Publication:

Bannawag - 2021-05-01

Data:

Koleksion

Contents

Ni ANNA LIZA MADAYAG GASPAR, CPA

SIGURO, adu kadatayo ti adda koleksionna. Mabalin a libro. Mabalin a dagitay nanginngina bassit a kas kadagiti lugan wenno sapatos wenno branded a bag. Mabalin met a dagitay simple a kas koma selio (stamps) a para kadagiti dadduma a kas kaniak, inrugik ti nagurnong kadagitoy idi ubingak pay ngem naisardeng--ngem intuloyko manen ta adda dagiti penpalko manipud iti nadumaduma a pagilian a padak nga agus-usar iti fountain pen). Wen, fountain pen ti us-usarek no suratak dagiti penpalko; saan nga email. Ket ibusonko dagitoy a surat. Ket apay a fountain pen? Gapu ta adda koleksionko a fountain pen ken dagiti fountain pen ink. Magustuak man dagiti nadumaduma a maris a mabalin nga usaren. Adda dagiti espesial a kas man adda glitters-da wenno shimmering inks ken adda met dagitay agsabali ti marisda wenno sheening inks. Ti magustuak kadagiti fountain pen ket uray saan nga italmeg unay, agsuratdan. Para kaniak nga agsursurat babaen ti ima, napintas daytoy ta di unay agpuersa ti imak no kasta nga agsuratak. Take All Kamengak iti maysa a Facebook group dagiti naayat nga agus-usar iti fountain pen ditoy Filipinas Idi naminsan nga aldaw, adda nag-post iti daytoy a grupo. Ilakona kano aminen ti koleksionna a fountain pen ken ink ta masapulna ti ekstra a kuarta a pagpaagasna. Dina imbaga no ania ti sakitna ngem ti nagbilibak ket ti pannakabaelna a mangilako iti fountain pen collection-na a siguradoak a tawen ti binilangna tapno naurnongna. Ti kinaagpaysuanna, no mabalbalin kano ket ilakona a set ti collection-na ta gapu iti kinaadu dagiti fountain pen ken ink-na, adu met a panawen ti mausar tapno mailistana amin a saggaysa. Idi kinitak dagiti nadumaduma a fountain pen iti collection-na, uray la a napangangaak ta amin dagitoy ket espesial. Adda limited edition, adda numbered edition (kayatna a sawen, limitado ti naaramid iti daytoy a disenio isu a denumero). Ken kayatna a sawen pay a dagitoy nga edision, nangina ken patiek a tawen ti binilangna sakbay a nakolektarna dagitoy. Di kadi saan laeng a napateg ti balor daytoy collection-na no di pay ket napateg daytoy kenkuana. Adda sentimental value-na. Ngem saan a nagkedked a mangilako ita a masapulna la unay ti kuarta. Sika, kaka, no talaga a kasapulam unayen ti kuarta, ania met ti ilakom a koleksionmo?

Images:

© PressReader. All rights reserved.