Ti Lunod

“Mr. Santiago, are you still listening to me?” timek manen ti lalaki iti bangir a linia. Napakidem. Dina ammo ti aramidenna wenno isungbatna. “Ur-urayek ti pangngeddengmo, Mr. Santiago... Saanak a makapaguray iti mabayag. No saanka a sumungbat, rugiakon a papatayen ti pamiliam... Asino ti unaek kadakuada?” Nagngariet ti lakay. “Saanmo a dangran ida!” natangken ti bosesna. “No agtungpalka...” “Papatayenkayo no adda dakes a mapasamak iti pamiliak!” Nagkatawa ti lalaki a kasarsaritana. “Kasano koma ket addaka iti mansion? Mangibaonka iti rescue team?” “Addada gagayyemko iti PNP,” kinuna ni Manong Dodong ngem kasla awan ti bugas dagiti balikasna ta ammona ti mapasamak no ibaonna dagiti polis. “Saannak a talaanen, Mr. Santiago!” indil-agen ti lalaki a kasla naibusen ti anusna. “I’ll shoot one of your daughter, right now!” Nangngegna ti pannakaikasa ti paltog, sa ikkis ti maysa kadagiti annakna. “Don’t touch my daughter...” inriawna ngem pagammuan lattan ta naputol ti linia. Nagtigerger ni Manong Dodong. Agrasrasaw ngem nakaparpardas a nagdayal iti selpon. Tengtenglennan ti angesna. Matitileng payen iti kasla saan nga agpatingga a panagkiriring ti selpon. “Sungbatannak... Pangngaasim, saanmo a dangran ti pamiliak...” itantanamitimna. “Dodong...” timek ti asawana ti naitubong iti lapayagna idi masungbatan ti awagna. “Romana...” agtigtigerger ti timekna a simmungbat. “Tungpalem ti ibagbagada...” Agpakpakaasi ti asawana. “Papatayendakami...” “Adda napasamak kadagiti ubing? Dinangranda kadi dagiti anakmo?” “Saan... ngem makitak a nakasaganada a mangdangran kadakami... Tungpalem ida, darling...” Agtigtigerger met ti timek ti baketna. “Total lockdown ti mansion...” “Sika ti pannakapangulo dita. Agrasonka... kasapulandaka.” Napaanges iti nauneg. “Agatapda...” Maysa a bugkaw ti timpaw, sa kanalpaak, sa ikkis. “Dad!” “Melissa!” naipigsa ni Manong Dodong ti timekna. “Saan, saanmo a dangran dagiti anakko! Umayak dita...” Aglulluloken a nangisawang. “Good! I’ll give you 15 minutes...” “Give me thirty....” No saan, saanmon a makita a sibibiag dagiti ipatpategmo iti biag!” Naputeden ti linia. Nagrasawrasaw ni Manong Dodong. Mangur-uraten dagiti pispisna, ngem agtigtigergeren ti sibubukel a bagina. Makapungtot. Kayatna ti agawid a dagus. Kayatna a labanan ti asino man a nang- hostage iti pamiliana. Uray no lumakayen, kabaelanna pay laeng ti lumaban. Adun ti napapatayna a rebelde ken terorista idiay Mindanao. Kabaelanna ti uray no asino. Ngem sabali daytoy a situasion. Iggemda dagiti ipatpategna iti biagna. Ngem kasano a makaruar ditoy a saan a pagatapan ni Melanie? Napaanges iti nakaun-uneg. Dina ammo no kasano nga ibagana daytoy ken ni Melanie. Dagiti taona, awan ti problemana. “Okeyka laeng, Manong Dodong?” Naklaat. Ni Melanie! Nabayag ngatan daytoy a nakaasideg kenkuana? Nangngeg ngata daytoy ti saritaanda iti nanghostage iti pamiliana? Inalawna ti bagina iti pannakakigtotna. “Masakit ti maysa kadagiti annakko. Kasapulandak idiay balay. Masapul nga agawidak.” Nagkusipet dagiti mata ni Melanie. “Ngem naka- lockdowntayo, Manong Dodong...” “Ammok... ngem emergency daytoy. Nasken nga ipanko iti ospital ti anakko... Agsubliak met laeng a dagus.” Namuttalengan ni Melanie ti lakay. Ti seguridad ni Richelle ti kangrunaan. No adda rummuar kadakuada, maikompromison ti seguridad ti mansion. Ngem awan ti rason tapno pagduaduaanna ti lakay. Isu a mismo ti katalek ti adingna. Napaanges iti nauneg. “Okey, Manong Dodong... ngem agan-annadka. Ammom a maymaysa ti transportasion a mabalin nga aramatem?” “Ammok... helikopter laeng. Ken agan-annadak, dika madanagan... Agsubliak met laeng a dagus...” “Take your time, Manong Dodong... take care of your family... Ken dimo liplipatan ‘tay paltogmo.” Nagtung-ed ni Manong Dodong. “Wen, kasapulak ti paltogko, Melanie... Agyamanak...” Inruarna ti walkie-talkiena. “Captain, si Dodong ito... naririnig mo ba ako?” “Opo, Mang Dodong... Si captain ito...” insungbat ti piloto. “Get ready... lilipad tayo pupunta sa bahay...” “Akala ko, naka- lockdown tayo, Mang Dodong?” Agduadua ti timek ti piloto. “Emergency, captain... nagkasakit ang anak ko...” “Kailangan ba ng escort, Mang Dodong?” “Hindi na... hindi naman tayo magtatagal. Get prepared... 5 minutes...” “Ang bilis naman,” naisawang ti piloto. “May sakit ang anak ko. Kailangang madala kaagad siya sa ospital,” napardas ti lakay a nangirason. Nangngegna ti nauneg nga anges ti piloto. “Roger that, Mang Dodong... I’m ready in 5 minutes...” NAKATUGAW ni Rochelle a mangtangtangad ken ni Alexander De Gianna a nakatakder pay laeng iti sangona. Nalusiaw ti kayongna. Saan a pulos a mailinged daytoy dayta. Masmasdaaw ngata no kasano a nakagteng dayta a ladawan kadagiti imana? “Ania, awan maisawangmo? Kasano a nakipulapolka kadagita a tattao? Ammom met a napinget ni Mr. Giovanni a mang- takeover iti kompania... Saanmo kadi a kayat a salakniban ti korporasion a nagrigrigatan nga impatakder ti bukodmo a kabsat?” Mangemkemkemen ni Alexander ngem saan latta a makauni. “Kabsatmo... nagnumarka iti daytoy a kompania. Bimmaknangka gapu iti kabsatmo sa kasta ti isubadmo... tallikudam ti bukodmo a pamilia? Ania ti klasem a kabsat?” Nagtalinaed a naulimek ni Alexander ngem malasin a mariribukan. “Adda kadi dimo kayat iti pannakaimanehar daytoy a kompania? Adda kadi guram kaniak?” Ngem awan ti serbina a saludsod dayta ta agdadata a saan a pulos nga immannugot daytoy a lalaki idi isu ti napili a mangimanehar iti korporasion. Nangemkem ni Alexander. “Gura?” Kimmusilap. “Wen, dayta ti gapuna. Gapu iti gurak kenka, gapu ta no saan a sika, saan koma a kastoy ti panagbaba ti value ti stock daytoy a kompania. Kitaem...” intudona ti monitor a nakabitin iti diding, “kitaem ti Stock Exchange... kitaem no kasano nga agtultuloy ti panagbaba ti balorna... Gapu ta awan ti ammom maipapan iti negosio. Imbes a siak ti nakaipasaan ti pannakaimatonna, sika ti nagtungpalanna...” “Isu ti nagayatan ni Angelo... Siak ti pinilina...” “Gapu ta sinugsogam! Nagpammarangka nga adda ammom maipapan iti pannakaimanehar ti dakkel a negosio ngem awan met gayam. Aniaka laeng idi? Sekretaria. Katulongan. Aide... bimbo...” Simleng ti panagkita ni Rochelle. Nalabes a talaga daytoy a kayongna. Iti uray kaano man, saan a bimbo! Napintas, ngem saan a pudno nga awan utekna! Nakaparpardas a timmakder ket inasitganna ni Alexander. Timmayab a dagus ti dakulapna. Ngem sinippaw ni Alexander ti takiag ni Rochelle sa inetetanna ti pungopunguan daytoy. “Awan karbengam a mangsagid kaniak, maawatam?” inngarietna. Induronna ni Rochelle. “Naikamkamangka laeng iti pamiliami. Awan kaes-eskam! Inallilawmo laeng ti kabsatko.” Agngarngarieten ni Rochelle. “Gundawaymo amin a gundaway a nangallukoy iti kabsatmo nga ad-adu ti ammom ken kalintegam a mangipadaulo iti daytoy a kompania... ngem siak ti nangitalkanna iti rienda!” Inwagsakna ti takiagna. Naibbatan ni Alexander. “Maysaak a De Gianna, sika saan! Ad-adu ti karbengak ngem sika iti daytoy a kompania!” “Ngem sika ti mangman- manipulate iti panagsuekna. Inunload-mo ti ginasut a ribu nga stock- mo tapno ag- panic ti market... tapno madanagan dagiti dadduma a shareholder ket agilakoda met iti stock- da... isu a bumaba a bumaba ti gatad ti stock... ket inton ma- takeover ti Cypress Corporation, kellaat nga akupemto a gatangen dagiti nalaka nga stock... ket dakkel a gatad ti ganarem... minilmilion a doliar!” “That’s the plan...” “Ket maakom a mapukaw daytoy a korporasion gapu laeng iti guram kaniak? Ken gapu laeng iti pannakasisirapmo iti pirak ken ti awis ti bileg nga ipaay kenka ni Mr. Giovanni?” “Gapu ta dinadaelmo ti masakbayak iti daytoy a kompania!” “Ket nakasaganaka pay a mangitaya iti biag ti bukodmo a kaanakan tapno agballigikayo?” Nagtukeng ni Alexander. Naklaat. “Ania ti kayatmo a sawem?” “Pangngaasim, saankan nga agindidiammo. Pasetnaka ti bunggoy da Mr. Giovanni...” Makasuronen ni Alexander. “Diak ammo ti sasawem. Ti laeng tarigagayan ni Mr. Giovanni, maalana ti rienda daytoy a korporasion tapno isuda ti mangimaton. Kayatna nga alawen iti pannakairarebna. Tapno agsubli ti kinalatak ti nagan ti De Gianna...” “Ket tapno umannugotak, pakidnapyo ni Richelle? Aramidenyo nga appan tapno umannugotak iti pagayatanyo?” Napasardeng manen ni Alexander. Kinunana idi agangay, “Agparparnuayka. Saan a maaramid ni Mr. Giovanni dayta... He’s got ethics... Adda dayawna, adda prinsipiona.” “Apay a dimo damagen no yan ti kaanakam ita...” “Hustonan dayta a panagparnuaymo!” “Nakullaapanen ti panunotmo!” Nagngirsi ni Alexander. “Awanen ti maaramidam, Rochelle... Iti saan a mabayag, mapadisika iti dayta a tugawmo. Siak ti sumaruno a CEO daytoy a kompania. Ta uray no saanka nga umannugot a mailako daytoy a kompania, siak ti mangipamuspusan a mapukawmo. We will do a hostile takeover... Napagkarikon ti kaaduan kadagiti kameng ti board of directors ken dagiti shareholder...” Nagngirsi met ni Rochelle. “Nalipatam siguron a siak ti akiniggem iti 45 percent ti stock ti kompania... Twenty percent laeng ti kukuam, saankayto nga agballigi...” Nagkatawa ni Alexander. Manglalais a katawa. “Wen, a, 20 percent laeng. Ngem 20 percent met ken ni Mr. Giovanni, 10 percent kadagiti babassit nga investor... No pagtitiponenmi dagita a share— agkuentaka, Rochelle— agbalinka a minority shareholder...” Nailabeg ni Rochelle. “And then we convene the board of directors and all shareholders. We gonna force a vote...” Naklaat ni Rochelle. Dina ninamnama dayta nga imbaga ni Alexander. Nagkutukot dagiti tumengna. “Isu nga agingga nga adda pay laeng mabati nga interesmo iti kompania, ilakomon... No agtultuloy ti panagpatpatangkenmo, ginasut a milion a doliar ti mapukawmo... dayta kadi ti kayatmo?” Kinutim ni Rochelle ti akimbaba a bibigna sa nagwingiwing. Ngem iti kaungganna, makipinnatangken. Ilabanna ti kompania agingga iti kabaelanna. Ngem simngat iti panunotna ni Richelle, ti gandatda a panangkidnap tapno mapilitan a mangilako iti kompania. Ngem agingga a natalged ni Richelle iti aywan ni Melanie, saanto nga umannugot. No i- withdraw ni Alexander dagiti stock- na ket makikappeng kadagiti Giovanni, adda pay laeng gundawayna a mangallukoy kadagiti dadduma nga agtagikua iti stock. Ngem kasano ngata a maallukoyna ida no isu a mismo ti nakaigapuan ti nakadakdakkelen a nagbabaan ti balor ti stock ti De Gianna Corporation? NAKAUL-ULIMEK da Mayor Villa ken ni Danny Chan iti uneg ti Lexus nga SUV. Nakangisngisit ti tint ti lugan ket saan a pulos a malasin no asino dagiti adda iti uneg. Adda dagiti dua iti likud, kaduada ni Oswald, ti drayber, ken ni Luis, ti matalek ti mayor nga aide ken security. Addada iti sango ti nalawa a ruangan a narikpan iti pangbengbengen a landok. Nakabatog ti drayber iti maysa a pad. Imparabawna ti dakulapna iti pad, nagsilaw daytoy— kasla nagkikinnamat dagiti nalabaga a silaw a nangbasa kadagiti urit ti dakulap ti drayber. Madamdama laeng, nagsilaw iti berde, naglitek ti dakkel a ruangan sa nagin-inut a naglukat. Immisem ni Danny Chan. “Hi-tech,” nakunana. “Seguridad ti impangpangrunak,” kinuna ti mayor. “Diak kayat a makastrek ti asino man nga awan ti pammalubosko.” “Impressive, mayor,” indayaw ni Danny Chan. “Urayem a sumrektayo iti laboratorio. Ad-addu pay a kasukot ti seguridad ti nay- install.” Nagtungtung-ed ni Danny Chan. Simrekda apaman a nailukat ti ruangan a landok. Iti uneg, nasungadanda ti maysa a guard shack nga addaan iti barikada. Adda dua a guardia a nakaiggem iti M-4 ken nakaibarikes iti 9MM. Sabali laeng ti guardia a nakaiggem iti adda talina nga aso. Nagsardengda ket uray no nalasin dagiti guardia ti lugan ti mayor, kimmitada latta iti uneg a nangbigbig iti mayor ken dagiti kakaduana daytoy. Linikaw met ti guardia nga adda uggorna nga aso ti lugan. Adda pay guardia a nakabitbit iti kasla tubo a landok nga addaan iti sarming iti maysa a pungtona. Inlawlaw daytoy nga impalabas ti sarming iti sirok ti lugan. Saan a mailinged ti panagraem ti Intsik. Inlukat dagiti guardia ti barikada ket simrek ti lugan da Mr. Chan. Iti sangagasut a yarda iti masanguananda, adda maysa a dakkel a warehouse. Isuda ti exclusive distributor iti kalatakan a softdrink iti probinsia ken amin a produkto ti maysa a dakkel a korporasion nga agparpartuat pay iti makabartek nga inumen. Nasungadda ti garage door. Kas iti immuna a dakkel a ruangan iti ruar, adda naipatakder a pad. Intapkal manen ti drayber ti dakulapna iti pad, binasa ti silaw ti urit ti dakulapna, nagparang ti berde a silaw, nagklik ti rikep ti garahe sa nagininut a nagpangato daytoy. Iti uneg ti garahe, adda dagiti marka a nairanta a pagpatinggaan ti nguso ti lugan. Idi nakastrekda, nagpababa met laeng ti garage door ket apaman nairikep, adda naglanitek ket nagpangato ti uppat a landok nga screen a nanglawlaw iti lugan; kalpasanna, nagpababa daytoy. Saan a nagun-uni ni Danny Chan ngem makita iti langana ti ragsakna iti makitkitana a level of protection ti laboratorio. Idi agsardeng ti panagpababada, bimmababa met laeng ti landok nga screen.