Saludsodem ken ni Apo Hues

SALUDSOD:

Saan a palimed iti kaaduan ti maysa a tao a napabasol a naglabsing iti linteg. Daytoy a tao, anak ti maysa a nangato nga opisial ti pagilian. Naidarum daytoy, Apo Hues, ket nagbiit a nairingpas ti kasona. Napaneknekan a saan a nagbasol isu a dagus met a naparuar iti pannakaipupokna.

Ita, Apo Hues, adda met dagiti am-ammotayo a tattao a napabasol a naglabsing iti linteg. Ordinario a tattao dagitoy. Adda 5, 10, 15 a tawen sa maiwakas ti kasoda. Anian a nagbuntog ti panagtulid ti hustisia para kadakuada. Kasla panagkarayam ti lakay a pag-ong. Aglalo la ngaruden no kaso sibil. No diak mariro, nasayaaten no tunggal dua a bulan nga agbistada. Uray kano ta saan a kas kadagiti kaso kriminal a nakadetiner ti akusado.

Apay a kastoy ti hustisia ditoy pagiliantayo, Apo Hues? Nalawag a sabali ti hustisia para kadagiti napanglaw, sabali ti para kadagiti babaknang.—Kabsat ti Maysa a Napanglaw nga Akusado

SUNGBAT:

Adda linteg a mangpapardas iti pannakaileppas ti kaso—‘tay Speedy Trial Act. Ditoy, nailanad no mano a bulan a leppasen ti maysa korte wenno pangukoman ti maysa a kaso. No Municipal Court ti pakaidatagan ti kaso, rumbeng a madesisionan iti uneg ti dua a bulan. Iti Regional Trial Court, 6 a bulan; iti Court of Appeals, maysa a tawen; iti Korte Suprema, dua a tawen. Ngem dakkel a NGEM a saan met a masursurot daytoy.

Ngamin, iti agdama, ken uray idi agpapaayak pay a hues, ti bilang dagiti kaso a bistaen ti MTC, mapan a 500 agingga iti 1,000 a kaso; ti RTC, 300 agingga iti 700 a kaso; ti Court of Appeals, ti tunggal dibision, 1,000 a kaso; ti Korte Suprema, 2,000 agingga iti 5,000 ti asikasuen ti tunggal dibision.

Ket agkurang met ti bilang dagiti hues ti MTC ken RTC ken uray dagiti piskal a mangasikaso kadagitoy a kaso.

Ti pagdaksanna pay, adda met sadsadut dagiti dadduma a hues, piskal, wenno abogado a di mauma a mangpapai-postpone iti bista ket mayat met ti piskal a maibayag ti kaso.

Ti remediona, masapul koma a madutokan dagiti hues kadagiti nagadu a bakante a puesto iti MTC ken RTC ken uray pay iti puesto dagiti apo a piskal—ta no awanda, kasano ngarud a magna dagiti kaso kriminal?

Ngem ketdi, nupay kasta ti agdadata a kinapudno no ti maysa a hues, aglalo iti RTC, no nagaget ken napudno iti trabahona uray pay adu dagiti pagrebbenganna, adu ti mairingpasna. Saan met a panangbagkat iti bukod a bangko ngem idi agpapaayak pay a hues iti RTC, uray pay dagiti nadadagsen a kaso, desisionak iti dua bulan laeng idinto nga adda met dagiti hues nga agbayag kadakuada dagiti kakasta a kaso iti maysa agingga iti tallo a tawen.

Ala, aganustayo. Bareng madanontayto met laeng ti panawen a maileppas a dagus dagiti mayuli a darum. Ta kas itay kunadan, “Justice delayed is justice denied.”—O