Manila Bulletin

Edukasion: Arte iti Kindergarten

Aileen R. Rambaud

ARTE wenno ‘arts’ iti Kindergarten. Paggugusto dagiti ubbing daytoy. Isu ti serbi dagitay bond paper. Kartib. Pigket. Krayola. Panagdrowing kadi laeng ti obraenda iti arte? Saan, manang. Adda pay sabsabali a paaramid ni titser. Kas pagarigan, kunana:

“Mangitugotkayo iti nagukisan iti itlog.” Babaen ti ukis ti itlog, agaramid dagiti ubbing iti mosaic.

Umuna, mangidrowingda iti paggugustoda a sukog iti bond paper. Ikkanda iti pigket ti uneg ti sukog. Ipapisipisi ni titser ti ukis ti itlog. Mabalin pay a derderenda. Iwarisda dagiti babassit a pisi wenno dagiti naderder nga ukis iti inaramidda a sukog nga adda pigketna.

Mabalinda pay ti agaramid iti disenio babaen ti ukis ti itlog. Mabalinda pay ti agusar iti bulbulong. Wenno nakartikartib a pappapel a saanen a mausar.

Ngarud, imbes nga ibellengda ti ukis ti itlog, wenno agbalin a basura dagiti pappapel, usarenda iti napintas a wagas.

Mabalin pay a kastoy ti kunaen ni titser: “Ubbing, agitugotkayton’ bigat iti nagawangan a botelia wenno garrapon ken dagitay nanganan iti biskuit.”

Kartikartibenda iti babassit dagiti nanganan iti biskuit. Ipisokda dagitoy iti botelia wenno garrapon. Napintas a para displey. Ken awan payen basura.

Mabalin pay a dagiti karkartibenda a nagawangan a supot dagiti makan, aramidenda a pungan wenno kas nalukneng a pagtutugawan.

Ngarud, manang, uray adda pay laeng dagiti annaktayo iti kindergarten, ammodan ti kastoy nga aktibidad. Arte wenno ‘arts’ kunatayo iti klase ngem nagdakkel ti maitulongna iti biag, komunidad, ken iti aglawlaw.—O

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/281711208859569

Manila Bulletin Publishing Corp