Publication:

Bannawag - 2021-05-01

Data:

Panaguray*

Contents

Jobert M. Pacnis

Makapamuriot, makapigerger daytoy panagpadpadaan ken panagur-uray iti mabalin a dalagudog wenno mabilbilang nga askaw; wenno agkarkaradap a sipnget iti duri ti agganggaganat itan a panawen. Saanko payen nga ammo ti makudkod ken agkudkod wenno no kasano ti umaddang iti daytoy pakailumlumloman latta a pitak iti sinanama nga umanges ti biag kadagiti sumirip a dawa. Ti ammok a panaguray addaan iti segga ken namnama kas iti panaguray dagiti kappessa a billit iti umok iti panagsubli ti ina ken amada a nakaammal iti uray agkukuttong nga igges! Wenno kas iti panaguray ti mawaw a daga iti uray sangkabassit laeng a tarakitik wenno panangbanios ti langit. Ngem itan daytoy panaguray iti ania man a pagturongan ti agdakdakiwas nga aligagaw ti di maimatangan a banag a mabalin a mangrunot itoy a kaputotan— saan a nagsusuon iti inanama ken segga ta narunot sa itan ti tornilio, saan laeng a limmukay, kadagiti ulo dagiti ngumanawngaw iti entablado, ti ammoda: maysa manen daytoy a pabuya nga isuda latta ti mapalpalakpakan, inaangaw a banag, matayto kano latta iti normal nga ipupusay ti pagam-amkan a pannakaungaw. Sakbay kadi a pagmuriotennak dagiti agur-uray laeng iti palakpak ken panangtangtangad, panagkurkurno wenno dalapusen ida daytoy ang-angawenda nga agkarkarayam a sipnget, aligagaw, ken aliaw… Bayat ti panagurayko, ganasek kadi laengen ti pitak nga umuli kadagiti kinursing a saka? wenno yalikakak latta ti umaddang nga agturong iti kanal, iti waig, iti karayan a mangbuggo iti sibubukel a bagi? Adda kadi ngata met iti pitak a kumpet daytoy di makita a banag a mangal-alia kadagiti pagilian, siudad, ili, ken uray purok ken sitio? Saan ngata a maparmek wenno agbain iti pitak dagiti pitakpitak a dapan nga agur-uray laeng iti nabalitokan a dawa? Wenno daytoyen ti panaguray iti pagpatinggaan? Ngem adda latta rason ti yaaddang, ti di pasimbalud iti aligagaw, iti am-ammangaw dagiti pasaw; ipintak latta iti kambas ti pakasaritaan ‘toy binulbulod nga anges ammok, addanto met maurayko, saan laeng a balitok a dawa, ngem bimmalitok a raya ti agsapa. Matenneb met ti bagi, ti kinatao iti panaguray nga addaan aligagaw— iti panagsubli iti nagtaudan. --JOBERT M. PACNIS *Pammadayaw a Gunggona, Salip iti Daniw 2020 ti GUMIL Oahu

Images:

© PressReader. All rights reserved.