Publication:

Bannawag - 2021-05-01

Data:

Panangpaksiat Kadagiti Timel

Miks & Tiks

Ni FRANCISCO S. ANTONIO

URAY no awan ti mapaliiw a timel a nangkapet kadagiti taraken nga aso, pagammuan ta agkudkod lattan dagiti ayup a no amirisen, adda dagiti pagilasinan a maigapu iti daytoy a peste. Mabalin a naisangpet daytoy a peste no maipasiar dagiti taraken wenno makikulangtotda kadagiti sabsabali nga ibbet nga aso. Numona pay met ta no umadu dagiti timel kadagiti ayup, mairamraman nga atakarenda dagiti dadduma a taraken iti pagtaengan ken uray pay dagiti mismo a bumalay. Adu dagiti epektibo a komersial wenno kemikal a pangpaksiat kadagitoy nga insekto ngem adda dagiti peggad nga ipaayda iti salun-at. Nupay kasta, adda dagiti natural ken natalged a pamuspusan nga adda laeng iti asideg wenno masarakan iti uneg ti pagtaengan. Maibilang kadagiti epektibo a makapaksiat kadagiti timel a kimpet kadagiti ayup ken simrek iti solar ken iti uneg ti balay ti asin ken baking soda. Mapaglaok dagitoy a ramen iti agpada a kaadu sa malaokan iti danum. Maipasuyot daytoy iti bagi ti ayup a pagtaltalinaedan dagiti timel. No iti arubayan ken dadduma a paset ti balay ti yan dagiti timel, mabalin a paglaoken lattan ti asin ken baking soda a saanen a laokan pay iti danum. Maiwarakiwak daytoy iti alpombra, muebles ken sadino man a pagdakdakiwasan dagiti timel. Bay-an daytoy iti agpatnag sakbay a kaykayan wenno agaramat iti aspirador (vacuum cleaner) a pangsultop kadagitoy. Patayen wnno ibelleng iti ruar no adda pay laeng nabati a sibibiag a timel. No mapaliiw nga adda pay laeng dagiti sibibiag a timel kalpasan daytoy a panangpaksiat kadagiti insekto, uliten daytoy a proseso tunggal tallo agingga iti uppat nga aldaw. Sakbay a rugian ti panangpaksiat kadagiti timel babaen ti asin ken baking soda, dalusan a naimbag ti pagtaengan agraman dagiti muebles. Labaan pay dagiti nasken a malabaan agraman dagiti pagid-iddaan dagiti taraken nga ayup. Agaramat iti napudot a danum tapno madilnakan dagiti gamigam sakbay a labaan. Mabalin pay nga aramaten ti puraw a suka wenno rubbing alcohol a pangpaksiat kadagiti timel. Mayisprey wenno maisapsapo dagitoy iti kudil ti ayup. Nupay kasta, ti pay laeng panagdaldalus ti kasasamayan a panangtiped iti kaadda dagiti timel kadagiti ayup, iti arubayan, ken iti uneg ti pagtaengan.—O

Images:

© PressReader. All rights reserved.