Publication:

Bannawag - 2021-05-01

Data:

Ti Gasatmo

Miks & Tiks

Ni MADAM CHARISMA

TAURUS (Abril 21- Mayo 20). Mapasublim manen ti nasinged a pannakilangen iti dati a kasupsupangilmo. Naruay metten dagiti naaramidam a mangidur-as iti pakagin-awan ti panunot ken salun-atmo. Maaddanka iti enerhia a mangawis iti adu nga oportunidad a mangipaay iti pagimbagam ken kadagiti nasinged kenka. Nagasat a numero: 3, 4, 9. GEMINI (Mayo 21- Hunio 20). Adda dagiti maidiaya kenka a baro a proyekto ket addaka iti situasion a sika ti mangikeddeng iti umisu a gatad a para kenka. Patiem a ti nakaparsuaan, pabor ita kenka. Adda nabalitokan a disso nga agur-uray kenka ket pagimbaganna, saan nga adayo iti agdama a yanmo. Nagasat a numero: 1, 5, 8. CANCER (Hunio 21- Hulio 20). Maaddaanka iti gundaway a mangurnos kadagiti problemam iti panguartaan wneno panagbadiet. No adda dagiti nagkamaliam iti napalabas, tiempo ita ti panangikagumaanan a malintegmo dagitoy. Mabiag met dagiti plano wenno diaya iti panguartaan a saan a naibanag iti napalabas gapu iti kaawan ti tiempo. Nagasat a numero: 2, 4, 7. LEO (Hulio 21- Agosto 20). Kasapulam ita ti adu nga anus ken pasiensia nangruna ket ad-adda a mausarmo ti talugadingmo a kas líder. Posible a makidinnaerka iti kabaelan ita gapu ta addaka iti aglawlaw nga adda met dagiti líder a kas kenka. Adda dagiti saan nga umamong kenka ngem laglagipem a normal laeng dayta ta nasaysayaat met ti kagimongan a dagiti umili, addaan iti kabukbukodan a kananakem. Nagasat a numero: 3, 5, 9. VIRGO (Agosto 21- Septiembre 22). Adda talentom a mangsagid iti emosion ti maysa a tao. Mausarmo daytoy para iti panagipasagepsep kadagiti tagipatgen (values). Maikkanka iti gundaway a mangiladawan kadagiti naisangsangayan nga ideam wenno kayatmo a mapasamak para iti nalawlawa a masakupan. Agtalekka iti kabaelam. Maysaka a batido iti dayta a tay-ak. Nagasat a numero: 1, 6, 7. LIBRA (Septiembre 23- Oktubre 22). Gapu iti kinasidap ti panunotmo, masiputam a dagus dagiti main-inaw a parikut ket dagus a maipakatam iti pannakarisut. Nalawag met kenka ti kayatmo a magteng ket iti panangtun-oymo iti daytoy, adda dagiti mapasugkian, ad-adu ketdi ti matignay. No bilang agkasapulanka iti nayon a gatad para iti panagpuonam, sierto a maipaay dayta ni patpatgem basta agbalinka a napudno. Nagasat a numero: 2, 4, 8. SCORPIO (Oktubre 23- Nobiembre 22). Manamnama ti yaay dagiti bambanag a mainaig iti tulag, plano, kontrata, ken kapadana. Mausarmo ti kinapatasmo para iti manamnama a tulong dagiti adda iti aglawlawmo. Naimbag ti pagbanagan dagitoy no maipakat ti kinatanang ken kinamanagsirmatam. Ti panagballigim, dakkel ti maaramidanna iti ad-adda pay nga ilalangto ti relasion ken ayan-ayat. Nagasat a numero: 3, 5, 9. SAGITTARIUS (Nobiembre 23Disiembre 20). Posible nga adu dagiti maipapaay kenka a pagrebbengan gapu met iti dimo pannakaammo nga agkitakit. Ammuem ti limitasionmo ken tapno mausar met dagiti adda iti aglawlawmo dagiti bukodda a paglaingan. Ad-adda pay a rumagsakda ken posible a maipaayandaka pay iti pabor. Nagasat a numero: 2, 4, 7. CAPRICORN (Disiembre 21- Enero 19). Nakaturong ti imatangmo kadagiti kayatmo a maipatungpal. Awan ketdi ti rason tapno agdardaraska. Ad-adu met ti maala a tulong no ammom ti makisala. Tapno ad-adu pay ti magapuanam iti umuna a lawas ti bulan, padasen ti adadda nga agdengngeg ngem ti agsao a kanayon tapno maaddaanka iti pamalpalatpatan no ania ti namnamaen ti sabali kenka. Iti daytoy a tiempo, ad-adda a makatulong no agtalinaed ti positibo a panagpampanunot. Nagasat a numero: 3, 6, 8. AQUARIUS (Enero 20- Pebrero 19). Ti panangiturong iti imatang iti gunggona a kayat a mayalat ti ad-adda a mangipaay kenka iti enerhia. Saanka ketdi a makarikna iti pannakakettang wenno pannakauma nangruna no ti pagirayan ti riknam ti ar-aramidem. Kadagiti tiempo a naruay dagiti negatibo a damdamag, manen, kitaen dagiti pumirak a gilap ti nanglangeb a tangatang. Nagasat a numero: 2, 5, 9. PISCES (Pebrero 20- Marso 20). No tagiragsakem ti pannakakitam nga addada sabsabali pay a tattao nga agararamid iti naimbag a kas iti ar-aramidem, agrambakka. Malaksid nga umadadu dagiti makaaramid iti kinaimbag, kaipapanan daytoy a dimtengen ti nakemmo wenno naikugtarmon iti kinaapalmo. Nagasat a numero: 1, 4, 7. ARIES (Marso 21- Abril 20). Kadagitoy ti tiempo nga ad-adda a pumabor kenka ti gundaway no usaren ti tunggal kanito a gundaway tapno sumayaat pay. Posible iti situasionmo ti pagsasao a ti ayat, mangipasngay iti sabali ken adadu pay nga ayat. Makarikna iti pannakapnek no maarisitmo a ti ayat ken kinaimbag, saan a mabingbingay ketdi, mabalin nga ipaay iti uray asino man. Nagasat a numero: 2, 5, 9.

Images:

© PressReader. All rights reserved.