Publication:

Bannawag - 2021-05-01

Data:

Ni Fleur ken Dagiti Un-Unnoy ni Anton

Contents

Clifton Pascua

Maika-2 a Gunggona /Guillermo Iloreta Salip iti Sarita Mainaig iti COVID-19/ Isponsor: Guillermo Iloreta, Sacramento, California/ Nangimaton: GUMIL Filipinas/ Dagiti Hurado: Cles B. Rambaud, pangulo; Juan Al. Asuncion, kameng; Dr. Jurlita U. Basuel, kameng “AGAWIDKAN? Urayennak, Anton!” Kellaat nga adda nangigawid iti dandanin agrikep a ridaw ti akinkanawan kadagiti agparis nga elevator a kaasitgan iti opisinami. Nagsubli a naglukat ti ridaw ket limmubbon ti nagsaludsod. Diak intangwa ti rupak manipud iti basbasaek iti personal a selponko—ta maseknanak unay— ngem iti natanang a timek ken iti bengngatna, ammokon a ni Fleur, maysa a Belgo-Pranses a kaduak iti departamento ti protocol iti trabahomi. Kinitak met laeng sa minulagatak idi ag-beep ti scanner ti elevator. Pammalagip iti umno a pakaaramatan ti badge. Inusarna ngamin ti badge-na tapno dagus nga agrikep ti elevator ken agtartarus nga agpababa iti underground parking. Sumagmamanokami laeng a naikkan iti karbengan iti kas iti inaramidna. Adda naibugas a microchip iti badge-mi. Mausar pay daytoy a panglukat kadagiti ridaw ken kompiuter a saan a basta mastrek dagiti dadduma nga empleado. “Makauman daytoy a COVID!” inngayemngemna sa inisemannak. Ammok a paspasagidannak gapu kadagiti basbasaek. Naggiddankami a naguyek. Tinuladko ti panangbennatna iti maskarana tapno maabbongan a nasayaat ti maskarak ti agong agingga iti babaen ti timidko. Mariknak ti kinairteng dagiti ramayko gapu iti kasasapsapo iti alkohol ken kabubuggo iti ima. Nalagipko la ket ngarud no apay nga agingga ita, di pay simmangpet ti resulta ti naudi a swab test-mi. Kas field officer, mapilitankami a rummuar isu nga obligado ti pagtrabahuanmi a mangpa-test kadakami iti tunggal dua a lawas manipud idi simmangbay ti COVID ditoy Europa. Naemma ti isem ni Fleur a nagminar kadagiti narimat a matana a papintasen dagiti atitiddog ngem apagdillaw ti panagparintumengna a kurimatmatna a naipasirok kadagiti naingpis ken apagapaman ti panagarkona a kidayna. Awan kolorete ti rupana ken nalinis ti pingpingna. Ikudkuduag ti kalkalainganna ti tundirisna nga agongna ti maskarana. “Sika ti emergency, sir, ” inkiddayna sa sinublatnak a minulagatan idi gandatek nga uliten ti sangkapalagipko nga umno a pakausaran ti badge— para laeng iti emergency. “Agalas nueben iti rabii. Apagsagidmo ‘tay pinangaldawmo a tuna salad. Ken Biernes ita. Siak ti taya iti steak, fries and salad a paboritom no aglaladutka. Manganka iti adu tapno pumigsa ti resistensiam... kasta met dagita tumengmo! Ken isardengmo pay laeng dayta!” Indugsolna ti tammudona iti bakrangko sa siniggawatna ti selponko a pangbasbasaak kadagiti personal nga emailko. Impisokna ti selponko iti dakkel a bagna sa intudona ti CCTV iti ngatuenmi. Diakon nagtagtagari. Maiparit ti agusar iti uray ania a klase ti social media ken personal a telepono iti trabahomi. Adda naited ken ‘nadalusan’ a selpon nga usarenmi. Sintagari a simmurotak. Insiperko agingga iti tengnged ti diaketko sakbay a simrekak iti kotsena a Mini Cooper idi makadanonkami iti pagparkingan nga adda iti maikatlo a kadsaaran iti baba ti ground floor. Nalas-udanen ti Abril ngem tumulang pay laeng ti lam-ek. Siakon ti nangpawerret iti heater ti kotse. Nairidepko siguro kabayatan ti biahe ket nariingak laeng gapu iti naanat a pannakaapros ti timidko. Nadlawko nga addakamin iti underground parking ti apartment ni Fleur. “Rabiin. Naka-lockdown dagiti restauran. Ken ammok nga awan makan idiay balaymo no di instant noodles,” pakantiaw a sungbatna iti agsalsaludsod a panangkitak kenkuana. “MABALINMON nga ituloy ti basbasaem itay, sir. Wenno tulongannak nga agluto.” Insubli ni Fleur ti selponko. Nakastrekkamin iti apartmentna. Tinulongak idi uksobenna ti winter coat ken sapatosna. Inuksobko met ti diaket ken sapatosko. Insimpak dagitoy iti aparador nga adda iti asideg ti ridaw a kas iti datin nga ar-aramidek no awisennak ditoy apartmentna. Insungona ti minibar sakbay a nagtarus iti kosina. Binuyak ti dapandapan ken til-ay a pannagna ni Fleur iti datar a paggapuan ti heater ti apartment. Lung-ay ti nasalun-at a bagi. Kalalainganna ti karapis ti pammagina. Nakapantalon iti kumepkep a maong a naparisan iti kumepkep met a sweater. Maisurot iti kawesna ti immal-o a siketna ken ti nairteng a patongna a bumagay kadagiti nawasnay a gurongna. Napinggol a naipangato ti apagdillaw nga olandes ken pagat-abaga a buokna. Nadonia ken muldotan ti teltelna. Makaay-ayo a buyaen ti ling-i ti ulona. Kellaat a nagpuligos daytoy. Binannikesannak sa immisem. Naawatak ti bannikesna. Tinurongko ti minibar. Dua a baso ti kinargaak: maysa iti wine, maysa iti arak. Imbatik ti selponko sa sinurotko iti kosina. “Daytoy COVID, Fleur, kumarkaro. Ken amangan no agbayag,” kinunak. Inyawatko ti baso a naglaon iti Cabernet Sauvignon. Inrugik met a tinimtiman ti nagyan ti basok a single malt whisky. Dinanggayak ti panangisaganana iti naglalaok a green salad. “Ammok,” insungbat ni Fleur. “Nagasatta pay laeng ta saan pay a nagrikep ti trabahota.” Ngem saan a ti panagrikep ti trabahomi ti adda iti panunotko. Adayo a mapasamak dayta. Maysa a sanga ti gobierno daytoy. Maysa pay, adda unemployment benefits wenno naponduan a benepisio para kadagiti maawanan iti trabaho—iti man sektor pribado wenno gobierno. Maited daytoy iti kondision a deklarado ti pagsapulan adda man pandemia wenno awan. Pagtinnulongan ti employer ken ti empleado ti pannakapondo daytoy. Maikissay manipud iti sueldo ti kontribusion ti empleado, segun iti linteg, kabayatan ti kaadda ti trabahona. Kasla inkapilitan a klase ti seguro a maponduan a karaman ti salun-at, pension ken withholding tax. Sabali pay ti espesial a seguro nga obligado a gatangen ti employer para iti mabalin a mapasamak nga aksidente iti lugar ti pagtrabahuan. Dagita ti gapuna nga agarup 60 agingga iti 70 a porsiento laeng ti mayawid a sueldo. “Agpayso ‘ta imbagam,” inkanunongko ketdi ken ni Fleur. “Ngem adu dagiti awan pangiremedioanda iti

Images:

© PressReader. All rights reserved.