LIBRO A TI BASSIT A PRINSIPE ITI DAVAO.

Nakadanonen ti libro a Ti Bassit a Prinsipe iti Siudad ti Davao iti pannakairaman ti libro a naipresentar iti Philippine Book Festival a naangay idi Agosto 18-20 iti SMX Convention Center Davao, SM Lanang, babaen ken ni Faye Q. Flores-Melegrito bayat ti panangibinglayna iti padasna iti pannakaipatarus ti Ti Bassit a Prinsipe manipud iti Ingles a The Little Prince iti tungtongan a “The Little Prince in Philippine Languages: Finding the Essentials in the Art of Translation.” Iti ladawan, kadua ni Faye ti dua a padana nga Ilokano a nagatendar met iti Philippine Book Festival, da (agpakanawan) Rolando “Lando” Bueno ken Julio “Joe” P. Agarano, agpada a tubo ti Pinili, Ilocos Norte, ken kinaturposan iti hayskul ni Cles B. Rambaud a kadua ni Faye a nangipatarus iti Ti Bassit a Prinsipe manipud iti Ingles. Iggem ni Lando ti kopiana a Ti Bassit a Prinsipe (Ilokano) ken ti Ang Gamay nga Prinsipe (Cebuano); iggem met ni Joe ti kopiana a Ti Bassit a Prinsipe (Ilokano). Agpadan nga agnaed da Joe ken Lando iti Siudad ti Davao.