Publication:

Bannawag - 2021-05-01

Data:

Mabain Ta Baketen

Miks & Tiks

Ni EDEN L. CACHOLA-BULONG

Dear Ikit, Maysaak kadagiti immuna a nurse a nakadanon iti Amerika. Retiradoakon ken maysaakon a Fil-Am wenno American Citizen. Addaak ita ditoy Isabela a mangyaw-awan iti problemak ket apagisu la ketdin a napupokak ditoy gapu iti pandemia. Idi agtawenak iti 25, nakinobioak ti maysa nga Amerikano a doktor iti hospital a pagtrabahuak. Nakitana ti kanayon a panagpaw-itko iti gastuen dagiti kakabsatko nga agbasa. Napinget ti panangawisna iti panagkallaysami ngem saanak nga immannugot ta napatpateg ti panangpaadalko kadagiti kakabsatko ken ti panangtedko metten iti nam-ay dagiti nagannak kadakami. Saan ngamin nga ugali dagiti Amerikano ti tumulong kadagiti kakabagianda. Inuy-uyawna daytoy nga ugalitayo. Sangapulo a tawen a nagur-uray daytoy boyfriendko nga Amerikano ngem manmano nga agkitakami gapu iti panagserbik ti dua nga ospital tapno nawadwad laeng ti maipaw-itko ditoy Filipinas. Inyawawanko ti awisna a panagkasarmi. “Crazy!” Dayta ti naudi a balikasna kaniak ket saanen a nagpakpakita. Nadamagko laengen nga adda iti sabali nga estado ti Amerika. Diak narikna unay ti saem ti ipapanawna gapu iti itutulongko kadagiti kakabsatko ken nagannak kadakami. Nasayaaten ti panagbiag dagiti natulongak. Pimmusay metten dagiti nagannak kadakami. Agmaymaysaakon nga agbibiag idiay Amerika ta addaan metten bukod a biag dagiti kakaanakak ken kakabsatko a napetisionak. Nariknak ti kinakawaw ti biagko. Nasursurok ti ag-Facebook. No apay ketdi a binirokko ti nagan ti dati a boyfriendko iti Facebook idi 2019. In-friend-ko. Inawatna a dagus. Nagsubli ti singedmi babaen ti Facebook agingga idi immaynak sinarungkaran iti bukodko a pagtaengan idiay Georgia, USA. Retirado metten ngem Consultant iti nadumaduma nga ospital. Desidido nga agkasarkamin. Saan gayam a nakiasawa. Diak maawatan ti riknak. Kasla immubingkami nga agpadpada. Mayatak a madi. Imbagak ti panagbakasionko ditoy Filipinas. Kayatna a duakami nga agbakasion ngem diak immannugot. Ammok lattan a sawento dagiti kakailian: “Bakbaketan a nangisangpet iti Amerikano.” Saan a nakasurot a dagus gapu iti pandemia. Itan, kayatna ti umayen. Agkasar kami kano iti grande iti simbaan ditoy Filipinas. Naadalna kanon ti ugali dagiti Filipino, nangruna ti Kailokuan. Kasta unay ti panagpadispensarna. Nalabesen a 70 ti tawenmi nga agpadpada. Rumbeng kadi pay la a makiasawaak? Nakababain kadi, ikit no agkasarkami iti dati a nobiok iti daytoy a tawenmi ditoy pagiliantayo? Mabainak ngem kasla mabutengakon a mapukawko manen ti umuna nga ayatko.—Veronica Dear Veronica, Inimutam ti bagim iti lima a dekada tapno maipaaymo laeng dagiti kasapulam dagiti asideg a kakabagiam. Nagballigidan. Ammok nga adda ragsak a naimula dita puso ken riknam gapu ta sika ti naggapuan ti balligida ngem maipamaysadanto ngata ti mangaywan ken mangtaraken kenka? Kunam nga addan bukodda a biag; siwawayadanto ngata a mangtagibi kenka iti panagbaketmo? Immubing ti riknayo ken Doktor Amerikano iti panagsarakyo, Ituloyyo dayta a rikna. Sabali ti ragsak iti denna ti ay-ayatem nga asawa ngem iti denna dagiti kakabagiam. Pasubliem ti nakeltay a ragsakyo babaen ti naragsak ken di malipatan a kallaysa. Saanmo a maliklikan ti tadem ti dila dagiti dadduma ngem ti koma nabati pay a panawen ti panagragsakmo ti panunotem. Saan a nakababain ti inkay panagkallaysa iti napnuan rambak. Naragsak a panagtitipon dagiti kakabagian ken kakaarruba dayta. Sapay koma ta makapanawton ni COVID-19 tapno awan makalapped iti panagraragsakyo nga agkakabagian ken pannakatungpalen ti natungday nga ayan-ayat ken ragsakyo.—Ikityo

Images:

© PressReader. All rights reserved.