Sarita a Para Ubbing

“APO, kaasiannak. Dandanin maatianan ni Karayan. Pagtuduem koma iti napigsa,” inkararag ni Bukasit bayat ti panagkarayamna a rimmuar iti balayna. Makainum ken makadigdigosen ngaminen.

“Sapay koma, Bukasit! Kah-kah-kah!” inyanangsab met ni Karayan. “No mabalin, diak kayat ti maawagan iti Natay a Karayan.”

Gapu met iti kinaababawen ni Karayan, adun dagiti nagkali iti bubon iti igidna. Nalinongan dagitoy iti palapala. Dagitoy ti pagsakduan dagiti babbaket iti inumenda no umayda aglaba.

Nagkarayam manen ni Bukasit. Ngem marigatan nga agkarayam ta adda dagiti nakabalemben iti pagnaanna a supot ti tsitsiria, supot ti sabon a paglaba, ken dadduma pay a basura.

“Tsk, tsk, tsk!” insakuntip ni Bukasit idinto nga iwalwalin ti sungona ti nalabaga a supot ti tsitsiria. “Di pay ammo dagiti tattao ti agyawid kadagiti basurada.”

Idi yangadna ti ulona, nagsidduker ta adda nangngegna a napigsa a paddak. Paddak ni Baket Unnang! Malasinna ti naunget a nalukmeg a baket nga inaldaw nga umay aglaba sipud pay dimteng ti kalgaw.

Addan nga agpayso ni Baket Unnang. Nagsusuon kadagiti malabaan ken adda pay iggemna a planggana.

Intupak ni Baket Unnang ti planggana idi makadanon iti nakuroban a paset ti karayan ket uray la a timmal-o dagiti lalaem ni Bukasit iti kigtotna.

Di pay napagtalna ni Bukasit ti riknana idi intapliaken ni Baket Unnang ti naggelgelanna nga addaan sabon. Daras a nagwaras ti aglablabutab a danum.

“Agibellengda la ngaruden iti rugitda, ti pay la pagitaptapliakanda iti adda sabonna! Kasano nga inumek dayta? Matayak la ketdi!” kinuna ni Bukasit.

Nagtaltalangkiaw ni Bukasit. Bugbugsawanen ni Baket Unnang dagiti linabaanna.

“Ay, adda gayam bassit a bubon iti asidegko!” nakuna ni Bukasit a kasla naungaran pay.

Nagkarayam iti sangadangan. Anian a gin-awana idi makatapog iti nalit-aw a danum. Dagus nga imminum.

“Nakakitaak met laengen iti napimpintas a balayko,” kinunana idi makitana a nasayaat ti aglawlawna. Napalawlawan ti bubon iti dadakkel a bato. Mabalinna ti sumelsel dita no bilang adda mapan tumako iti inumenna.

Wsssk! Wssk! Nakangngeg iti napipigsa a wagsak. Ammona, ibilbilagen ni Baket Unnang dagiti linabaanna.

Ipidua koma ni Bukasit ti uminum idi kasla nagginggined iti yanna.

“Dagiti awanan bain, linuglogda metten ti pagsaksakduak iti inumek!” Adda gayamen ni Baket Unnang. Ket nagtabbuga pay iti pungtotna. “Makitak la dagita nanglibeg iti bubonko, taltalek iti napino sa ipakanko kadagiti patok!”

Uray la a nagkiet ni Bukasit iti nangngegna. Immangad. Nagsabat dagiti matada ken Baket Unnang.

“Sika gayam a Bukasit ti nangkibur iti danum, a!” kinunana ket immasideg.

Awanen ti paglisian ni Bukasit. Addaytan ti nalukmeg a baket a mangpidut kenkuana.

Ngem iti yaasideg daytoy, narugnay ti darat ken dagiti bato. Ad-addan a limmibeg ti danum. Kagiddan daytoy ti pananglangeb ti aglawlaw.

Nadlaw ni Bukasit ti kasla nagadu nga agtupak a danum iti yanna. Umad-adalem ti bubon.

“Naisalakanakon, Bukasit!” inggarakgak ni Karayan.

Pudno. Anian a nagpardas ti idadakkel ti danum ti karayan!

Idi laeng a malagip ni Bukasit ni Baket Unnang. Ngem awanen ti baket. Nagpukawen a kasla labutab ti naingel a sabon.—O