Publication:

Bannawag - 2021-05-01

Data:

Kastoy ti Agaramid iti EM

Miks & Tiks

KASAPULAN laeng dagiti nagango a bulbulong ti kawayan, garami, wenno saba, tagapulot (no awan, mabalin ti brown sugar), ken sangkabassit a danum. Gagangay nga adda dagiti kimpet a nabiag ken makatulong a buot, organismo ken mikrobio kadagiti nadakamat a nagango a bulbulong nga isu ti pangrugian a ramen ti aramiden nga EM (effective microorganisms). Urnongen dagiti bulbulong sa ikabil pay laeng iti maysa a lugar. Mangisagana iti agpada ti kaaduna a tagapulot ken danum, wenno 50 a porsiento a tagapulot ken 50 a porsiento a danum. Ikabil dagiti bulbulong iti umdas ti kadakkelna a dram sa ilaok ti tagapulot ken danum. Kaluban ti dram sa bay-an a malungsot daytoy iti las-ud ti uppat a lawas, wenno makabulan. Kalpasan ti makabulan, luktan ti dram inton nakalneken ti init, wenno inton bimmaban ti temperatura ti aglawlaw. Bay-an a nakalukat ti dram iti agpatnag, ngem laglagipen a kaluban sakbay a sumingising ti init. Iti kasta, di agawaaw ti ramenna a nitroheno iti kanito a mapudotan daytoy. Kalpasanna, mabalinen nga usarenti EM. Tapno makaaramid iti instant a solusion ti EM, paglalaoken ti 10 ml nga EM, 40 ml a tagapulot, ken 950 ml a danum sa idulin daytoy iti maysa a suli ti balay wenno kamarin iti uneg ti 5-7 nga aldaw. Kalpasanna, ilaok ti solusion iti maysa a litro a tagapulot ken 99 a litro ti danum tapno makapataud iti 100 a litro nga EM solution a maaramat kadagiti mula iti talon ken iti aramiden a bokashi.—O

Images:

© PressReader. All rights reserved.