KAMUNGGAY: Maayong Tambal Sa Samad

DINHI sa kalibotan wala gayod tingaliy tawo nga gustong masamad. Bisan gani tingali ang mga buang dili gustong masamad. Kay sakit man ang samad. Ug labihang makahasol kanato. Bisan gani ang gagmay lang nga samad sa atong kamot labihang makahasol. Kay sakit man lagi. Unya ra ba, bisag unsaon nato pagmatngon ang samad, kanunay gayong matandog. Tungod kay ang mga kamot nato mao man gayoy atong gigamit kanunay paghimo sa bisan unsa natong buluhaton. Maong kanunay gayod kitang mag-antos sa kasakit sa natandog natong gamayng samad sa kamot nga dugay maayo. Mao laging mag-antos kita kanunay sa kasakit sa matandog kanunayng gamayng samad sa atong kamot. Busa labihang buanga man gayod tingali sa tawo nga gustong masamad. Maoy hinungdan nga kita magmatngon gayod kanunay nga dili masamad. Mag-amping. Ugaling kay ang samad maoy bikil nga dili gayod nato kalikayan. Kay ang maong bikil mahimong modangat kanato gumikan sa mga bikil sab mismo sa atong mga lihok ug mga hitabo nga dili sab gayod nato kalikayang modangat kanato… nga kita masamad. Mao lagi nga ang ato lamang gayong mahimo mao ang pagpangitag tambal sa atong samad aron daling maayo. Ilabi na kon dako ang samad nga kalit atong nahiagoman. Pero hinuon naa na may daghang mapalit sa botika nga tambal sa samad. May kauban pang mga pangsanta sa paghubag ug antibiotic nga daling makapaayo sa samad. Ugaling lang kay mahal ang mga tambal nga mapalit sa mga botika ilabi na karong panahona nga labihang tag-asa na sa presyo sa tanang palaliton dinhi sa atong nasod. Ilabi na gayod kon atua magpuyo sa mga dapit nga layo sa lungsod. Maong dakog magasto pagpalit sa mahal nga tambal. Busa ang ultimo-remedyo mao ang pagpangitag tambal nga mahimong makita sa kalikopan aron matambalan dayon ang samad. Ilabi na kon dako ang samad, kinahanglan sab gayong mapatang-on dayon ang dugo. Ug ang tambal nga daling makita sa atong kalikopan mao ang kamunggay nga kasagaran gayong anaa lang daplin sa tugkaran. Kay ang kamunggay ugod maoy usa sa mga utanon nga makahatag kanato sa pinangandoy nga maayong panglawas, himsog ug piskay. Lig-on. Mao kana ang mga kamatuorang atong makita sa mga tawo nga kanunayng naggamit sa kamunggay sa ilang mga pagkaon, giutan. Maong gitanom ang kamunggay duol sa nataran. Ug bisan sa panambal, ang kamunggay maoy usa sa labing epektibo kaayo alang sa samad, daling makapatang-on sa dugo sa dagkong mga samad ug dali sab makapaalim. Ang bag-ong kinuhang mga dahon sa kamunggay dukdokon hangtod mapino og pug-on diretso sa samad aron daling motang-on ang dugo. Ang pinug-ang dinukdok nga mga dahon sa kamunggay ihampol sa samad, bugkosag panyo o tinabas nga panapton aron dili mabungkag. Dangtag usa ka adlaw tangtangon ang bugkos ug makita ang samad nga uga na, nagsinaw o sinaw. Pug-ag balik sa dinukdok mga dahon sa kamunggay ug ihampol sab gihapon ang pinug-ang dinukdok mga dahon ug bugkosan. Sulod lang sa tulo ka adlaw nga pagpuga ug paghampol sa dinukdok mga dahon sa kamunggay ang samad uga na kaayo, sinaw, magsugod nag kaalim ang gitambalang dakong samad. Walay gasto, ug sayon ra sab kaayong gamiton.—