Publication:

Bannawag - 2021-05-01

Data:

Showbiz

Miks & Tiks

Ni ANGELO ‘ELOY’ PADUA

ITI maysa nga interbiu, kinuna ni Bea Alonzo a no bilang agpadlaw ni John Lloyd Cruz nga adda panaggusto daytoy kenkuana, dagus a pagsaritaandan ti panagkasarda. Nalabit siaammo ni Bea a nabayagen nga idawdawat dagiti fans nga isuda koma ti agkatuloyan. Iti agdama, maisaysayangguseng a nagsinan da Bea ken Dominic Uy idinto a dida pay inako iti publiko no naaddaanda iti relasion wenno saan. Kaudian met a nakarelasion ni John Lloyd ni Ellen Adarna (nga ina ti putotna) a nobia metten ni Derek Ramsay. Ania ti sungbat ni John Lloyd iti kuna ni Bea? Daksaggasat ta awan pay met, ‘bagis. Ni Carlo Aquino ti kaudian a biniktima ti maysa kadagiti netizen nga aglinglinged kadagiti peke nga account. Kuna daytoy a dangranna ti putot ni Carlo. Siempre, nagpungtot ni Carlo. Naimbag ta saanak a nalatak a kas ni Carlo Aquino, ‘bagis. Amangan no butbutngendak met dagiti netizen nga addaan iti sinsinan nga account. Nakakalkaldaang met ti panagsinan da Jennica Garcia ken Alwyn Uytingco. Addan dua nga annakda, ken maibilangda kadagiti manmano nga agaassawa wenno agpapareha iti showbiz a di nagsina. Ngem ita, makapaladingit ta mainayonda metten iti listaan dagiti nagsisina. Pudno a narigat ti mangsaluad iti relasion iti ayan-ayat, ‘bagis, nangruna iti showbiz. Malagipmo pay ni Katrina Halili, ‘bagis? Wen, isuna ‘tay seksi nga aktres a karaman iti “Starstruck 1” ken nagbalin a kontrobersial ta nairaman kadagiti ‘babbai’ ti maysa a doktor a naipareha met iti maysa a nalatak a beautician. Ita, kuna ni Katrina a nauman iti lalaki. Umanayen, kunana, ti arakup ni Katie, 8, nga anakda ken Kris Lawrence a maysa a singer. No naragsak ni Katrina iti dayta a kunana, ala, nasayaat la unay, di kadi, ‘bagis?

Images:

© PressReader. All rights reserved.