Manila Bulletin

Kompleto a Pagannurotan ti Pasalip ti ALVIYA iti Sarita 2023

Kalpasan ti pannakailibro dagiti sarita a nangabak iti napalabas a 10 a tawen a panagpasalip ti ALVIYA Literary Foundation iti panagsurat iti sarita, ipakaammo ti Secretariat ti ALVIYA Literary Foundation ti pannakalukaten ti maikadua a bansada (2023-2032) ti pasalip. Marugian daytoy babaen ti Maika-11 a Pasalip ALVIYA iti Sarita (Tawen 2023).

Is-isponsoran ni Alex V. Yadao ti nasao a salip babaen ti panangtarawidwid ni Dr. Freddie Pa. Masuli. Tubo ti Libertad, Abulug, Cagayan ni A.V. Yadao ngem agnaeden iti Siudad ti New York iti Estados Unidos. Kalugaranna met laeng ni F.P. Masuli, agdama a mannursuro iti Cagayan State University, Sanchez Mira, Cagayan.

Dagiti pagalagadan:

1. Silulukat ti salip kadagiti amin a mannurat nga Ilokano ken uray pay kadagiti saan nga Ilokano ngem makasurat iti pagsasao nga Ilokano.

2. Nawaya ti makisalip a mangpili iti ania man a tema a kayatna a suraten.

3. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bond paper.

4. Maysa laeng a sarita ti maipalubos nga isalip ti kada mannurat a makisalip.

5. Nasken a bukod a putar ti autor ti maisalip, di pay naipablaak iti ania man a magasin wenno iti ania man a pablaakan a pakairamanan ti social media, ken saan a naipatarus manipud iti ania man a lengguahe.

6. Ti laeng parbo a nagan ti autor ti agparang iti manuskrito a maisalip. Mapakuyogan ketdi ti opisial nga entry iti maysa pay a dokumento a nakailanadan dagitoy: Paulo ti sarita, parbo ken pudno a nagan ken kabibiag ti autor agraman numero ti telepono a pakakontakan kenkuana.

7. Ipatulod dagiti dua a dokumento (sarita ken ti impormasion maipanggep iti autor) babaen ti elektroniko a wagas (email) iti daytoy nga email address: freddie.padua. masuli@gmail.com.

8. Nasken a maipatulod iti Secretariat dagiti dua a dokumento iti saan a naladladaw ngem alas-11:59 ti Hunio 12, 2023 (oras iti Filipinas).

9. Ania man a pangngeddeng dagiti hurado, agtalinaed a kasta malaksid no maduktalan a nasalungasing ti Pagannurotan Bilang 5. Awananto metten ti autor iti karbengan a makisalip pay kadagiti masungad a pasalip ti ALVIYA.

10. Makipagtagikua ti ALVIYA Literary Foundation kadagiti mangabak a sarita nupay adda latta karbengan ti autor iti copyright daytoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten (elektroniko wenno tradisional man a wagas).

11. Dagiti Gunggona : First Prize – P20,000.00; Second Prize – P10,000.00 ken Third Prize – P7,000.00. ken dua a consolation prizes a sag-P4,000.00. Addanto met maited a sertipiko ti pammadayaw kadagiti mangabak.

12. Maiwaragawag dagiti mangabak a sarita iti maikatlo a lawas ti Hulio 2023 ket mapadayawanto dagiti mangabak inton Agosto 12, 2023 a panagkasangay ni Alex V. Yadao iti Libertad, Abulug, Cagayan. (ALVIYA Secretariat)

News

ilo-ph

2023-03-16T07:00:00.0000000Z

2023-03-16T07:00:00.0000000Z

https://manilabulletin.pressreader.com/article/281724093761457

Manila Bulletin Publishing Corp