Agpension Amin a Senior Citizen?

Kasta ti kuna ti damag. Ngem pulos a di namati ti autor…

ADDA rimmuar a pakaammo iti social media idi Pebrero 27, 2023 a nagkuna nga amin a senior citizen, awan labasna, umawatdan iti sangaribu a pisos iti binulan, mangrugi iti Marso 2023. Kastoy man ti linaon dayta a damag (naisurat iti dadakkel a letra ken saanmi nga inedit wenno inatur): “FYI. NATIONAL COMMISSION OF SENIOR CITIZEN (NCSC) 11350. ALL SENIOR CITIZEN PENSIONER OR NON PENSIONER WILL RECEIVE 1K PER MONTH OR 3K EVERY 3 MONTHS. UNDER THE NCSC ANG OFFICE OF THE SENIOR CITIZENS AFFAIR NO LONGER UNDER DSWD BUT UNDER NCSC. REGISTER ON LINE WWW.NCSC.gov.ph. THE 1K MONTHLY PENSION WILL TAKE EFFECT ON MARCH 2023.

Nagsayaaten, ania? Isu a naimula iti panunot ti adu a senior citizen a nakabasa iti dayta ti panagpensionda iti sangaribu a pisos iti kada bulan, pensionadoda man wenno saan.

Ngem naallilawda ta awan kinaagpaysona dayta.

Idi mabasami dayta nga impormasion, ammomi a saan nga agpaypayso ( fake news). Naglalaok ngamin ti alupasi ken bamban. Isu a kiniddawmi kadagiti pada a senior citizen a dida iwarwaras dayta a damag ta saan nga agpaypayso daytoy.

Ngem saan a nagsardeng ti panagwaras ti impormasion. Agingga a nangipaulog ni Atty. Franklin Quijano, ti Chairman ti National Commission of Senior Citizens, iti public advisory a nagkunaanna a saan a pudno ti damag ket binalakadanna dagiti senior citizen a dida mamatpati iti daytoy killo nga impormasion.

Saggaysaentayo man ngarud nga ilawlawag dagiti naagapad iti nasao a fake news.

Ania ti Republic Act 11350? Daytoy a linteg ti nangbangon iti National Commission of Senior Citizens (NCSC) a pinirmaan ni Presidente Rodrigo Roa Duterte idi Hunio 26, 2019. Panggep daytoy a komision ti mangipatungpal kadagiti plano ken programa ti gobierno a para kadagiti senior citizen. Adda ti Komision iti

Maysa kadagiti kangrunaan a probision ti R.A. 11350 ti mangibilbilin iti pannakayakarton iti Komision amin a programa ken aktibidad mainaig kadagiti senior a sigud nga ipatpatungpal ti DSWD. Ken ti nasao a linteg, awan ti ania man a dinakamatna a pannakaited ti pension kadagiti amin a senior citizen.

Ania ngarud dayta ibagbaga ti damag a 1K nga awaten dagiti senior iti kada bulan wenno 3K iti kada tallo a bulan, pensionado man wenno saan? Adayo iti kinapudno dayta. Ti husto ket isu ti pannakadoble ti agdama nga awawaten dagiti benepisiario iti social pension for indigent senior citizens. Ti sigud nga aw-awatenda a 500 a pisos iti kada bulan, agbalin a sangaribu. Naipaulog daytoy babaen ti R.A. 11916 a nagbalin a linteg idi Hunio 30, 2022. Nagyan daytoy a gakat iti lamisaan ti Presidente idi sakbay nga agpaso ti takemna ngem saanna a napirmaan. Nupay saan a napirmaan, automatiko a nagbalin a linteg kalpasan ti 30 nga aldaw a panagtalinaedna iti lamisaan ti Presidente. Mabalin a ti linaon dayta a linteg ti pinidut ti nangipaskil iti nasao damag.

Ngem saan a dagdagus a nayimplementar dayta a linteg ta awan pay met ti pondo a nailatang. Ken awan pay met ti implementing rules para iti pannakaipatungpalna. Saan ngarud a pudno daytoy a pannakaingato ti pension dagiti agdama nga umaw-awat iti social pension a marugian kano iti Marso 2023.

Ulitenmi a ti social pension a masasao ket para laeng kadagiti kualipikado nga indigent senior citizens. Wen, dagitay laeng pudno a nakurapay ti maipaayan iti social pension. Nakalista dagitoyen iti DSWD. Ngarud saan a pudno nga amin a senior citizen ket maikkan ti social pension iti babaen daytoy a programa. Lallalo la ngaruden a saan a pudno a maikkan amin dagiti senior iti pension pensionado man wenno saan. damag a mayakar iti NCSC manipud iti DSWD ket saan manen a husto. Ta ni kaano man, saan a nagyan ti OSCA iti opisina ti DSWD . Naipasdek ti OSCA babaen ti linteg nga R.A 9257, ti Expanded Senior Citizens Act of 2003; ken ti R.A 9994, ti Expanded Senior Citizens Act of 2010. Kuna ti linteg a mabangon agbalin nga ulo ti OSCA ket maysa a senior citizen nga apointaran ti Mayor iti termino a tallo a tawen. Daytoy nga opisina ti agaramid ken mangipatungpal kadagiti plano ken programa ken aramid a pakaseknan dagiti senior. Asistiran ti DSWD ti OSCA ngem ti Mayor ti mangited iti superbision daytoy. Makidanggay met ti OSCA kadagiti akreditado nga NGO ken PO kadagiti barangay tapno naannayas ti pannakaipatungpal dagiti programa para kadagiti nataengan. Ngarud adda ti OSCA iti babaen dagiti LGU ta isu ti kuna ti linteg.

No maipanggep met iti panagparehistro dagiti senior iti National Commission of Senior Citizens, pudno dayta. Inrugi nga insayangkat ti Komision daytoy panagparehistro babaen ti Senior Citizens Data Form idi pay Septiembre 2022. Maaramid daytoy sapasap a panagparehistro tapno makaestablisar ti Komision iti data base wenno listaan dagiti amin a senior citizen iti pagilian. Awan pay ngamin ti rekord ti NCSC no mano amin ti dagup dagiti senior citizen iti entero a pagilian. Uray ti DSWD, awan ti ig-iggemanna a listaan a kasta. Rebbengna laeng ngarud a dayta ti umuna nga aramiden ti NCSC tapno adda pangrugianna a mangipatungpal iti mandatona.

Ngem, ne, dina imbaga nga agparehistro dagiti senior citizen tapno umawatda iti pension.

Kadagiti makaammo nga agusar iti kompiuter, mabalinda ti agparehistro online. Ngem ibalbalakadmi kadagiti senior a nasaysayaat met laeng no mapanda agparehistro kadagiti opisina ti Barangay Senior Citizens Association (BSCA) ta adda madadaan a Data Form kadagitoy. Ken tapno maamiris no husto ti panangsungbatda kadagiti saludsod iti Data Form. Agpirma ken agthumb mark-da. Ken mangikabilda ti 2x2 a retratoda. Amin a nakarehisro kadagiti barangay ket maipatulod iti Komision a maidalan iti LGU. Agtultuloy ti panagparehistro kadagiti amin a senior a saan pay a nakapagrehistro ken kasta metten kadagiti kabarbaro a nagsenior wenno dagiti nabiit pay a nakadanon iti tawen nga 60.—O

(Ti autor ket agdama a Presidente ti Barangay Senior Citizens Association, San Gabriel, Tuguegarao City.)