Publication:

Bannawag - 2021-05-01

Data:

Mula a Laya iti Bangsal

Contents

Ni JIM P. DOMINGO

MAPALIIW iti pagtaengan dagiti Ilokano kadagiti away ti kaadda latta dagiti mulada a pagrekado iti asideg ti kosina. Naimula dagitoy iti daan a timba, nagawangan a lata, nagusgusingan a masetera ken uray ania la ditan a mabalin a kargaan iti daga sa mamulaan. No dadduma, mayuli pay dagitoy a pagmulaan iti bangsal. No ngarud adda agluto, adda latta nakasagana nga irekado iti isagana a taraon. Kadawyan a kutsay, lasona, bawang ken laya ti mapatanor kadagitoy a pagmulaan. Adu ngamin a potahe ti pakaaramatan dagitoy a rekado. No masapul ti ania man kadagitoy, asideg ti pagkettelan wenno pangparutan iti kasapulan. Ammo dagiti nataengan nga Ilokano a kasapulan pay ti bawang ken lasona tapno mailiklik kadagiti nagduduma nga an-annayen a kas iti panateng, sakit ti puso, ken nangato wenno nababa a presion ti dara. Maimulmula pay ti laya iti asideg ti kosina. Saan la ngamin a ti bagas, mairaman pay ti bulong ti laya a pagrekado. Mabalin pay nga ibilag ti bagas ti laya nga aramaten no kasapulan. Malaksid ti pannakaipadaga ti laya (ken uray pay ti langkuas wenno turmeric wenno yellow ginger) adu pay ti agmulmula iti daytoy iti nagawangan a lata wenno masetera. Mapaliiw pay nga imulmula met dagiti Ilokano ti pimiento. Pagkalay-atenda daytoy kadagiti kayo nga agbunga iti arubayanda. Malaksid kadagiti pagrekado a muyong, maimulmula pay iti asideg dagiti pagtaengan ti erbaka (damong maria). Maar-aramat daytoy a kas pangparegta kadagiti aglaladut. Ar-aramaten pay dagiti nataengan daytoy a muyong para iti sakit ti tian, panagtakki, panagtabbel, saan a natunawan ken pangikkat iti ariet. Malaksid kadagitoy a mula, adda pay agmulmula kadagiti lemon grass iti asideg ti kosinada. Maanger dagiti bulong ti lemon grass ket maaramat ti nagangran a kas inumen no di man pagdigo iti lutuen a masida, kas koma iti nadiguan a manok. Nangina met ti mainum a nagangran iti lemon grass a maipalamiis a maiserserbi kadagiti dadduma a panganan. Daytoy ketdi nga aramid a panagmula kadagiti rekado iti asideg ti kosina, ar-aramiden metten dagiti Ilokano a naipalladaw kadagiti dadakkel nga ili ken siudad. Isu a no kuan, makakitatayo kadagiti maipaspaskil a ladawan iti Facebook a mula a rekado a naimasetera wenno naimula iti timba ken naipuesto iti igid ti balay, iti tuktok ti balay, wenno iti sadino ditan nga espasio a magam-udan ti lawag ti init.—O

Images:

© PressReader. All rights reserved.