Publication:

Bannawag - 2021-05-01

Data:

Rehab center para iti na-stroke, naluktan iti Solsona, Ilocos Norte

Miks & Tiks

Ni LEILANIE G. ADRIANO

Linuktan itay nabiit ti lokal a turay ti Solsona, Ilocos Norte ti kaunaan a Physical Therapy Community-based Rehabilitation Center iti probinsia a para kadagiti nakalasat iti stroke (atake ti utek) a manamnama a pakaiwayatan dagiti sesion iti physical therapy ken konsultasion. Iti pannakitinnulong ti Department of Physical Medicine and Rehabilitation ti Mariano Marcos Memorial Hospital and Medical Center (MMMH&MC) iti Siudad ti Batac, kinuna ni Dr. Henry Bolompo, physiatrist ken officer-in-charge ti nasao a center, a kalikagum daytoy baro a pasilidad ti mangyasideg kadagiti serbisio iti physical therapy kadagiti umili, nangruna kadagiti nakalasat iti stroke tapno no mabalbalin, makapagbiagda met nga agwaywayas. Iti babaen ti nasao a programa, kuna ni Bolompo a maiwayat ti inaldaw a konsultasion babaen ti telemedicine ken pannaripato iti mismo a center tunggal Lunes ken Huebes iti Solsona Rural Health Unit. Innayonna a mabalin a masanay dagiti health personnel tapno maitultuloy daytoy a pasilidad iti rehabilitasion ken tapno masigurado a makatulong kadagiti umili. Malaksid ti pannakaipaay ti libre a panagsanay ken pisikal a pannaripato, agpaay pay ti pasilidad a kas pakaangayan dagiti seminar a mainaig iti salun-at tapno manayonan ti ammo ti publiko ken tapno adda pakaaramatan ti propesion a physical therapy.

Images:

© PressReader. All rights reserved.