Taraken: Nabanglo Met La ti Asom?

NADUMADUMAN dagiti napadasak a tinartaraken nga aso. Adda aspin, toy dog, ken mixed breed. Agpapada latta ti panangtratok kadakuada. Ubbaek wenno arakupek latta ida aglalo no sumangpetak iti pagtrabahuak. Diak kadurmen ida ta nabangloda latta uray maminsan la nga agdigosda iti uneg ti makalawas.

Ngamin, saan met la a ti pannakapadigos ti aso ti gapuna tapno nabanglo latta daytoy. Adda dagitay aso nga uray mapnek iti digos, adda latta angotda gapu ta adda alerdyida.

Isu a kastoy ti ar-aramidek:

Umuna. Masapul nga ikarigatak a saan nga agalerdyi ti aso. Pinadasko idi a pinakan dagiti asok iti saglalaka a dog food ket idi kuan, kumanudkodda metten. Kayatna a sawen nga adda alerdyida. Kanudkod a kanudkod ti agalerdyi nga aso agingga a masugsugaten ti kudilna; di nagbayag, nalangsin ti angotna.

Agpayso a napateg ti panangpili iti ipakan iti aso tapno saan nga agalerdyi. Ti ar-aramidek kadagiti asok, pagsidaek ida kadagiti kaay-ayoda a sidaen. Kas koma iti karne ken nateng. Ngem saan a tunggal pannangan a kastoy ti ipasidak kadakuada. Iti bigat, pakanek ida iti dog food a magatang iti dog store. Ti lamb and rice ti kagustuan dagiti asok. Naynay a daytoy ti ipakpakanko a binigat.

Iti met aldaw ken rabii, pakanekon ida iti table food. No ania ti pangaldaw wenno pangrabiik, isu met ti itedko kadakuada. Ngem diak ida pagsidsidaen iti ikan wenno manok. Ngamin, kaaduan kadagiti aso ket agalerdyi no agsidada iti ikan wenno manok.

Ken, siempre, pasanguan ida iti nadalus a danum. Ken kasapulan a nadalus latta ti paginumanda.

Maikadua: Wen, padigosek ida. Tunggal Sabado a padigosek ida. Ikkak bassit iti baking soda ti danum a pagdigosda. Medio naanem-em a danum ti usarek tapno saanda nga agkutimermer iti lammin ken amangan no isu pay ti pakaalaanda iti panateng wenno uyek no nalamiis ti danum.

Ag-shampoo-da met. Ikkak bassit iti danum ti dog shampoo. Mamindua a ma-shampoo-da. Iti umuna a pannaka-shampoo-da, kuskosak ida. Adda naipasadia a pangkuskosko kadakuada a ginatangko iti dog store.

Iti kasta, maikkat ti kimkimpet a rugit iti kudil ken dutdotda. Bugguak ida. Kalpasanna, ag-shampooda manen. Ngem maikkandan iti conditioner tapno agtalinaed a nasileng ken nalamuyot ti dutdotda.

Bayat ti panangdigos ken panang-shampoo kadagiti aso, liklikan a matubongan dagiti lapayagda. Daytoy ngamin ti maysa a rason a nalangsi ti angot ti aso no matubongan ti lapayag daytoy.

Kalpasan a madigosko ida, dalusak ti lapayagda. Kurikorak ida babaen iti tissue a medio nabasa. Kartibek met ti dutdot nga adda iti uneg ti lapayagda.

Maikatlo. Addaan dagiti asok iti bukodda a tualia. Lima dagiti asok, saggaysada met iti tualia. Adu ti magatang a tualia ti aso iti dog store. Inton madigosko ida, ilamawko ti tualiada iti agburburek a danum, sa ibilag wenno ipainitko.

Maikapat. Sepilioak ida. Maminlima a sepilioak ida iti uneg ti makalawas. Adda naipasadia a sepilio ken toothpaste ti aso. Saan a rumbeng nga agusar iti toothpaste ti tao ta gagangay nga adda laok daytoy a xylitol ken artipisial a pagpasam-it a mabalin a makadangran iti salun-at ti aso. Nasaysayaat a saggaysada iti sepilio tapno maliklikan ti pannakayakar ti impeksion, no adda man.—O

(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)