Publication:

Bannawag - 2021-05-01

Data:

Ti Puga (29)

Miks & Tiks

Norberto D. Bumanglag, Jr.

Ti Napalabas: Nakipagkita ni Archie Castillano ken ni Mr.. Aleksandr. Nakursonadaan ni Archie ni Anichka a kadua ti klientena ket immannugot laeng a mangipuslit iti kargamento ni Mr.. Aleksandr nomayat a tagikuaenna ni Anichka. Inawagan ni John ni Agent Fleming. Idi saan nga umannugot ni John iti kayatna, pinaltogan ni Agent Fleming ti luppo ni Rudy. Napan da Ronnie ken Archie Castillano iti hotel a pagsarakanda ken Anichka. Ngem nagkigtotda idi ilukatda ti ridaw ta paltog ti nangpasangbay kadakuada. Natay dagiti dadduma a taona ngem natiliwda ti Mehikano a pimmaltog kadakuada, ken nagbalaw idi malagipna ni Anichka. Inarayatda ti babai a naudatal iti igid ti kama, ngem saanen a nagmulagat daytoy. Dinarup metten da John ti sisiimenda a safehouse. N(Maika-29 a Paset) ABAWBAWAN ti ulo ti Mehikano. Nagparsiak ti dara daytoy iti rupa ken kawes ni Archie Castillano. Nakamulaggat a natublak iti karpet. Dinagdagus ti maysa kadagiti security detail ti nangyawat iti tualia ken ni Archie Castillano. Sabali pay a detail ti nangtulong a manguksob iti coat-na. Inyawat ni Archie Castillano ti paltog ken ni Ronnie. “Ladingitek ti napasamak, sir,” kinuna ni Ronnie. “Basolko ti amin.” Pinunasan ni Archie Castillano ti daradara a rupana agraman ti imana. Nagturong iti bangkay ni Anichka a nakaudatal pay laeng iti karpet. Nagwingiwing a nakakita iti lapsat daytoy. Miningminganna ti kasla lamolamo a bagi ti babai— nakarasrasay ti negligee daytoy ket maaragaagan ti nasippukel a pammagi ken nabaknang a barukongna. Napaanges iti nauneg. Nagrukob. Nadlaw dagiti security detail ti rantana nga aramiden ket inasitganda. Ngem inseniasna a bayabda. Binagkatna ti bangkay ni Anichka. Imparabawna iti kama. Inyarpawna ti comforter iti daytoy. “Ronnie, llama al Señor Aleksandr,” imbilinna. Kayatna nga awaganda ni Mr. Aleksandr. “Si, señor,” insungbat ni Ronnie. Inruarna ti selponna ket inawaganna ni Mr. Aleksandr. “Hello,” insungbat a dagus ni Mr. Aleksandr. “Hello, sir... Mr. Castillano wanted to talk to you...” “Okay...” Immasideg ni Ronnie ken ni Archie Castillano. Intedna ti selpon. Kinita ti boss-na apaman a naawat daytoy ti selpon. Iti panagawatna iti langa daytoy, agsalsaludsod. Saan siguro a matinong ti boss-na ti ibagana. Kinutina laeng dagiti abagana. Inapput ni Archie Castillano ti mikropono ti selpon. Immanges iti nakaun-uneg, sa nakabusbuslon ti imbuangna nga angin a pangalay-ayna bassit iti riknana. Nabayag la daydi naudin a pannakariknana iti kastoy. Bassit pay la idi iti lubong a paggargarawanna. Ipagarupna no natenneben ket napukawnan ti amin a butengna. Ania ti ibagana ita iti Ukrainian? Naparasaw. Dina koma kayat, ngem nasken nga ibagana ti napasamak. “Mr. Aleksandr...” “What’s happening?” insungbat ti Ukrainian. “I’m sure you had a good time with Anichka...” Saan a nakasungbat ni Archie Castillano. “She is good in bed... the best,” innayon ni Mr. Aleksandr. “I’m sure she was... but, something wrong happened...” “Excuse me?” “Anichka is dead...” saanen a nagpalpalikaw ni Archie Castillano. “What? Son of a bitch... I’m going to kill you!” Uray la a natitileng ni Archie Castillano iti nakapigpigsa a bugkaw ni Mr. Aleksandr. Inyadayona ti selpon iti lapayagna, ngem nangngegna latta ti sasawen ni Mr. Aleksandr. “I’m going to kill you son of a bitch!” SAAN a maisina ni Agent Fleming dagiti matana iti monitor a pangbuybuyaanna iti bimtak a lugan iti likudan ti safehouse a yanda. Maur-uramen daytoy ken addan dagiti taona a mangkitkita no ania ti napasamak. Dagiti laeng taona ti adda. Nakaiggem dagiti dadduma iti fire extinguisher ket paspasuyotanda ti maur-uram a lugan. Alisto dagiti garawda. Masapul a madepdepda ti apuy sakbay a dumteng dagiti bombero. Ammona a dumteng dagiti pannakabagi ti linteg gapu iti kanalbuong. Agimbestigarda. Amangan no mairamanda a pagsaludsodan dagiti pannakabagi ti linteg. Dina kayat a mapasamak dayta. Imbilinna iti teknisian ti panangi-zoom-na iti aglawlaw ti maur-uram a lugan. Impakanigid nga impakanawan ti teknisian ti naka-zoom a kamera. Pinadalananna ti aglawlaw. Awan makitada a naidumduma. Awan uray anniniwan la koma ti nayaw-awan a ganggannaet. “Sir, you have to look at this,” insinga ti maysa pay a teknisian. Tinangad ni Agent Fleming dagiti monitor nga itudtudo ti taona. Napukawda ti video dagiti sumagmamano a monitor. Nangisit dagiti monitor. “Ania ti problema?” sinaludsodna nupay sabalin ti agparparikna kenkuana. “Saan a technical, sir...” “Ket ania ngarud? Ania ti location dagiti kamera?” “Sango, sir...” Uray la a nagriaw ti Agent Fleming iti panagrasawna. Napagsasaipnan dagiti pasamak. Adda bimtak iti likud tapno agturong dagiti taona sadiay. Mabaybay-an iti sango ket nawayan ti asino man a mangaramid iti ania man a panggepna sadiay. Saanen a maputpot ti panagrasrasawna. Tangtangaden lattan dagiti dua a teknisian— a nakaamiris metten iti mabalin a napasamak. “Kontakem dagiti kakaduatayo iti guard shack,” imbilin ni Agent Fleming iti maysa kadagiti teknisian. “Foxtrot to Alpha... Foxtrot to Alpha, can you hear me, over...” Rarek laeng ti radio ti nangngegda. Ad-addan ti pannakataranta ni Agent Fleming. Nakemkemna dagiti sangina. Sa nayesngawna: “John is here.” Kasla kamkamatenen ni Agent Flemning ti angesna. Naidumduman ti pannakariribukna. Saan a managdanag. Saan a managbuteng. Awan man laeng ti amakna uray no addada iti peggad. Ngem apay a no ammona a ni John ti makasangdona, kasla agkullayaw. Mariknanan ti apagdillaw a panagtigergerna. Gapu ngata kadagiti nadamdamagnan a nagapuanan ni John? Gapu ngata ta iti namin-anon a daras a ginandatda a papatayen, saan a pulos a nagballigi? Sa adun ti impakni ni John kadagiti taona! Asino daytoy a John Villa? Adda kadi gingginammolna? “F__k! nayesngawna manen. Ngem saanen nga inkaso dagiti teknisian a kasangsangona ta madlaw metten ti danagda ken makumikomdan a mangmonmonitor iti aglawlaw. “Sir, kitaem daytoy...” kinuna manen ti maysa kadagiti teknisian. Maruroden iti ania man nga ibaga dagiti teknisian. Nupay kasta, kinitana ti monitor. Iti uneg ti guard shack, naikuadro ti ladawan ti taona a nakatugaw, nakatangad iti bobeda ken agay-ayus pay laeng ti dara iti nagetgetan a tengngedna. Dinanogna ti lamisaan. Talaga nga adda ditoy ni John Villa! Umayna alaen ni Rudy Agnes! Nagtaray. “We are under attack! We are under attack!” impukkawna. “Get up and get ready!” Nagkaribuso dagiti taona a rimmuar kadagiti kuartoda. Uray dagiti matmaturog, nagriingda a nagsagana. Nagdardaras met ni Agent Fleming a nagturong iti kuarto a nakaipupokan ni Rudy. Adda tallo a mangbambantay iti daytoy. “Salaknibanyo daytoy a tao,” kinuna ni Agent Fleming nga agal-al-al. “Nasken nga awan ti makaala kenkuana a sabali. Bantayanyo a kas iti panangsaluadyo iti bukodyo a biag ta no mapukaw iti imatangyo, papatayenkayo amin! Nalawag?” Nagtung-ed dagiti tallo sa agarup naggigiddanda a nagkuna: “Yes, sir!” “I’ll close this door... And no one is gonna open this door. Anyone who knocks, anyone who tries to turn on the knob, shoot! Do you understand?” “Yes, sir,” insungbat manen dagiti tallo. In-lock ni Agent Fleming ti ridaw. Kinitana ti pasilio. Agtartarayen dagiti taona nga agturong iti ridaw iti sango. Nakasaganan dagitoy a makiranget iti asino man nga aggandat a mangserrek kadakuada. Napaisem met laengen ni Agent Fleming. Iti kinasayaat ti puesto dagiti taona, awanen ti liklik ni John— no ni John man ti nangraut kadakuada. Kellaat a naitukeng. Agmaymaysa ngata ni John? Wenno kaduana ni Agent Stewart? Ngem uray pay tallo wenno uppat ti mangraut kadakuada, saanda a makalisi kadagiti taona. Matay itan da John Villa ken Craig Stewart. Saan kadi nga isu ti misionda? Ti mangipakni kadagiti dua? Maragsakanto la ketdi ni Deputy Hutchison. “Foxtrot to Bravo... Foxtrot to Bravo, do you copy?” inradiona. “Copy Foxtrot...” “We are under attack at the front... Proceed to the front gate, Bravo...” “That’s 10-4, Foxtrot... We are on our way...” Nagtaray ni Agent Fleming a nagsubli iti surveillance room. Tinangadna dagiti monitor. Nangisit pay laeng dagiti dadduma. Siguradona a pinagkidem ni John dagiti kamera. “Status, gentlemen?” sinaludsodna kadagiti teknisian. Ngem saan pay a nakasungbat dagiti teknisian, kellaat a nagiddep dagiti silaw. Sinallukoban ida ti sipnget. Pulos nga awan ti paggapuan ti lawag malaksid kadagiti kompiuter ken monitor nga addaan iti siam nga oras nga emergency power battery back-up. “What happened?” Impuligos ni Agent Fleming ti panagkitana. “Ain’t we supposed to have an automatic emergency generator that automatically comes on in case of power outage?” “We are supposed to have that, sir,” insungbat ti maysa kadagiti teknisian. Innalana ti flashlight a nakasagana nga usarenda no adda emerhensia a kas itoy. Nagturong iti kasla bassit a kabinet iti diding. Linukatanna daytoy. Sinilawanna ti uneg daytoy. “Naka-on met...” kinunana. In-off-na sa met laeng in-on-na. Ngem saan a nagandar ti generator. Naparasaw manen ni Agent Fleming. Dinarup manen daytay danag a simken kenkuana itay. Ngem nakarkaron. Nagriaw iti pempennekna ngem linemmes laeng ti nakapigpigsa a panagbettak iti dina ammo a paset ti safehouse. “EBAT! Ebat!” ingarngariet ni Mr. Aleksandr bayat ti yaasidegna iti bangkay ni Anichka. Dina mababa ti pungtotna. Aglalon idi makaasideg ken mamingminganna a naimbag ti babai. Ngumarngaretnget, intallikudna ti nagwagteng sa rinamasna ti rupana a saanen a mailawlawag ti langana. Miningminganna manen ti bangkay. Agbarbaragsot, um-umkis ti kaungganna. Umap-apuy dagiti matana. Mangemkemkem. Immadayo. Sa nagpusipos. Nagturong iti sango ni Archie Castillano. Adda iti abay ni Archie Castillano ni Ronnie a nakaiggem iti paltog. No ania man ti aramiden ni Mr. Aleksandr, nakasagana a mangpapatay iti daytoy a Ukrainian. Dayta ti bilin kenkuana ti boss-na. Kamkamaten ni Mr.Aleksandr ti angesna a nagsaludsod. “What happened again?” “Simrek ni Anichka iti hotel a kaduana daydiay,” intudo ni Archie Castillano ti Mehikano a tiniliwda. “Sika kano ti nangibilin a kaduaenna agingga iti hotel. Namatikami...” Naklaat ni Ronnie. Saan a pudno ti ibagbaga ti bossna. Pinaludipanna daytoy. Nagsabat dagiti panagkitada. Nagkinnaawatanda. “Iti maysa a Mehikano?” Tinalliaw ni Mr. Aleksandr ti Mehikano. “How the hell do I send a Mexican to accompany Anichka?” “Dayta ti imbaga ni Anichka, Mr. Aleksandr. Ngem naallilawkami. Hostage-na gayam ni Anichka ket napilitan a nagpammarang. I am really the intended target...” “Asino ti nangbilin?” “Panagkunak, ammok... ngem diak pay sigurado...” Immasideg ni Mr. Aleksandr ken ni Ronnie. “Mabalin a bulodek ti paltogmo?” Napamulagat ni Ronnie, saanna nga inyawat ti paltog nga iggemna. Kinitana ketdi ni Archie Castillano. Ur urayenna ti pammalubos daytoy. Nagtung-ed ni Archie Castillano. Inyawat ni Ronnie ti paltog ken ni Mr. Aleksandr. Bitbit ti Ukrainian ti paltog nga addaan iti silencer, nagturong iti nakaposas a Mehikano a nakatugaw iti maysa a suli. Simmaruno da Ronnie ken Archie Castillano. Nagabayda. “Nakappapati met laeng ti imbagak?” inyarasaas ni Archie Castillano. Nagtung-ed ni Ronnie. “We are off the hook, boss. Brilliant!” Agpadada nga immisem. “This is the guy?” sinaludsod ni Mr. Aleksandr. “Yes,” insungbat ni Archie Castillano. “Do you know me?” kinuna ni Mr. Aleksandr iti Mehikano a baludda. Ginammatanna ti timid daytoy, pinisitna agingga iti nasaktan ti Mehikano sa pinatangadna daytoy. “Am-ammonak?” inulitna a sinaludsod. Ngem saan a naguni ti Mehikano. Blangko ketdi dagiti matana a nangmulagat ken ni Mr. Aleksandr. “Maawatanna ti Ingles?” inlingay ni Mr. Alekksandr ken ni Archie Castillano. “Perfectly well,” insungbat ni Archie Castillano. “Sa dimo kayat ti sumungbat? Apay a pinataymo ni Anichka. Asino ti nangbilin kenka?” Saan latta a simmungbat ti Mehikano. Ad-addan ti suron ni Mr. Aleksandr. Impaturongna ti paltog iti daytoy. Inkasana. “Sungbatannak wenno sann? Asino ti nangbilin kenka?” Ngem kaskasdi a saan a simmungbat ti Mehikano. Kamkamatenen ni Mr. Aleksandr ti angesna iti napalaus a pungtotna. Agtigtigerger dagiti ramayna a nangkalbit iti gatilio. Nalsok ti tumeng ti Mehikano. Nakapigpigsa ti riaw ken ungor daytoy. Nangala iti tualia ni Ronnie. Sinelselanna ti ngiwat ti Mehikano tapno awan ti makangngeg iti riaw daytoy. Agtirtiritir iti sakit sa nagpatangkenanna a kinagat ti tualia a naipelpel kenkuana. Nagparintumeng ni Ronnie iti abay ti Mehikano. Iniggamanna ti nalsok a tumeng daytoy. Intalmegna. Adaddan ti riaw ken panagtiritir daytoy. “Dumngegka,” kinuna ni Ronnie. “Padpadasendaka a tulongan... bareng saandaka nga uloyan. Ngem natangkenka. Dimon urayen a ni Mr. Aleksandr ti agsalsaludsod kenka. Narungrungsot ngem dakami. Nadangdangkok. Saanna a kailalaan ti biag no saanna a maala ti kayatna... Maawatannak?” “Puta!” imbikag ketdi ti Mehikano. Tinupraanna ni Ronnie. Napakidem ni Ronnie. Impunasna ti daradara a dakulapna iti rupana. Timmakder. Sipapardas ti maysa kadagiti taona a security ti nangyawat iti tualia. Impunasna a dagus iti rupana. Kalpasanna, kinitana ti Mehikano a nakatangad kenkuana. Uray la a nangurat ti pispisna iti panagpigsana a nangkugtar iti tumeng daytoy. Nagrittuok ti tumeng ti lalaki. Nagligasi ti tulangna iti nagsuopan ti tumengna. Ti langen lasag ken kudilna ti namagsilpo iti sakana. Nagtiritir iti sakit. Medmedmedanna ti asugna. “He’s all yours, Mr. Alksandr...” kinuna ni Ronnie. Immabay iti bossna. “Panagkunak, saanna nga ibaga ti pudno, boss...” inyarasaasna. Immasideg manen ni Mr. Aleksandr iti Mehikano. “Ibagam kadin no asino ti nangibaon kenka?” sinaludsodna. Saan a nagtimek ti Mehikano. “Tulengka kadi? Asino ti nangbilin kenka?” Dandanin bumtak ti pungtot ni Mr. Aleksandr. “Asino ti ipapanmo a nangibaon kenkuana?” sinaludsod ni Archie Castillano ken ni Ronnie. “Ni Roberto Guerrero, sir,” nakataltalek ni Ronnie a nagkuna. “On the order of El Capitan...” innayon ni Archie Castillano. “Panagkunak, panawenen a rautentayo ni Roberto Guerrero, sir... He is getting bold every day. Saanen a mabuteng...” “Naipakumit daytan ken ni Miss Davis, saan kadi?” kinuna ni Archie Castillano a kasla saanna a nangngeg ti panangririaw ni Mr. Aleksandr iti Mehikano ken ti nagsasaruno nga uppat nga uni ti paltog. Ngem liningayna dagiti dua. Nakadalutaytayen ti Mehikano iti tugaw. Nadigos iti bukodna a dara. Saanen nga agkutkuti. Inyawat ni Mr. Aleksandr ti paltog ken ni Archie Castillano. “Pakaammuannak no maammuanyo no asino ti nangbilin... Tulongandaka dagiti taok a mangpapatay,” kinunana. “We’ll take care of it, Mr. Aleksandr. Agbayad ti asino man a nangbilin iti dayta a tao.” “Talkenka iti dayta,” kinuna ni Mr.Aleksandr. “And I wanted a decent burial for Anichka...” “We’ll do it, Mr. Aleksandr.” “Do you want another Ukrainian girl to entertain you, Mr. Castillano? I’ll send you another one...” Immisem ni Archie Castillano. “That’s okay, Mr. Aleksandr. Thanks for the offer. But we have things to do.” “And the deal is still on, right?” “Definitely.” “My men and the cargo will be ready in about a week.” “Nakasaganakami nga agnanayon.” “Good... and I have to go.” “I’ll have two of my men to accompany you up to the garage.” Timmallikud ni Mr.Aleksandr. Binayabay ti dua a security detail. Inasitgan ti maysa a security detail ni Archie Castillano. Maysa a selpon ti inyawatna. “Naalami iti bolsa ti Mehikano, sir,” kinuna ti security detail. Nagkinnita da Archie Castillano ken Ronnie a nangawat iti selpon. Miningmingan ni Ronnie ti selpon. Impadalanna ti ramayna iti screen daytoy. Nagsilaw. Kinitana ti kaudian a numero a naawagan. Tinalmeganna ti numero. Kayatna a maammuan no asino ti naudi a kinasarita ti Mehikano. NAKAIGGEM ni Roberto Guerrero iti baso a naglaon iti arak. Nakatugaw iti lamisaanna. Simmimsim iti arak. Kasla pumait pay ketdi iti panagramanna. Awan ti ganasna nga uminum. Sangkataliawna ti selpon a nakadisso laeng iti abayna. Ururayenna nga umawag ni Ramon. Kinitana ti relona. Agalas saisen. Dandanin agtangep ti sipnget. Iti sango ti balayna, madama nga agsagsagana dagiti taona para iti panagmimitingda kadagiti lider ti tunggal estado iti western area. Kinitana manen ti selpon. Magagaran unayen a mangur-uray iti napintas a damag: a natayen ni Archie Castillano, ti mortal a kabusorna iti lubongda a drug cartel. Isu laeng ti lappedda iti (Maituloy iti sumaruno a panid) mamimpinsan koman a panangkontrolda iti western area. Napudot kenkuana ti boss-da, ni El Capitan, gapu ta bassit laeng ti kontrolda a teritorio iti Western United States. Ket marisut laeng dayta a problemada no mapaipaknina ni Archie Castillano. Isu nga imbaonna ti kasisiglatan a killer-na. Madamdama pay, nagkuyegyeg ti selponna a kinagiddan ti panagsilawna. Nakaragragsak a nangpidut iti selpon. “Tell me he is dead,” kinunana a dagus. Simngat ti ulimek. “Say something. Natayen, saan kadi?” inulitna. “Gran error, Señor Guerrero. Sibibiagak pay laeng.” Naklaat ni Roberto Guerrero. Saan a nakasungbat. “Naklaatka? Wenno dimon malasin ti bosesko?” “Señor Archie Castillano?” Nagkatawa ti adda iti bangir a linia. “Exactamente, señor! And this is your biggest mistake, amigo.” NAKAPIGPIGSA ti sabuag ti bimtak a ridaw. Napisangpisang daytoy ket naisabuag. Ngem saanda pay a nakastrek, napasabatandan iti ranipak dagiti nabibileg nga armas manipud kadagiti adda iti uneg. Nagpidegda tallo iti agsumbangir a sikig ti ridaw. Sinukto ni John ti naka-pin nga stun grenade iti siketna. Inikkatna ti pin daytoy sa imbatona iti uneg. Kasta met ti inaramid ni Agent Stewart. Nagsaruno a bimtak dagiti impuruakda. Nakaasasuken iti uneg. Nagtalna ti panangpaltogda kadakuada. Insuotda dagiti night vision goggles-da ket nakalawlawagen a makitada iti uneg. Nakasiripda iti scope dagiti iggemda nga M-4, nagsasarunoda a simrek. Nakaudatal dagiti nakitada a naka-tactical gear a kabusorda. Agngarngariet pay laeng dagiti dadduma iti pannakatitilengda iti kanalbuong ti stun grenade. Kinugtaranda dagiti saan a nakasagana a makiranget tapno maawanan iti puot. Dagiti mangipaturong iti paltog kadakuada, paltoganda. “Check every room... and be very careful,” kinuna ni John. “And if you are in trouble, call... Do we understand each other? Charlie... Frank...” “Frank copy,” insungbat ni ASAC Donotelli. “Charlie, copy,” kinuna met ni Craig. “Remember, our main objective is to extract Rudy alive... papatayen wenno baldaduen ti asino man a manglapped kadatayo, copy?” “Copy that,” dandani naggiddan a simmungbat da Agent Stewart ken ASAC Donotelli. “Good luck, gentlemen... over and out...” Awan ti tao iti immuna a kuarto a sinerrek ni John ngem naannad latta ti pannagnana aglalo iti pasilio. Amangan no kellaat lattan nga adda agparang a kabusor iti sangona. Agingga iti nakadanon iti maysa pay a kuarto. Indennesna ti lapayagna iti diding. Nakataltalna iti uneg. Awan mangngegna a garaw. Iniggamanna ti seradura. Apagpuligosna, adda nagpukkaw. “Stay out of the door!” nakapigpigsa ti ikkis a naggapu iti uneg. Sinaruno dayta ti nagsasaruno a bala a limsot iti ridaw. (Maituloyto)

Images:

© PressReader. All rights reserved.