Agkatawa ti Mayat

Nabigbig ti grupona. Nagangayannana, gapu iti panagkankanta ti bunggoyna kadagiti espiritual a samiweng, nabukel ti Lady of Manaoag Choir idiay Wahiawa idi 2011. Ni Father Gregorio Brillantes ti nagpaay a kas Spritual Director. Nupay kasta, nayakar iti St Joseph Catholic Church (Waipahu) agsipud ta idiay ti balay ni Santa Maria.

Manipud idin, idiayen ti pagkankantaan ti grupo.

Ti Lady of Manaoag Choir ti pinili ni Bishop Lawrence “Larry” Silva nga agkanta idi narambakan ti maika-500 a tawen ti pannakaipasdek ti Kristianismo iti Filipinas. Idiay St. Theresa Co-Cathedral ti nakaannongan ti dakkel a parambak a tinabunuan dagiti Katoliko a Filipino iti entero a Hawaii.

“No addanto pay maaramid a kastoy a parambak, kayatko a dakayonto manen ti agkanta, inyangaw ti Obispo a nayon ti panangdayawna kadagiti timek a “naggapu iti langit.”

Kas Kadagiti Maori

Ngem adda di malipatan ni Josie a kayatna a gun-oden ti pannakakanta dagiti nagkakauna a kansion manipud iti Kailokuan. Kayat ni Josie a palasbangen dagiti kanta a nakaigalutan ti kultura iti benneg ti musika.

“Kas kadagiti Maori, inrupirda ti pannakabigbig ti nakayanakanda nga ugali ken kinatao. Iti laksid ti kinabassit ti bilangda, nagballigida a nangpasantak ken nangpalasbang iti kulturada. Daytoy ti kayatko a gun-odentayo a Filipino ditoy Hawaii,” kinunana.

Innayonna: “Nalaingtayo nga agkanta. Ngem kayatko a saan a basta kanta. Kayatko dagiti kansion nga adda pannakainaigna iti napalabas ken iti pulitayo.”

Itay nabiit, binuangayna ti Sinta Group. Daytoy a bunggoy ti aramatenna a mamaglatak kadagiti nagkakauna a kansion.

“Daytoy Sinta ti kayatko a mangibayog iti kina-Filipinotayo, iti kina-Ilokanotayo,” kinunana iti napinget a timek.—O