Publication:

Bannawag - 2021-05-01

Data:

Young Dreamers Club (9)

Contents

Estela A. Bisquera-Guerrero

Ti Napalabas: Inabak ni Aubrey ni Nestor a presidente ti YDC. Makapungtot ni Angkel Polding aglalo ket saanda nga innala nga adbayser idinto nga innalada ni Angkel Iniong. Nadegdegan pay ta naggabbo da Nestor ken Aubrey. Saanen a kayat ni Angkel Polding a mayasideg ni Nestor ken ni Aubrey. Naminsan, inikkan ida dagiti YDC iti gundaway a makapagsolo, ngem nakita ida ni Angkel Polding ket inungtanna ni Nestor. Naragsak ken balligi ti programa ti YDC, ngem naglusdoy ken nayospital ni Arman. Ket pabasolen ni Angkel Pedring ni Mang Paking. A(Maika-9 a Paset) GWINGWINGIWING ni amang. Kasla ayonanna ni Angkel Pedring. Iti umuna a gundaway manipud naggiginnura dagitoy agkakapidua, nagmaymaysada iti nakem. “La, bagaakto ni Paking ta dinanton aw-awisen ni Arman,” naalumamay ti timek ni Angkel Polding. Pudno ti kunada, bagi la ti bagi. Isakit latta met ni Angkel Polding ni Arman. Gapu ta awan kadua ni Angkel Pedring a mangbantay ken ni Arman, kapilitan nga agbati ti maysa kadakami. Saan met a mabalin a maysa kada amang wenno ni Angkel Polding. Napuyatanda met ket dawaten ti tawendan ti naunday nga inana. “Tapno awan agriri, jack en poy lattan,” kinuna ni Sabut. Immanamongkami amin. Ti adatna, ni Sabut a nangisingasing, isu met laeng ti naabak. Di kadi isu ti agbati. Naladawen idi malagipmi a bagina ti traysikel a naglugananmi a simmaruno. Nagkikinnitakami ngarud a babbai. Kasano itan, makikalugankami kada Angkel Polding? Kasanon ni Aubrey? Nalamiis ti ulo ni Angkel Polding ita, ngem gumilgil-ayab dagiti matana no maiturong ken ni Aubrey. No apay met ngamin daytoy nga Aubrey ta di man la agkurno. Nangato met ti puruana. Kimmannaway ti tengngedna. Madlaw la ket ngarud a maipit ni Nestor. Dina ammo no ni Aubrey wenno ni Angkel Polding ti pakiabayanna. Ni met Richard, sutil! Inggagarana met, kaduana ni Sabut, a paginnasitgen da Aubrey ken Nestor. Maysa pay daytoy Shane a kuneng. Awan preno ti ngiwatna a nangibaga, “La, ‘Nong Nestor, ‘bag ta di sika ti natalimudaw? Baka kumsial ni ‘Nang Aubrey ‘ti nerbiosna!” Nagbabawiak la ket ngarud a sinurotmi pay la ida. Nagangayanna, nagyan ni Angkel Polding iti nagtengngaan da Nestor ken Aubrey. “Ne, kaanakan, a, aw-awirem dagitoy tagibim, wen?” naalumanay ngem madlaw a medmedmedan ni Angkel Polding ti suronna. Immisemak. Ketdi, ad-adda a dusngi ngem isem ti naimalkat kadagiti bibigko. Dagiti kakaduak a YDC, ayna, ta kasla dida ammo ti maungtan. Kidagkidagen ni Sabut ni Nestor idinto a kiddakiddayan ni Shane ni Aubrey. Aginnisem met a saan da Aubrey ken Nestor. Diak la ket ngarud ammo no maasianak wenno makakatawaak iti langa dagitoy dua. Dida pay ketdi ammo no aginnaremda wenno agapada! Sinango ni Angkel Polding ni Nestor ket natallikudanna ni Aubrey. Liningdanna ni Aubrey tapno di makita ni Nestor. Siempre, kayat met latta a makita ni Nestor ni Aubrey uray ti pingir la ti rupa koma daytoy. Ngem no basketbol koma, Defensive Player of the Year ni Angkel Polding. Napia laengen ta rimmuar da Sabut, Richard, ken Shane iti kuarto ta no saan, amangan no nageellekda. Daytoy ngamin a Richard ta maituredna a sutilen no dadduma ti abuelona. Banag a pangtaptapisan ni Nestor ta isu met ti maladdit. “O, apay a dika pay rummuar?” arig witwitan ni Angkel Polding ni Nestor. Nagkinnita da amang ken Angkel Pedring. Immisem iti bangbangir ni Angkel Pedring. “Kasla nakitakon daytoy nga eksena idi, a!” Kinirman ni Angkel Pedring ni amang. “Adda koma ni Iniong!” Nagbang-es ni Angkel Polding. Tinaliawna ni Aubrey. Nakaserserioso met ti rupa ni Aubrey. Saan a masinunuo no ni Angkel Polding ti kasuronna wenno ni Nestor a di man la makaikaluya kenkuana. “La, ket history repeat itself a kunada,” inyarikap ni amang ti ul-ulsanna nga Ingles. Tinaliaw ni Angkel Polding ni amang. Bumagsol ti panagkita ni angkel ngem kasla awan latta met ken ni amang. Kiniddayanna ketdi ni Angkel Polding. Inyawis la ket ngarud ni Angkel Polding ti panagawidmi. Nagtung-ed met lattan ni amang. Apagisu met a nagsubli da Richard, Shane ken Sabut. Adda awitda a makan. Imparabaw ni Sabut dagitoy iti lamisaan iti abay ti kama ni Arman. Matmaturog latta ni Arman. Saan ketdi a nalusiawen a kas itay itaray da amang ditoy ospital. Nakapudpudaw, a kas kuna dagiti sutil a YDC. “Agbati pay la da Aubrey ken Lilac a kadua ni Sabut a mangbantay ken ni Arman,” kinuna ni amang ken ni Angkel Pedring. Kuna ni amang nga agawid pay laeng ni Angkel Pedring ta mangala iti pagsukatan ni Arman. Kiniddayannakami ni amang. Ammomi a rason la ni amang daytoy tapno di nakaddidillaw a di kayat ni Aubrey ti makikalugan kada Angkel Polding. Nagtung-ed lattan ni Angkel Pedring. Nadlawna met siguro a masapul nga awan ti mapasugkian kadagiti kontra partido. Nakudkod laengen ni Nestor ti teltelna. Tung-ed a tung-ed met da Sabut ken Richard a manutsutil latta ti isemda. “La, agbatiak pay met ngarud, angkel!” kinuna ni Shane. Waeng a pudno, di manen nakasirok iti latok. No awan la sabali a sisasango, kineddelkon ti sellangna. Awan bibiangko no ngumisit— ta kuna dagiti babbaket a ngumisit ti sellang a makedkeddel. Ngem nasiputak ti panagkinnirem da Sabut ken Richard. Maragsakanda iti kinawaeng ni Shane. “Sus, dakayo a simmaruno, agbatikayo pay ngarud!” imbang-es ni amang. Nagkatawa ni Richard. Dinagdagusna nga inyawat ti tulbek ti lugan ni Angkel Polding ken ni Nestor. Insabat nga inted ni Angkel Polding ti tulbek ti luganna ken ni Richard sakbay a rimmuar iti kuarto ta daytoy ti agmaneho. “La, anusam dagita senior citizen, wen?” inkidday ni Richard ken ni Nestor. Tinapis ni Nestor ni Richard. Nagkatawa laeng ni Richard sa kimmita ken ni Aubrey. Nagmisuot ni Aubrey. Ania pay, binantayanmi ni Arman a mayat ti turogna. Private room wenno suite ti innala ni Angkel Pedring. Adda bukodna a CR ken adda maysa a kama para iti agbantay. Adda TV ken nalawa a sopa. Ketdi, dikami met makaturog a babbai ta naiturog da Sabut ken Richard. Kasta unay ti urokda. Agdanggayda— baho ni Sabut, tenor met ni Richard. Agdudungsakami a tallo a babbai. Mailibaykami met saggabassit ngem aggigiddankami a makariing no rumayok ti urok dagiti dua a kakaduami. INYAWIDMI ni Arman a dina pay naibus ti suerona. Simmabat ti sibubukel a YDC. Ti traysikel si Sabut ti naglugananmi. Gapu ta sisusuero, duada ken Richard iti uneg ti side car. Siak ti nagtugaw iti likudan ni Sabut a drayber. Dagiti dadduma, agraman ni Angkel Pedring nga arig sangsangpetna iti ospital a napan nangala iti aruatenna, nagdyipda. Adda bukod a lugan da Angkel Pedring ngem ni Arman ti mangimanmaneho. Tuglep ngamin ni Angkel Pedring ket no namin-anon a nganngani maitinnagna ti luganda iti teppang ti Musing River nga unorenna nga agpalaud no aggapu iti McArthur Highway. Gapu ta napalawa ti kalsada ket naikkat dagiti kawayan a saripda ti teppang ti waig, nalayang ket no dimo kabesado ti dalan aglalo no nasipnget, amangan no imbes a magmagnaka, aglanglangoyka metten. Makasuron ni Angkel Pedring ta agragut ket agragut lattan ni Arman nga agawid. Kayat ni Angkel Pedring a maipaibus pay nga umuna ti suerona ngem madi ta madi ni Arman. Sabagay, asino met ngamin ti kayatna ti agrambak iti Paskua iti ospital, aya? Bisperas pay met ita. Imbaga met ketdi ti doktor a mabalinen a rummuar ta nakainana metten. Ngem kunana a nasaysayaat no maibus ti suerona. Ngem imbaga ni Arman nga adu ti nurse iti barangaymi ket ipaikkatnanto lattan. Pudno met ketdi ta saan met laeng a ni Arman ti sulpeng a pasiente a tagabarangaymi. No pumigsadan, agawiddan ti kayatda. Natalgedda nga agawid uray nakasueroda ta adda ammoda a mangkita ken mangikkat. Ti pakasuronan pay ni Angkel Pedring, bayadanna ti maysa nga aldaw a panagyan ni Arman iti innalana a suite. Kuna kano ngamin ti doktor a mabalin nga uray iti emergency unit lattan ti paginanaan ni Arman, ngem madi ni angkel ta amangan kano no umadunto ti agdateng a pasiente ta Paskua la ngarud ket adu latta dagiti natured nga agpalibang uray pay maiparit. Siempre, no natangken ti ulo ken saan a maisursuro, awawisem ti desgrasia. Kangrunaanna, ipagarup ni Angkel Pedring a di agawid a dagus ni Arman. Adda met ketdi PhilHealth ti barona, ngem gapu ta di met immabot iti beinte kuatro nga oras iti ospital, dina maaramat. “Sus, dim’ la mayebkas nga ayat deta isu a kimsialka!” inkantiaw ni Mang Paking ken ni Arman. No apay nga immay met simmabat daytoy idinto nga ammona met a kasuron unay ni Angkel Pedring. Sabagay, kakuyogna da Kapitana Mering ken dagiti dadduma nga opisial ti barangay. Daytoy ti maysa a mayat ditoy yanmi. Uray kaskasano, adda nakem dagiti opisial ti barangay. Addada latta a makisinnaranay no adda rigat. Umun-unada pay no dadduma a makadanon ngem ti mismo a kaarruba ti maseknan. “Ne, apay addan sa met ammom a palimed ni Arman?” inyisem ni Kapitana Mering. Pinagsinnublat a kinita ni Angkel Pedring da Mang Paking ken Arman. Linisian met ni Mang Paking ti tumagbat a kusilap ni Angkel Pedring. Nagdusngi ni Mang Paking. Kinitana ni Kapitana Mering sa intarusna a kinita da Shane ken Aubrey a nagbitbit iti nadumaduma a prutas ken pagmerienda. Awit ni Angkel Pedring dagitoy ta kayatna nga uray dua wenno tallo nga aldaw ni Arman iti ospital. Madanagan unay ket kayatna a makainana a nasayaat ti barona. Siempre, amkenna nga agpuyat manen ni Arman ta alangan met nga agpupok daytoy iti kuartona idinto nga agrarambak ti amin? Ammona a kalpasan ti noche buena, rummuar daytoy ket sarakenna dagiti padana a YDC. Tuntonenda amin a balbalay ditoy ket makipanganda. “’La, ket kompesar la ti nabartek met… Ngem saan met a dakes no pudno!” insakuntip ni Mang Paking. Bulonna a timmallikud ket immunan a nagawid. SAANKON a maay-ayo ti tuturogak. Immaweren a kas panagawer dagiti kapatadak ditoy barangaymi. No kaano nga agsublida, diak ammo. Ngem ti ammok ita, makatitileng ti panagpatokar ni Angkel Polding sa ket kasla naigagara pay a gumiddan ti taul ni Tyson. Napia koma no sukatan ni angkel met dagiti oldies a patpatokarenna. Bimmangonak. Tinurongko ti nakaplastar a kompiuter iti asideg ti TV-mi. Naka-direct connect daytoy iti DSL isu a napigsa ti signal ti internet ditoy balay. Biniagko ti kompiuter. Nagsapulak iti napintas a playlist iti YouTube. Nakitak dagiti daan a Christmas carols. In-connect-ko ti loud speaker tapno marimbawan ti patpatokaren ni Angkel Polding. Immuna a naipatokar ti “Silent Night.” Nakasamsam-it latta iti panagdengngegko daytoy a samiweng idinto a naputar pay laeng idi bisperas ti Paskua ti 1818. Ngem nadadael ti kinasam-itna ta inlaaw ni Angkel Polding ti dengdenggenna a kadaanan a country song nga “Stand By Your Man” ni Carla Bruni. “Ania met ngata ti tripna daytoy a lakay ita?” insakuntipko. Ita la ngamin a bisperas ti Paskua a saan a Christmas songs ti patpatokaren ni Angkel Polding. Apay, timmayab ngata ti Paskua iti panagpasugnodna? Iniddepko ti kompiuter. Di met la makalaban iti pigsa ti patpatokaren ni Angkel Polding. Agtinnag la nga aggasgastarak iti koriente. “Manglaglagip ni Polding,” inkatawa ni amang. Nagsabatkami iti agdanmi. Gapu ta diak met maalan ti turogko, innak la kumammeten ta mariknak ti bisinkon. Diak ngaminen nangrabii ta agtuglepak la unayen itay. “Ania met ti lagipenna ngay?” inlibbik. Nagpaggaak ni amang. Dinakon sinungbatan isu a nagturongak iti balkon a kasla sadiay ti pakasarakak iti sungbat. Nakitak ni Menang a nakakulinikon iti butuabutuag ken kasla awan bibiangna iti patpatokaren ni Angkel Polding. Siak, indalikepkepko ti nangmuregreg iti balay da angkel a kasla isu ti nakabasol kaniak. UR-URNOSEN ni inang ti yatangna iti altarna. Kinargaanna ti platito iti saggabassit nga ispagheti, buko salad ken sinuman. Kinargaanna met ti dua a liso a baso iti orange juice. Ginangtanna ti dua a vigil candle a ginatangda pay idiay Manaoag. Rinantana daytoy idi napan a Domingo. Kanayon a kastoy ti aramiden ni inang tunggal pasungadenmi ti alas dose iti Paskua. No damagek no nakaikugnalan ti ar-aramidenna iti Biblia, kunana: “Dika man pilosopo!” ‘La, ket ania ngarud, narigat met a maiwaksi ti nariingan a kaugalian no maminsan. Ta amin a banag ditoy lubong, agsadag latta iti no sadino, asino, ania, ken apay ti patien ken pammati. “Dumawat man met dagiti di mamati ‘ti Paskua ‘ti paskuada!” inlibbi ni inang. Kasla nabasana ti agtartaray a pilosopia iti panunotko. Pudno met ketdi ta adda kamaestraak nga agkuna nga awan iti pammatina ti Paskua, ngem naragsak met a makipaskua. Agreklamo pay no awan maawatna a regalo wenno ipapaskua kenkuana dagiti adalanna. “Uray daydi Lelang Sofing, aglako met iti dinardaraan idinto a kunana a narugit ti dara!” Kiniddayak ni inang. Ti kasursuron ni inang nga ikit ni amang ti kunkunak. Nagmisuot ni inang. Inwagisna ti kanawanna. Pappapanawennak iti yanna. Nagugis sa idi kuan nagtanamitim. Kaniak a biang, patgan latta ti Apo a Namarsua ti kiddaw dagiti pinarsuana saan la ketdi a dakes aglalo no pangirurumen iti pada met la a pinarsua uray ania ti pammatim. Ta no saan a kasta, di pay ket iti laeng batog dagiti agkunkuna a ti pammatida ti pudno ti pagtuduanna? Ngem no adda mangdebate kaniak, marigatanak a mangilawlawag, ta ditayo met ammo no ania ti pudno. Ngem ketdi, saan a dayta ti pudno a pakaringgorak ita no di ket ti kabasbasak iti group chat ti YDC a ditoy balay ti pagpinalan dagiti miembro. Kayatna a sawen, siak ti di makapagpasiar ita. Padaanak ida. Ti pakarikutak, gapu iti napalaus a bannog ken puyatko kadagitoy napalabas nga aldaw, diak natulongan da amang ken inang a nagisagana iti makan. Nalabon met ketdi ti insagana da inang. Diak pay rinamanan ngem kas nakitak iti indasarna iti altar, naamnaw ti templa ti buko salad! Isu a nangipalkatak iti mensahe iti group chat-mi: ”Agbalonkayo no kayatyo ti adda ngatngatenna ta kape laeng ti maisaganak!” Gunggonada, ta kas naipakadawyan, idiay koma balay da Aubrey ti pagpinalanda. Ngem nagsasaruno met a nakatangar a tammudo ti sungbatda. GIMRUOD ti kimmot ni Arman. Naggigiddan a nagapput dagiti babbai idinto a kasta unay ti paggaak dagiti lallaki. Kinudkod ni Arman ti teltelna. Addan a makipagragragsak kadakami idinto a parparbangon. Sabagay, alas siete iti rabii a pinaikkatna ti suerona— uray adda pay laeng nagyanna. Masikoran kano a ni Angkel Pedring laeng ti kaduana iti nakadakdakkel a balayda. Isu nga uray immayen sinukon ni Angkel Pedring itay, di pay nagawid. Pagaayatna ti makilanglang-ay kadagitoy laglag nga agtutubo. Ngem nasayaat met tapno adda met kaduak a medio nataengan. Wenno dina ngata kayat nga isu ti pulotan dagiti sutil a YDC. Kuna ngarud ni Richard a narigat ti aglanglangan no panawen ti panagsasarak ti YDC ta dinto ket sika ti sentro ti angaw. “Epekto ‘diay suero daydiay!” inyallangon ni Arman iti dayawna. Kasla agtutubo latta ti gargaraw ni Arman. Isu pay ketdi ti mangmanong kadagiti kakaduana aglalo kada Nestor ken Sabut. Kasano ngamin ket amang a laklakay ti langa dagitoy ngem isuna. Inayon pay a bassit no idilig kada Nestor ken Sabut. “Naladaw a palibong daydiay!” insallawat met ni Sabut. Palibong kunami iti kanalbuong ti bongbong, daytay kawayan a mabalaan iti karburo. “’La, baka adda met agkuitis kadakayo a babbai!” impaggaak ni Richard. Nagpinsan dagiti babbai a nangdilat ken ni Richard. Ungapen koma ni Richard ti ngiwatna tapno sumungbat ngem immunan a timpaw ti nakabangbangag a taul ni Tyson. Kasla adda kabusor daytoy. Ammo da Richard ken Nestor a nakaturogen dagiti abuelo ken abuelada. Kalpasan ngamin a (Maituloy iti sumaruno a panid)

Images:

© PressReader. All rights reserved.