Publication:

Bannawag - 2021-05-01

Data:

Badona a Nagay-ayam, Badona a Maturog?

Miks & Tiks

Ni JONALIZA P. CABISARES

ADU nga ubbing ti masadut wenno saanen nga agsuksukat iti kawes nga inusarda a napan nagay-ayam no mapanda maturog iti rabii. Kalpasan ti pangrabii, agtartarusda lattan a mapan maturog uray no saanda pay nagdigos wenno nagdiram-os la koma. Saan koma nga ipalubos dagiti inna daytoy a galad dagiti ubbing. Nasken a nadalus ti bagi dagiti ubbing sakbay ti pannaturogda ken nasken pay a komportable ti kawes a pagturogda. Kas met laeng iti panagaramat iti maitutop a pagan-anay kadagiti nagduduma nga aramid iti aldaw, napateg met ti panagaramat iti umisu a kawes iti pannaturog iti rabii. Dakdakamaten dagiti eksperto nga apektaran ti kalidad ti turog ken kadagupan ti salun-at dagiti ubbing ti panagaramat iti komportable a kawes no maturogda. Kayatna a sawen a saan laeng a ti panangipauneg iti nasustansia a taraon, panagwatwat ken estilo ti panagbiag ti pagbasbasaran iti pannakataginayon ti salun-at. Mairaman iti panangtaginayon ti nasiken a rikna ti komportble a pannaturog. Adu dagiti komportable a kawes a mabalin nga aramaten dagiti ubbing a maturog. Mairaman ditoy ti panagaramat iti padiama. Adu a sientista ti mangibalbalakad iti pannaturog a lamolamo. Uray no kasta, adu met dagiti mangsupsupiat iti daytoy a singasing. Ti napateg, komportable ti asino man kabayatan ti pannaturogna. Adda dagiti mangipatpatigmaan nga iruam dgiti ubbing nga agaramat iti padiama iti pannaturogda. Pagtalinaeden ngamin daytoy ti bara ti bagi no nalam-ek. Abbonganna dagiti saka ken salaknibanna ti bagi iti lamiis iti agpatnag. Ikabassit pay ti padiama ti risgo manipud iti panateng dagiti ubbing ken dadduma pay a sakit. Mabalin met ti ules a pangsalaknib ti bagi iti lamiis ngem ad-adda nga epektibo ti panagaramat iti padiama. No mayadayo ti ules wenno guyoden ti kaabay dagiti ubbing a maturog, adda latta pangsalaknib ti bagida iti lamiis no agaramatda iti padiama. Mabalin met nga agpadiama dagiti ubbing a maturog ngem ikkan latta ida iti ulesda. No komportable ti pannaturog, mapabaro ti pigsa a kasapulan iti sumaruno nga aldaw. Paset ti pannakapabaro ti pigsa ti pannakaikkat dagiti natay a selula iti kudil. Adda pay dagiti mikrobio a kimpet kadagiti natay a selula a mairaman a maikkat no naulimek ti pannaturog. Adu ti di mangikankano iti kinapateg ti naimas a pannaturog. Ngem no saan nga ikaskaso daytoy, agtungpal daytoy iti nagduduma nga an-annayaen. Maibalbalakad ti panangpili iti mayannatup a pagan-anay dagiti ubbing iti pannaturogda. Masapul pay nga itutop dagitoy pagturog a kawes iti disso a pagturoganda ken iti agdama a paniempo. Saan a pagaramaten dagiti ubbing iti napuskol a kawes no nadagaang tapno saanda nga agkaling-etan no maturogda. Mangsinga met daytoy iti kinatalinaay ti panaginanada.

Images:

© PressReader. All rights reserved.