Madre Solsona

Agpayso a ti district supervisor ti paggapuan ti rekomendasion iti pannakaital-o iti posision wenno pannakai- transfer dagiti mannursuro iti babaenna. Ti irekomendarna, sigurado nga aprubado ti superintendente iti kanito nga adda bakante. Kinagurgurak ti superbisormi idi Teacher I pay laeng ti item- ko ta dina irekomendar ti pannakaital-ok a Head Teacher III. Intuloyko ti post graduate course- ko. Naturposko ti Master in Educational Management. Naital-oak a prinsipal sa district supervisor.

Umuna pay laeng a dominggok iti distrito, inyasidegen dagiti agFermin ti riknada kaniak. Inyawisda a dagus ti panagsasarak dagiti tomador iti balayda. Barbakua a paltat ken dalag ti pulotan. Sabali pay la ti lauya a tultulang. Sagpaminsan dayta idi damo, ngem idi agangay, masansanen ti panagtitiponmi iti balay ni Mr. Fermin wenno iti balay ti maysa kadagiti maestro iti distrito. Sumrekkami iti kosina inton mabanglawankami. Kalpasan ti pangrabii isalami dagiti babbai nga aplikante a naynay met nga umapon iti balay da Mr. Fermin.

Naipuesto ti bungalow a balayda iti igid ti National Highway. Mailigsay iti kaaduan a balbalay. Kaarrubada ti amada nga agsolsolo nga agbiag. Saan a bumibiang iti ariwawa dagiti annakna ta bungalngalan a Dating Daan. Kaanakan da Mrs. Fermin ti kaarruba iti makanigid. Nasamek a bakir ti laud ti balay a paset met laeng ti lote. Nabakudan ti home lot iti kongkreto isu a dida unay masinga dagiti kakaarruba.

Naulit-ulit dayta a panagtitipon. Naamo dagiti mangnginum iti superbisor ta kayatda met ti maital-o wenno mai- transfer iti asideg wenno iti bukodda a barangay. Umasideg met dagiti aplikante kadagiti padaya bareng no isuda ti umuna a maipuesto.

Inkarik a no di agbalbaliw, diak mairekomendar ni Mr. Fermin iti promotion- na. Uray pay no anak ti dati a district supervisor wenno asino man a division supervisor a kas ken ni Dr. Anselmo ti agkiddaw.

NALPASEN ti provincial meet. Panawen manen nga agbisitaak kadagiti eskuela ken agobserbar kadagiti mannursuro. Inrantak ti agbisita idiay Dana Elementary School.

Naulimek a lugar ti Dana. Nalipit ti kalsada a nangbeltak kadagiti kataltalonan manipud iti highway agingga iti Sabsaban Falls. Naisaad ti eskuela iti tengnga ti kataltalonan. Napuskol dagiti pinuon ti niog a naisallin kadagiti balbalay iti bangir ti kalsada.

Simmabat ni Mr. Fermin iti ruangan. Nakaisem a kunam la no nakakita iti nalibnos a balasang nga umis-isem kenkuana. Nakauniporme iti dekolor a kas kaniak. Bitbitko ti naingpis a portpoliok a naglaon iti observation book. Nagbaybaykami— nalukmeg ken nakuttong— iti pasilio nga agturong iti kuartona.

Sumagmamano nga estudiante ti simmabat kadakami. Nagdaydayawda sa met laeng nagtarayda nga immadayo. Nagsardengkami iti sango ti pasdek a dua ti kuartona. Minirak dagiti masetas a naimula iti agsumbangir nga igid ti pasilio agingga iti pasdek nga uppat ti kuartona. Natagari dagiti ubbing. Agkankanta dagiti ubbing iti maysa a kuarto. Natinggaw met ti timek ti maestra iti sabali a kuarto a kasla ipasindayagna ti kinalaingna a mangisuro gapu iti kaaddak.

Napalikmutan ti pagadalan iti siitan a barut. Iti likud ti pagadalan, natayag dagiti gmelina a nagserbi a darekdek ti alad. Iti daya, maysa pay a pasdek a tallo ti kuartona. Adda dita ti library, opisina ken science room.

Iti kuarto ni Mr. Fermin ti immuna a simrekak. Nagdaydayaw dagiti duapulo nga estudiante nga adda iti maikapat a grado. Babai a para teacher ti agdama a mangisursuro. Impalawlawko ti panagkitak iti kuarto sa nagtugawak iti sango ti lamisaan tapno paliiwek ti panangisuro ti maestra. Ngem saan a ti para teacher ti nakatiliw iti imatangko no di ket ti attendance chart, kakaisuna a nakabitin iti diding iti baba ti tawa.

Iti lamisaan, nakaparabaw ti lesson plan notebook. Inukradko. Adda daily lesson plan a nakasurat. Lesson plan ti para teacher. Blangko dagiti aldaw a naglabas. Pinirmaak amin a blangko agraman ti lesson plan ti para teacher.

Sinapulko ti lesson plan ni Mr. Fermin. Nadlaw ngata ti maestro ti panagkuretret ti mugingko ken ti idadakkel ti abut ti leppap nga agongko? Bangbangir ti nagkir-in a bibig, a pangngisiten gapu iti sigarilio, iti baba ti buokan nga agong ni Mr. Fermin. Nauneg dagiti nabungkong a binukel dagiti matana. Pasaray yamuy dagiti rusanger a ramayna ti napuskol a buokna.

Awan man laeng ti nadlawko a tigergerna. Napuskol ti rupana, kunadan sa? Tuppotuppol dagiti pinanid. Malagipko ti kuna ti district supervisor kaniak idi nairana nga awan ti lesson plan- ko idi bisitaennak idi classroom teacher- ak pay laeng. Saannak nga inungtan ngem napalalo a babainko.

Kinuna ti superbisor, “Ti lesson plan ti bagnos ti maestro a mangisuro kadagiti ubbing.”

Tinuladko ti kinuna daydi superbisor kaniak ken ni Mr. Fermin.

“Sir,” kinunana, “saanen a maulit.”

Diak ammo ta kasla nasebseban dagiti dakes a riknak ken ni Mr. Fermin.

Immallatiwak kadagiti dadduma a kuarto. Linukatak

Nagpakadaakon.

Idi makasangpetak, tiningitingko ti riknak no mapanak iti balay ni

Mr. Fermin. Diaske, kayatko met ti makipulotan. Kasla maang-angotko ti bang-i ti tinuno a paltat! Sumurokkumurang a dua a kilometro laeng ti kaadayo ti Berong.

Nadanonko a madama nga agtuntuno ni Mr. Rigodon, ti kaubingan a maestro ti distrito, iti paltat. Nakakatayak. Imbannikesko pay ti nangbuya iti matuntuno a sumarsaretset ti tabana a paltat. Nakisimsimak a dagus iti Emperador a pagsasanguan dagiti agiinum iti daan a lamisaan.

Nalaing nga agsangal iti istoria ni Mr. Fermin. Iti kasta, alas dosen idi makaawidak.

Saan unay a nabayag sa inawisdak manen iti ili. Nagsasarunon dayta. Idi agbalawak, naiderraasak san iti sidong dagiti mangnginum. Nariingak laengen a maysaakon a maag. Ag- monitor ti trabahok iti aldaw ngem agmaymaysaak nga agawid iti kaserak iti tengnga ti rabii. Napalalo pay a bartekko ken diakon ammo ti lubongko. Naimbag ketdi ta awan ti napagpagtengko a desgrasia wenno nasalawko a managdakdakes.

NAI- TRANSFER- AK iti sabali a distrito a saan a naital-o ni Mr. Fermin. Nagkitakami ken Dr. Anselmo iti iti maysa nga aldaw.

“Salamat,” kinunana a siraragsak. “Napirmaanen ti superintendente ti appointment ni Mr. Fermin. Head Teacher III itan.”

Bimsagak. Asino ti nangirekomendar ken ni Mr. Fermin?

Tinurongko ti estante a nakaidulinan dagiti dokumento a yawid ti pangulo ti distrito a masakupanna.

Ginuyodko dagiti folder a para iti distrito ti Brookes. Sal-at! Adda appointment ni Mr. Fermin a Head Teacher III. Agtamtambor ti barukongko a nangmira iti baba a pakakitaan no asino ti nangirekomendar.

Recommended by… Nemesio Legara! Nakapirmaak pay!

Kasano koma a nagpirmaak? Pinilitko a pinanunot no kasano a naaramid daytoy. Maysa ngata kadagiti panawen a nabartekak unayen ken diakon ammo ti lubongko?

Insublik ti folder iti estante. Awanen karbengak kadagita a dokumento. Tinurongko ketdi ti opisina ti superintendente.—O