti panangbaybay-a ni Rasos iti kabsatda a naputotanna. Nakaunget ni Rasos ket impangtana a patayenna ni Saniata Marionne. Iti sabali a bangir, impadeportar da BA ni Ashley Mary. Nagparikut ni Sadiri Melchor ta paisubsubli ti balasang ti kuartana. Kinasarita ni BA ni Mayor Moreno a patarayenda a presidente. Immannugot ti mayor basta ti Partido Paisanos ni Daw-asen ti mangbayabay kenkuana. Impamuspusan ni BA dayta ket ni Jopet de Leon a gayyemna ti agtaray a bise-presidente. Naammuanen dagiti agngayangay a presidente ket nagplano a dagus ni BA. Nangpatakder ni Go Tan Tiong iti Park n’ Charge ket iti pannakalukatna, nagsarita ni Mayor Moreno. Bayat ti panagsaritana, nabuak dagiti tao ti ranipak ti paltog. (Maika-35 a Paset)

NAILANSA lattan da Bileg Aurelio ken Thor iti nagtugawanda ngem saanda a nagtaray. Nakitada ti pannakadata ni Mayor Rafael Moreno. Idi kuan, nagtaray ni Thor a nangbatak iti mayor a mangtengtengngel iti barukongna. Inkagumaanan ti mayor ti bimmangon.

“’Nana, naimbag la ket ta adda Kevlar dataon,” insennaayna idinto a winagwagna dagiti takiagna. “Ngem nabudo met a nasaniit… baka simmalput?” kinunana ken ni Thor. Isu met a nagaaribungbong dagiti aide-na.

Iti pantar a yan dagiti Smarflower, agtartaray ti dua a lalaki a pakpakamatan a paltopaltogan dagiti polis ti Calaoagan. Mismo a ni Mayor Jerico Farinas ti mangbilbilin kadagiti polis. Ngem nakataray dagiti gunmen a nagkamang iti asideg a kakaykaywan iti laksid ti pantar.

Pinatakder da Thor ni Mayor Moreno sa imbabada iti plataporma. Impatugawda iti sirok ti maysa kadagiti solar canopy ti charging area.

“Lumib-at a kumagat ti takrot a banias,” imbanang

es ti mayor. Inuksob dagiti aide-na ti barongna ket naitangkarang ti bulletproof vest-na. Kinudkod ti mayor ti limmabanag a batog ti pusona. “Kayatda a siguraduen a maimassayagak,” inngirsina ken medio impigsana ti timekna tapno mangngeg dagiti tattao.

“Dakkel la ketdi ti imbayadda,” nakuna met ni Jopet De Leon a kabangbangonna met iti panagkul-obna.

Agwingwingiwing ni Bileg Aurelio a mangbuybuya ken ni Mayor Rafael Moreno. Kunam met no serioso ni Atty. Jerson Fabre a mangpaypaypay iti mayor. Nakasublin ti mayor ti Calaoagan idinto a kimmamat dagiti polis ti siudad.

Uhum, awan la ti di maar-aramid, naisip ni

Bileg Aurelio idinto a nakitana ni Go Tan Tiong a mangpaypayapay kadagiti tattao. Idi nakapagtulagdan ken Mayor Rafael Moreno para iti daytoy nga eksena, nakaam-ammon da Thor ken Atty. Jerson a nangplantsa.

Simmangpet ti ambulansia ti Calaoagan General Hospital ket nailugan ni Mayor Rafael Moreno tapno mapanda met laeng amirisen iti ospital. Simmurot dagiti aide-na ken dagiti reporter ti radio, telebision ken pagiwarnak. Ket ita, nakiburen ti pasken. Maasian ni Bileg Aurelio a makakitkita ken ni Go Tan Tiong a mangay-ayab kadagiti tattao, idinto nga adda payen dagiti nangpasut kadagiti charging cable dagiti EV car-da sa limmuganda ket nagpataraydan a pimmanaw.

“Palpak tlabaho,” kinuna ni Go Tan Tiong nga immasideg.

Sinallabay ni Bileg Aurelio ti gayyemna. “Ala, uray no kasta, gayyem, addan publicity-tayo a di naigagara.” Kinagat ni Bileg Aurelio dagiti bibigna. Saanna nga ammo ti resulta daytoy a pasamak iti Poro Ylocos Stocks Exchange, no maapektaran ti stocks ti kabbaro a kompaniada.

Maysa pay a pampanunoten ni Bileg Aurelio, no ania ti epekto ti “pannakalib-at” ni Mayor Moreno iti rating daytoy. Ket ita ta nalpasen, naamirisna a no saan nga epektibo daytoy, maapektaran ti kandidatura ti mayor.

Naituloy met laeng ti programa idi ipalagip ni Go Tan Tiong nga adda paripa ket tallo a Nissan Leaf ti premio. Inwaragawag pay ni Go Tan Tiong a lifetime charging ken service iti EVehicle Pitstop a kadarapat dagiti charging shed.

“Panagkunak, manong, saputen la ketdi ti Evehicle Pitstop,” inkissiim ni Thor ken ni Bileg Aurelio. “Agtartaray latta dagiti EV ta dida met ag-change oil, awanan ‘ti radiador, awanan ‘ti adu nga awan… bassit ti piesana.”

Nagtungtung-ed ni Bileg Aurelio. “Panagkunam, ‘ton ano ngarud ti grant ti ‘loan’ ni Samuel Daw-asen a paggatangna iti E-bus?”

“Mabalin latta kadagitoy, manong,” kinuna ni Thor. “Tangay loan met ti agparparang.”

“Gayyem, parugiamon kadagiti kontraktor dagiti charging station iti Cordillera Central,” inkissiimna iti Intsik.

“Oke, oke,” kinuna ti Intsik. “Ipuonakon ta singilekto lattan ni Daw-asen?”

Pinikpik ni Bileg Aurelio ti abaga ti gayyemna. “Yapuram tapno makita ni Daw-asen a seriosotayo a mangtungpal iti kari kenkuana.”

ITAY pay laeng parbangon ti kaadda dagiti kameng ti media iti paraangan ti Commission on Elections and Plebiscites. Ita nga aldaw ti maudi nga aldaw ti panagipila iti kandidatura iti nasional nga agpang. Kas gangangay, agsisinniim dagiti kakandidato. Ken no dumatagda iti Komision, nakaad-adu pay dagiti supporter-da.

Immunan a dimmatag ni Panglaki Zulfikar Wandag ti Sentinela Island. Kas gagangay, agipila manen daytoy a kas aramidna iti no manon nga eleksion a naglabas iti biagna. Panguluen dagiti Ypulo ni Laki Zulfi. Kaduana ita ti sanga-platoon a badigardna ken ti abogadona. Napadasanna met ti nagbalin a mayor iti maysa nga ili iti Sentinel Island Province. Adda bukodna a pagtaktakderan a maisupadi iti Sentinela Culture Army ken ti Sentinela National Liberation Army.

Wandag Group ti awagda iti grupona. Ita, para bisepresidentena ti maysa a retirado a propesora, ni Prof. Kareena Pindangan a maysa a peace worker. Isu nga addada ita nga agsikawsikaw iti paraangan ti Komision ket apaman a naglukat, simrekdan a napan nagipila iti kandidaturada.

PIRPIRMAAN ni Bileg Aurelio dagiti papeles iti lamisaanna idi sumrek ni Keith. Immisem daytoy ken pinallilitanna ni Bileg Aurelio. Ammo lattan ti CEO no kasta ni Keith, mailiw la ketdi ti balasang ken amangan no adda manen kiddawenna. Baka awan manen nagyan ti ATM-na. No dadduma, madlawna a gumasgastadora ni Keith. Umad-adu dagiti kayatna a bakiren.

“Komusta ti farm ni father?” dinamag ni Bileg Aurelio. “Okey metten ngem masapulna ti full irrigation,” kinuna ti balasang.

Immisem ni Bileg Aurelio. “Mano ngarud?”

“Baka two million amin,” kinuna ti balasang. Adda ngamin puttotenna a waig.”

Nagmulengleng ni Bileg Aurelio. Sabagay, nasken met ngarud a makatulong ti tatang ni Keith uray kaskasano. “Umayakto idiay yanyo, one of these days,” inyisemna. “Okey, yiskediulto ngarud,” inyisem ti balasang. Tinaldiapanna ti executive bedroom sa rimmuar.

“Ton bigat, okey?” kinuna ni Bileg Aurelio ta Biernes iti kabigatanna. Uray isuna, maliwayanna pay ketdin dayta iti panagsasamusam dagiti parikutna a mangiplastar iti kandidatona.

Iti malem, addan damag a naipilan da Shalani Zaldivar ken Carlos Rasos ti kandidaturada. Adda metten da Juanito Parayno ken ni Ka Domigo Montemayor. Ken nasurok kano pay a duapulo a pakairamanan ni Zulfikar Wandag.

Agingga laengen iti alas dose ti rabii ti panagipila. Ngem kas nagtutulagan da Bileg Aurelio, Senador Renile, Samuel Daw-asen ken Mayor Moreno, saan pay a nagipila ti mayor. Nadanonan ti alas dose ngem saan a nagparang

Pampanunoten ni Bileg Aurelio a no saan nga epektibo ti ‘pannakalib-at’ ni Mayor Moreno, maapektaran ti kandidatura daytoy.

ni Mayor Rafael Moreno nupay kimmamakam iti alas dies ni Direk Jopet de Leon. Singasing ni Bileg Aurelio daytoy a saan a panagipila pay laeng ti kandidatoda.

“Asino dagiti nagipila a mabalin a nuisance?” kinuna ni Bileg Aurelio iti kabigatanna.

Immurianda dagiti adda iti listaan. Adda dua a tagaCabigaan. Pinattapatta ni Bileg Aurelio nga inusar ni Mayor Rafael Moreno ti substitution. Kinuna ngamin ti mayor a saanto laeng a maysa ti baonenna nga agipila no di pay ket dua wenno tallo pay.

Inawagan ni Bileg Aurelio ni Mayor Rafael Moreno. “Mayatak iti insingasingmo, Apo CEO. Agdidinnupir dagiti baka no agaabayda a tumaray,” kinuna ni Mayor Rafael Moreno. “Amangan no agsisinnippadongda pay!” “Kaanonto ngata ti panagipilam ngarud?”

“Ti mangsaruno iti padumna ken ti mangipus iti witiwit, isu ti patien ti nuang,” kinuna ti mayor. “Dika madanagan, Apo CEO, we have all the time. Ti masirib a tumapog, urayenna a nakatapogen amin a kakaduana tapno ammona ti kaababawan a pagnaanna.”

Nagdusngi ni Bileg Aurelio. “Ngem no ngarud agdinakkelton ti karayan no tumapog?”

“Ti agdinakkel a karayan agyanud iti pungdol a mabalin a pagpatawan,” insungbat ti mayor.

Napanunot ni Bileg Aurelio nga awan latta ti pangisuruanna iti daytoy a mayor. Ngem, ala, isu ngarud a kunada nga unconventional daytoy a politiko.

Ken ti plinano daytoy a pannakapaltogna, awan ti kasano nge epekto daytoy iti survey. Adda dagiti saludsod a narigat a masungbatan no apay nga iti pay laeng bagi amin ti nagtiruan ti saan a natiliw a gunman, nga awan kano laengen ti naipunta iti ulo ti mayor. Adda dagiti mangibagbaga a publicity stunt ti mayor daytoy. Ket nakalasat agsipud ta nakasuot iti bulletproof vest.

“Kaanonto ngarud nga ag-substitute-ka?” dinamag latta ni Bileg Aurelio. “Madanaganak met laeng man no kuna ketdi dagiti tattao a saanka a serioso ket bumaba ti rating-mo, Apo Mayor.”

“Kinapudnona, inton mangrugin ti kampania,” kinuna ti mayor.

Iti dayta a bigat, nagbalin a sentro ti diskusion dagiti pagiwarnak ti saan a panagipila ti kandidato ti Partido Paisanos iti kandidatuana. Addan dagiti komentarista a mangibagbaga a maysa laeng a pakpakarit ni Mayor Moreno. A saan a serioso a kandidato.

Ngem ti kolumn ni Sadiri Melchor Ramones ti kasimgatan kadagiti analysis. Kinunana a saan a nagipila ti mayor tapno awaganto dagiti tattao. Kinuna ti dekano a saan pay a panawen ti itatapog ni Mayor Moreno tapno saan pay a maukag dagiti napalabasna. Tapno iti unos ti sumagmamano pay a bulan, mailisi iti intriga tangay saan met a kandidato. Ngarud, bentahe para kenkuana ti naladaw a panangukag dagiti interesado iti rekordna idinto nga agdidinnudogton dagiti ammon a kakandidato.

Immawag met ni Senador Renile ken ni Bileg Aurelio iti panagmemerienda. Dinayaw ti pasado a senador ti estratehia ni Bileg Aurelio. Kinunana nga agsipud iti saan a panagipila ti mayor, makasaganada a nalaing iti headquarters-da, nga awan pay laeng ti adu a pannakibiang ti mayor.

“He will not spoil our preparations,” kinuna ni Senador Renile. “Husto ti analysis ni Dean Ramones. Gapu ta saan met pay a kandidato, awan ti mangpiltak kenkuana.”

Nalimed nga immisem ni Bileg Aurelio. Nabayagen ti probision iti Election Code a substitution ngem awan pay politiko a nangpadas iti daytoy, aglalo kadagiti dadakkel a partido. Ta no napilin dagiti kandidato iti kombension nasional, makunan a kandidato dagitoy ket manamnama nga agipilada a dagus iti kandidaturada.

Ngem ania ita daytoy nga estratehia ni Bileg Aurelio? Napilin a kandidato ni Rafael Moreno ngem saan met a nagipila iti kandidaturana?

“We are threading an unknown ground, however, barok,” nagraed ni Senador Renile. “I fear the worst could be the doubt of people as to the sincerity of Moreno. Ngem there is always a first, so, I hope this first would benefit us.”

Inatakar nga agpayso ni Shalani Zaldivar ni Mayor Rafael Moreno. “A coward hides behind the South Cordillera Central!” imbangawngaw ti senadora. “Do not fool the people by saying you stand, but instead you run? Who are you, a bayagless imbecile? Your word should be your contract! But you are literally running away!” Sa inggarakgakna: “Well then, may he rest in peace!”

Naggagarakgak dagiti mangin-interbiu iti senadora idinto a kinemkem daytoy ti suli ti medio suab a bibigna.

Ininterbiu met dagiti kameng ti media ni Ka Domingo Montemayor. Pinarubroban met ti dadauluen dagiti mangmangged ti kantiaw ken ni Mayor Rafael Moreno. “Dayta ti kunkunakon ket! No agkandidatoka, takderam. Apay imbaagna ti ipusna?” imbabalawna.

“Fine for us, one man down without even standing up,” inkatawa met ni Carlos Rasos.

Sinublat met nga ininterbiu dagiti kameng ti media ni Rafael Moreno. Ngem kinuna ti mayor: “No simemelmel ti mangmangan, saannaka a masungbatan!” Isu a kasta unay manen a kantiaw dagiti periodista iti mayor.

NGEM iti StarLife Financial, kasta unay nga apura dagiti volunteer ken dagiti inukkon ni Bileg Aurelio a tattao a mangisagsagana kadagiti pagkampania

da Mayor Rafael Moreno ken Direk Jopet De Leon. Agmalmalem ti panagandar dagiti tarpaulin printer, dagiti sublimation printer, decal printer, mug printer ken aminen a ramitda a para kadagiti maiprinta a bambanag.

Immay metten nagopisina ti sumagmamano a volunteer manipud iti Partido Paisanos ken segseggaandan no asino ti mangipangulo iti campaign headquarters. Nayinstolar metten dagiti camouflage system ken jammer babaen ti panangipangulo ni Thor. Iti video production department, makumikomda nga agisagana kadagiti mausar a video.

Ta kadagiti away ken adayo a disso iti Poro Ylocos, naggunayen ti makinaria dagiti partido. Sumanursoren dagiti kandidato ken adun dagiti tarpaulin a naibaskag kadagiti kalsada. Aglalo ni Carlos Rasos a kaduana ni Presidente PRoy a kunam no isuda a dua ti makaigapu kadagiti maar-aramid a kalsada, rangtay ken dadduma pay a paginamayan dagiti umili.

Sabali met ti estratehia ni Shalani Zaldivar. Kanigid-kanawan ti panagpasiarna a panaggetteng kadagiti ribbon dagiti eskuela a pinatakder ti estasion ti telebision a pagpapaayanna.

Ni Ka Domingo Montemayor, kanayon met ti panangmitingna kadagiti empleado dagiti dadakkel a kompania iti Sabado ken Domingo. Ket no iti kalawasanna, mapan agmiting kadagiti probinsia.

Sabali met ti ipalpalapayag ni Sek. Juanito Parayno. Ibagbagana a rinugian kanon dagiti Intsik ti nagiserrek iti kuarta iti pagilian a pagkampania ni Carlos Rasos. Dayta kano ti impakaammo ti intelligence manipud iti European Union.

“Masapul a maimbestigar dayta. Naiget ti pannakaipawil ti kaadda ti kuarta a sumrek tapno pagkampania dagiti Poro Ylokano,” kinuna ti sekretario. “No mapaneknekan dayta, madiskualipikar ni Carlos Rasos.”

Bimmales met ti senador. Imbangawngawna nga idi nagserbi iti Foreign Service ni Parayno, naggatang kano iti properties sadiay Espania. Agpapan ita, saanna pay nga inibbatan dagita a properties. Ken naikkan iti discount manipud iti nangalaanna a padana a diplomat, kas kasukat ti sensitibo nga impormasion para kadagiti sasaaden dagiti Espaniol a pamilia iti Poro Ylocos.

Umis-isem ni Bileg Aurelio a mangnannanam kadagitoy a damag. Adayo ni Mayor Rafael Moreno kadagitoy a pinniltak.

Ngem iti dandanin panagaawidan iti dayta nga aldaw, nakaawat iti satellite phone signal manipud iti Buraan Island.

Sumagmamano a transport helicopter dagiti Poro Ylocos Marines ti nagdisso iti minesite sadiay Buraan Island. Kaduada a dimsaag ti sumagmamano nga opisial ti Bureau of Mines and Oils.

Siuulimek ni Bileg Aurelio a nangsagrap iti damag. Pinaserraan ni Usec. Warlita Naval ti pagminasan ken naarestar amin dagiti minesite personnel. Adda pay natiliw a maysa a bargo ti kompania. Ti nasakit, kasla occupation army iti pribado nga isla dagiti Razon ti inaramid dagiti Marines ta nagkampo dagitoy iti minesite ken iti mismo nga ansad a sagpat ti lagoon a pagsangladan dagiti barge ken yate!

(Maituloyto)

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/281556590036913

Manila Bulletin Publishing Corp