Publication:

Bannawag - 2021-05-01

Data:

Ti Musika ti Jesse’s Bakery

Contents

Ni RIC AGNES

IDI Abril 1, 2021, nangrikep ti ridaw ti maysa kadagiti kababayaganen a kompania ti negosio ditoy Hawaii, ti Love’s Bakery. Naipasdek ti Love’s Bakery idi Hunio 19, 1851, makabulan kalpasan a simmanglad ditoy Hawaii ni Robert Love manipud idiay Sydney, Australia. Kinakuyog ni Robert ti kaingungotna, ni Nancy, ken dagiti innem nga annakda, maysa kadagitoy ti nabiit pay a naipasngay, ni Robert, Jr. Babaen ti Adirondack, maysa a barko a ginaudan, naglayagda iti nasurok a 80 nga aldaw a nangballasiw iti taaw. Naglasat ti Love’s Bakery iti adu a rigat. Immuna a nairehistro daytoy iti nagan a Biscuit & Bread Company. Kalpasan ti nasurok a 10 a tawen, pimmusay ni Robert. Dakkel a banay ti panaderia ti kaawan ni Robert. Ni Nancy ken dagiti barito nga annakna ti nangituloy iti aramid iti panaderia. Apagapaman ti panagsagaba ti panaderia. Idi makaungar daytoy, simmangbay manen ti kinadaksanggasat ti Biscuit & Bread Company—nauram a namimpinsan ti pugonna. “Diak mailadawan no ania a kired ti bagi ken determinasion ti adda iti daydi apok a baket-ititumeng,” kinuna ni Funny Love idi kauman ti maysa nga anawnser ti telebision. “Kadagidi a panawen, awan ti nadaras a pangutangan iti puonan nga agnegosio. Ngem naisakadna ti pannakaipasdek manen ti panaderia.” Kalpasan daydi, naawaganen ti panaderia iti Love’s Bakery. Naannayas ti panagtaray ti negosio ti Love’s Bakery iti laksid ti Umuna ken Maikadua a Gubat iti Sangalubongan, ti angol idi 1915, dagiti nadumaduma a didigra, ti pannakaidalit dagiti negosio idi 1938 wenno ti makunkuna a Great Depression, ti pannakarpuog ti dua a pasdek ti negosio idiay New York idi 2001 wenno 911, kdp. Ngem itay napalabas a tawen, iti isasangpet ti COVID19 ditoy Hawaii, bimmaba ti kasasaad amin a negosio nupay adda inlatang ti gobierno nga ayuda kadagiti kompania, saan a nadaeran ti Love’s Bakery ti saplit ti pandemia. Ket itay Pebrero, inkeddeng ti kompania ti panangrikepna, kalpasan ti 170 a tawen a panangpugonna iti tinapay. Iti sabali a bangir, napalalo ti panagkarkararag dagiti Filipino ti panagpaut koma ti Jesse’s Bakery nga agpugon kadagiti nadumaduma a tinapay a nakairuaman dagiti Filipino. Ti Jesse’s Bakery ti kangrunaan a panaderia dagiti Filipino ditoy Hawaii. Impasdek ni Jacinto Badua, tubo ti San Nicolas, Ilocos Norte, ti Jesse’s Bakery ditoy Hawaii idi Pebrero 1974. Sakbay nga immay ni Jacinto Badua, kaduana ti pamiliana ditoy Hawaii idi 1967, adda idin bukodna a dua a panaderia idiay San Nicolas. Daydi Remedios ti kaingungotna. “Nangged ni Tata iti nadumaduma a kompania, agraman iti kaunasan, sakbay nga inkeddengna ti nangipatakder iti negosio,” kinuna ni Joseph Badua, maysa kadagiti dua a mangisaksakad iti naannayas a pannakaimaton ti panaderia. Dakkel a kabadangan ni Jacinto dagiti annakna, da Manuel, Fernando, Joseph, ken Ruben, iti panangrugi ti Jesse’s Bakery. (Nasapa a pimmusay daydi Eddie, maysa kadagiti lima nga agkakabsat.) Napardas ti irarang-ay ti panaderia. Iti apagdarikmat, inappupo dagiti Filipino/Ilokano dagiti produkto ti Jesse’s. Daytoy a panaderia ti immuna a nangidanon ditoy Hawaii iti pandesal ken lahi (balintawak), kasta met ti pianomo (pianono) ken hopia. “Saan nga impalubos ni Tata a maarus ti pandesal. Iti laksid ti panagngato ti presio ti arina ken dadduma a rekado, pinagtalinaedna ti langa ti pandesal a kas idi un-unana a panawen,” kinuna ni Joseph. “Kalidad ti ipangpangruna ti Jesse’s Bakery.” No labsan ti agsao, iti agdama, kasla kadakkel ti gemgem ni Manny Pacquiao ti pandesal iti Jesse’s Bakery. Makadanon iti amin nga isla ti Hawaii dagiti produkto ti Jesse’s Bakery ken iti amin a tiendaan ti Times Supermarket, Sack N Save, Foodland, Safeway, kasta met idiay California ken Las Vegas. Iti maysa a gundaway, aganay a 70 dagiti agtrabtrabaho iti Jesse’s Bakery. Ngem bimmassiten gapu iti kinairut ita ti ekonomia ditoy Hawaii. Adu dagiti pagannurotan a masapul a tungpalen. Ket tunggal pagannurotan, adda kaibatoganna a paggastuan. “Pagpiaanna,” kinuna ni Joseph, “addan dagiti annak ken appokomi kada Manong Manuel ken Ruben a tumultulong iti pannakailaylayon ti negosio.” Da Elsa ken Flory a kaingungot da Manuel ken Joseph, kas panagsaganadda, ti mangimaton iti jesse’s Café & Restaurant. Naurnos ti panagdadanggay dagiti ag-Badua. Kadagiti panawen nga aglinglingayda, agkanta ni Joseph idinto a danggayan ti gitarra da Jacinto a tatangna ken ti banduria ni Manongna a Manuel. Maysa a masirib ti nagkuna: Kasla musika nga agtutunos ti tulbek ti panagrang-ay ti negosio. Adda musika nga agay-ayuyang iti Jesse’s Bakery. Ti musika (panagtutunos) ti napigsa a pangrangetna iti pandemia.—O

Images:

© PressReader. All rights reserved.