Publication:

Bannawag - 2021-05-01

Data:

Pimmudno a Tagtagainep

Contents

Ni DIONISIO S. BULONG

NAPADASANYO kadin ti pimmudno ti tagtagainepna? Managtagainepkami. Kinapudnona, rinabii a kasta. No di nakakatkatawa, ‘tay nakabutbuteng ket makariingkami nga agkinkintayeg. Ngem adda dagiti panagtagtagainepmi a lukagennakami ti kaingungotmi – no kasdiay a makikabkabilkami. Kasano ngamin ket isu metten ti madissuanmi no dadduma. Sika la ti maymayaten, kunana met ket tamborenna metten ti tianmi! Di kad’ makariingkamin. Adda pay maysa a pagam-amkan dagiti kabbalayko a panagtagtagainepko—ti ibabangonko. No saanak a magna ket maidungparak iti kabinet wenno rikep ti siledmi, matnagak iti kama ket makapuotto laengen ti kaingungotmi no mangngegna ti panagasugmi. Adda pay daydi pannakatnagmi a bulan ti napalabas sa namunawan dagiti patong ken sikomi. Ngem naidumduma ti natagtagainepmi idi apagtapog ti napalabas a tawen. Manipud idi nagretirokami nga agkaingungot, Disiembre pay laeng, nakaaramiden dagiti annakmi iti iskediul ti panangpasiarmi iti sumagmamano a lugar a pangay-ayoda ngata kadakami tapno dikam’ nakamisuot a nakakulong iti balay. Ngem idi maideklarar ti lockdown gapu iti panagwaras ti angol a COVID-19, amin a plano iti panagpasiar, na-lockdown met. Kinapudnona, nakaam-amak payen ti umallatiw iti kaarruba, aglalo kadakami iti Quezon City. Kadakami a senior citizen high a kas awagda kadagiti dandanin agtawen iti otsenta, makautoy ti panagtulid ti oras nga arubayan lattan ti pagpuspusiposan. Naimbag ketdi ta adda selpon a pakiinnistoriaan kadagiti am-ammo ken kakaarruba a saanen a nasken pay ti agabungot. Gapu ngata iti iliwmin a makaaliwaksay, natagtagainepmi iti maysa a rabiii a rimmuarkami a sangapamilia tapno aglalangoy iti maysa a resort. Kampay idi, ni Loi, ti buridekmi, ti makaammo iti lugar. Nakitana kano daytoy iti FB ket napintas ti lugar a masarakan iti ruar ti Metro Manila. Adda swimming pool ken nalamiis ti lugar ta adu ti narangpaya a pinuon. Apagisu kadakami nga innem nga agkakabbalay ti luganmi. Ni Loi ti nagmaneho. Nagpaamianankami kano iti Sta. Rita (Bulacan). Idi kuan, sursurotenmin ti nakipet a kalsada. Babassit, ngem naurnos dagiti balay iti agsumbangir a sikigan ti kalsada. Agsabsabong dagiti masetas kadagiti arubayanda. Ngem insardeng ni Loi ti lugan idi makadanonkami iti maysa a nagkurosan a kasla letra V ti panagsanga ti kalsada. Nailabestayon sa. Agsublitayo, kinunana. Insardeng manen ni Loi lugan idi makadanonkami iti maysa kadagiti nagkurosan a nalabsanmi idi sumrekkami. Ditoy gayam, kinunana a bulonna a nagsikko iti kanigid. Sumalog ti nakipet a kalsada a mangtupar iti nakarikep a dakkel a ruangan nga ipagarupmi a pagserkan ti resort. No apay ketdi ta naipigket ti panagkitami iti agsangapulo ket lima kadapan ngata ti kangatona a nalidem a bumerde a pader iti lauden ti dua-kadsaaran a pasdek iti uneg ti bakud ti resort. Nalitem met a bumerde ti pintura ti diding ti pasdek ti resort, a kas iti diding ti pasdek iti ballasiw ti pader. Naputed dita ti tagainepmi ta nagwasang ti kaingungotmi ket nasikona ti mugingmi. NALIPATANMIN ti tagtagainepmi idi madanon ti panagkasangay ni Alyssa, inauna nga apokomi, idi Pebrero 12. Plano gayam dagiti annakmi a rummuarkami tapno agbaliw met ti makitkita iti aglawlaw. Mabalinen ti agpasiar ta limmukay bassit dagiti pagannurotan. Agpasiartayo idiay Hagonoy (Bulacan). Overnight, kinuna ni Loi. Amammona ti anak ti akinkukua. Nagam-ammoda idi agbasbasa pay laeng iti kolehio. Nakayamankami. Kamaudiananna, makaruarkami met laengen. Agasem ti sangapulo a bulan a pannakaipupok iti balay? Wen, nakaruarkami met naminsan idi leppas ti kasangaymi iti napalabas a Mars 2020, ngem anian ta ospital met ti nagtarusanmi gapu iti pulmonia ken mild heart attack. Nagluaskami iti Novaliches a yan ti pagtaenganmi iti alas nuebe iti agsapa. Alas dies, simiasikamin iti NLEX ket simrekkami iti Pulilan Exit. Nakipet ti kalsada. Pagpiaanna, sagsaggaysa ti masabat ken masarunomi, gapu ngata iti lockdown. Ken malinglingayka kadagiti malabsam a buya. Naipaunor ngamin iti agsumbangir a sikigan ti kalsada dagiti paglakuan kadagiti agkakapintas a masetas. Ngem idi makadanonkami iti agpakanigid a sumalog a kalsada a dalan a mapan iti resort, nagdeppa ti dakkel a karatula a nasuratan iti No Left Turn. Inwarasmi ti panagkitami tapno agsaludsodkami iti mabalin a serkanmi a mapan iti destinasionmi, ngem kasla agdardaras amin dagiti magmagna a manglabas kadakami. Dimi man ammo, ngem inalusiiskami. Intuloymi nga inunor ti nakipet a kalsada. Agtungpal gayam ti un-unorenmi a dalan iti dakkel a kalsada. Agsasallupang dagiti lugan. Adda traffic light iti tengnga ken maysa a traffic aide. Nagpakanigidkami. Ad-addan ti sikormi idi madlawmi nga agsubli manen ti direksionmi. Saan a mabayag, naginayad ni Loi. Sakbay a makapagsaludsodkami, nakitamin ti karatula iti masungad a kanto. Sinurotmi ti agpakanawan a sumalog a kalsada ti barangay. Saan a mabayag, naipasabaten iti panagkitami ti dakkel a karatula ti resort iti ngatuen ti dakkel a ruangan. Dua-kadsaaran a marantiddog a nakatibtibker ken nakangayngayed a pasdek ti nangsabat iti panagkitami idi makastrekkami iti ikub ti resort. Nalamiis ken naulimek—’tay lamiis ken ulimek a mangpainana kenka no aggapuka iti naariwawa a lugar. Ngem gapu ngatan iti edad, nakariknakami iti kettang. Isu nga idi maidalimanekmi dagiti gargaretmi iti kuartomi iti umuna a kadsaaran, inyiladmi tapno maungaran dagiti susuopmi. Saan metten a nagpabatubat dagiti ubbing, a nagtarus iti maikadua a kuarto. Madamdama, mangngegmin ti katkatawa ket pisawda iti dakkel a swimming pool iti likud. Saan metten a nakateppel ni kaingungot. Madamdama, rimbawan payen ti killiitna ti ariangga dagiti ubbing ken dagiti simmurot a kakaanakanmi. Agalas onsen idi yayab dagiti kakaduami ti panangkantami iti apokomi a ni Alyssa iti panangrambakna iti maikasangapulo ken innem a kasangayna. Idi rummuarkami, nakasaganan ti cake ken pangaldawmi iti marantiddog a lamisaan iti kiosko iti kanigid nga uluanan ti dakkel a swimming pool. Ngem iti panangipalawlawko iti panagkitak, kasla nasulekak idi makitak ti diding ti natayag a pasdek iti ballasiw ti pader ti resort. Kasla saan a kabarbaro kaniak ti disenio ti pasdek kasta met ti kolor ti pinturana. Uray ti kinatayag ken pintura ti pader saan a kabarbaro iti panagkitak. Diak ammo, ngem inalusiisak. Dagaangenak ngem nalamiis met ti pul-oy. Naimbag ta timmakdangen dagiti agdidigos. Kantaanmi kanon ni Alyssa sakbay a mangaldawkami. Intuloy dagiti kakaduami ti naglang-ay idi makapangaldawkami. Saanda a mapanawan ti swimming pool. Nagkutimermer ni kaingungot ket timmakdang met laeng. Pinasiarmi ti lugar a binarikesan ti sementado a dalan a pagbisbisikletaan dagiti ubbing. Uppat dagiti kangrunaan a pasdek a tallo kadagitoy ti sagdudua kadsaaran. Bunggalo ti maysa a naipatugaw iti kasla isla iti tengnga ti dan-aw a pagpispisawan dagiti lames. Adda dua a dadakkel a dan-aw iti ikub ti 2.5 nga ektaria a resort. Napupokan dagitoy iti rasa, pasayan, tilapia, ken bangus. Iti ruar ti resort, adda pay uppat a babbabassit a pagpupokan iti lames. Namulaan pay dagitoy iti mangga, guayabano ken abokado. Adda iti kanigid a paset ti ikub ti dua a pasdek. Maus-usar ti arubayan ti akinkanigid a pakaangayan ti pasken wenno pagwatwatan a kas iti zumba. Nayaw-awanmi ti karkarna a dukot a marikriknami iti panagpagnapagnami. Ngem idi addakami manen iti kiosko, nagtibbayokami iti nakitami. Ti pasdek iti ballasiw ti pader ti resort – ti pinturana, ti nangato a pader ken ti pingir ti pasdek ti resort! Wen, dagiti nakitak iti nariingak a tagtagainepko manon a bulan ti napalabas! Ngem inkeddengmi a bukodanmi pay laeng ti nakitami . Nagadu ketdi a saludsod ti immapay kadakami. Saankami a nalpaan idi maturogkami? Gapu iti gagarmi nga agaliwaksay? Nakapangrabiikamin idi istoriaek ti padasko. Ngem imbes nga agkomento ni kaingungot ken dagiti annakmi, kinunada: agpalpaka pay sakanto maturog! Nalpaanak metten iti kunak. Ngem idi tumengnga ngatan ti rabii, nawagwag ti abagak. Apounayka a laklakayanen! Linipaknak manen ni kaingungot! Agligsay ngatan ti rabii idi lukagennak met ni Loi. Papa, makiapapaka manen, kinunana. Agalas tres san iti parbangon idi makapuotak. Idurdurogannak ni kaingungot. Matnagakon! Katkatawaam, aya? insinggitna a bulonna a nagkukot a nangtallikud kaniak. Anian, nakunak laengen iti unegko a bulonko a naginat. Maysa a rabii, tallo manen a tagtagainep! Ket bimmangonakon. Mandiakon. Amangan no ania pay ti mainayon a matagtagainepko. Mabalin nga adda met dagiti kas kaniak a managtagtagainep. Nasayaat laeng no ditay mabatibat! GAPU iti “pimmudno” a tagtagainepko, pinadasko a sinukisok no ania ti kakastoy a tagtagainep. Maibatay iti palawag dagiti sikologo a mangad-adal iti tayak ti tagtagainep, ti awag iti daytoy “pimmudno” a tagtagainepko, kas pannakaawatko, ket “predictive dream” no di man “precognitive dream.” Pudno kano a mapaspasamak daytoy. Kunada a mabalin a mapasamak ti natagtagainep no sakbayna, isu ti masansan a pampanunoten a kas iti napasamak kaniak. Mabalin met a di pampanunoten ngem maamirismonto lattan a ti natagtagainepmo, mapaspasamak metten iti pudno a biag. Pudno a nakakaskasdaaw ti utek nga isu ti arigna mangay-ayam no di man mangliwliwa kadatayo bayat ti pannaturogtayo babaen dagiti tagtagainep. Kinapudnona, agingga ita, di pay unay mailawlawag ti siensia no kasano a talaga ti panagtrabaho ti utek. Daytoy met ti gapuna nga agingga ita, adda pay laeng dagiti komperensia a maang-angay tapno mapagsasaritaan ti kinadatdatlag ti utek bareng malawlawagan no kasano a talaga ti panagtrabaho ti utek.—O

Images:

© PressReader. All rights reserved.