Ti Puga (32)

Ti Napalabas: Kayat ni Agent Fleming nga isukat ni Rudy ken ni Agent Stewart ngem di immannugot ni John ket pinaltoganna ti luppo ni Rudy. Rinaut da John ti safehouse a nangilemmenganda ken ni Rudy. Insakripiso ni Agent Stewart ti bagina ngem napatayna ni Agent Fleming. Nastrek met da Melanie ti parambak ni Roberto Guerrero. Nagballigi a nangpaltog iti daytoy ngem idi aglibas koman, adda nangrakus ken nangpaturong kenkuana iti paltog.

NAGILUNOD ni Melanie iti pannakaipaturong ti bunganga iti paltog ti pispisna. Ngem saan a napabutngan. Dagus ketdi a sinikona ti bakrang ti lalaki a nangrakus iti tengngedna. Nagrittuok pay ti paragpag daytoy. Iti pigsa ti panangsikilna, ammona a natilmon ti lalaki ti angesna isu a saan a nakapagasug. Limmukay ti pannakaetet ti tengngedna. Ginammatanna ti takiag ti lalaki a nakaiggem iti paltog sa nagpusipos. Natiritir ti ima daytoy ket isun ti nakaipaturongan ti bukodna a paltog. Tinulongan ni Melanie a nangkalbit iti paltog. Namindua. Nalsok ti tengnged ti lalaki, iti nagmumungotan dagiti adu nga urat. Simmuyot ti dara. Nakamulagat lattan ti lalaki a mangkitkita ken ni Melanie. Kasla masmasdaaw no ania ti mapaspasamak kenkuana.

Induron ni Melanie ti lalaki ket nadaluson iti datar. “Sierra to Venus, you have 2 minutes to get out of the area... do you copy...” ni Agent Schummer ti agsasao iti radio.

“Copy that, Sierra... ngem adu pay laeng ti tao... inosente, babbai, ubbing...”

“Collateral casualties, Venus...”

Naparasaw ni Melanie. “Adu unay. Mapukpukawtayon ti puso ken panagtalek dagiti tao kadatayo gapu kadagiti saan a nainkalintegan a rasontayo a manggubat iti terorismo...”

“Ngem nainkalintegan a collateral casualty... tapno masalakniban ti seguridad ti pagilian. Sika met laeng ti nagkuna nga iti ania man a pamuspusan ken gatad, nasken a saan a makastrek iti Amerika ti dirty bomb...” Nagtanabutob ni Melanie. “Daytoy laeng ti pamuspusan tapno maserrekmo ti inner circle ti organisasion ni Archie Castillano...” kinuna manen ni Agent Schummer.

Napaanges iti nauneg ni Venus. Ti pannakaawat iti collateral casualty iti ahensia ti maysa kadagiti kasuronna a mapaspasamak.

“Yes, we kill... but of course, with compelling reasons... nga ammok a saanen a nasken nga ilawlawagko kenka... ken addanto latta dagiti inosente a tao a mairaman...” Ni manen Agent Schummer.

“Stop it... and shut up...” Makasuronen ni Melanie. “Copy that, ma’am... And I suggest you run faster... gapu ta iti sumagmamano a minuto, tumapok dayta a

disso...”

NAKALAMLAMIIS ti palayupoy. Awanen ti agtinnag a niebe. Nagkalman ti napigsa nga angin a mangibasbasnot itay kadagiti kasla kapas a niebe, ngem sisasalapay pay laeng dagiti sanga dagiti kaykayo iti napuskol a niebe. Nangwakniten ti tangatang. Agkikinnidmaten dagiti riniwriw a babassit a bituen ket nawaya nga ipapan nga awan ti limmabas nga snow storm.

Nakatakder da John ken ASAC Donotelli iti sango ti panakkelen met a balay. Nakaul-ulimek ti aglawlaw. Awan malmaltiing malaksid kadagiti maipattopattok a panagtaul dagiti aso.

“You can spend the night here, John,” kinuna ni ASAC Donotelli.

Nagwingiwing ni John. “Diak kayat a maisagmak ti pamiliam.”

Napaanges iti nauneg ni ASAC Donotelli. Nabang-aran iti sungbat ni John. Dina kayat a talaga nga agbayag pay ni John uray iti sango laeng ti balayda. Dagiti inaramidda, panaglabsing ken panangbalusingsing iti linteg. No adda makaammo iti daytoy, imbestigarenda. Maikkat iti takemna. Maibalud. Kayatna a salakniban ti takemna. “Oh, well... so, I guess this is goodbye...” kinunana. “Temporarily of course,” insungbat ni John. Nagtung-ed ni ASAC Donotelli. “So, where do you go from here?”

“Trying to stay alive. Ammom no kasano ti kinadawel ti ahensia kadagiti ibilangda a kabusor... Ops, I take that back... dagiti didiosen ti ahensia gayam. Ta saan a dakes ti ahensia. Dagiti laeng sumagmamano a rinuker ti mamagbalbalin a dakes.”

Immanges iti nauneg ni ASAC Donotelli. “Agtalekak kenka, John. Marisutmo daytoy.”

“Sapay koma...”

“Ket no kasapulam a talaga ti tulongko, ammom no sadino ti pangsarakam kaniak...”

“Thanks... ngem diak kayat nga agbalinka a dakes a pannakabagi ti linteg gapu laeng kaniak. I admire you. So, let’s just leave it at that.”

Nagkatawa ni ASAC Donotelli. “Ania kadi ti panagkunam kadagiti inaramidtayo, paset ti pagrebbengantayo kas pannakabagi ti linteg?”

Immisem ni John. “Sakbay a mailumlomka, nasaysayaat no agpatinggan ti itutulongmo kaniak. Diak kayat a madadael ti career-mo.”

“Awanto ti makaammo iti daytoy...”

“Dimo ipapan a kasta. Agpapaayka iti maysa kadagiti sopistikado nga ahensia ti gobierno, laglagipem nga adda latta dumdumdungeg kadatayo. Adda latta dagiti mata a mangsisiim kadagiti gunaytayo... Just be careful...”

“Maawatak. So, this is goodbye... and I wish you all the luck...” Ket immarakup ni ASAC Donotelli ken ni John.

“Goodbye...” kinuna ni John sa rimmuk-at iti arakup ni ASAC Donotelli. Timmallikud. Nagturong iti SUV a pagur-urayan ni Rudy.

“Hey, John .... ” inyawag ni ASAC Donotelli idi ilukaten ni John ti ridaw ti lugan.

Napataliaw ni John.

“One last request!”

“Okay...”

“Don’t destroy my city!”

“I’ll try not to!” Nagkatawa ni John. Limmugan.

“Let’s go,” kinunana ken ni Rudy a nakatugaw iti sango ti manibela apaman a nairikepna ti ridaw. “Sadino?”

“Need some rest... Mangsapulka iti hotel a narigat a masarakan dagiti kabusorta...”

“Ammom nga awan ti hotel a saanda a masiputan. Ngem adda cottage ti lolok iti kabakiran. Manmano a maaramat. Sadiay ti papananta...”

Nagsennaay ni John. “Saan laeng a sika ti agpeggad, iramanmo pay ti pamiliam...” imbalakad ni John.

“Nalpasen a nairamanak, John... Saankon a mabalbaliwan ti amin.”

Napawingiwing ni John. “Ania itan ti planom?” Apagapaman a tinaliaw ni Rudy ni John sa nagintek met laeng dagiti matana iti sango. “Agpalamiista pay. Agpaknita ta planuek ti sumaruno nga aramidek.” “Ladingitek ta nairamanka iti daytoy...”

“Paset sa ketdi daytoy ti maysa a kameng ti kabibilgan nga ahensia dagiti espia iti lubong...”

“Gapu kaniak...”

“Don’t worry about it, John .... ”

“I’ll make it right for you...”

Nagkatawa ni Rudy. “Ket sika, ania ti aramidem? Sarakem ni Deputy Hutchison? Dawatem nga agpakawanda iti inaramidda ken isublidak iti ahensia a kasla awan ti napasamak?”

Nagtung-ed ni John. “Trust me... Agpadata a Pinoy. Asino pay ti agtinnulong no di data nga agkadaraan?”

Immisem ni Rudy. “Just like Go Pinoy...” Nagkatawan. Naisurot a nagkatawa ni John. “Yeah, Go Pinoy. But, I promise I’ll make every thing right for you. That’s a promise...” Ngem napaanges iti nauneg ta ammona a sabsabali daytoy a gundaway. Dagiti mismo a nangangato a tao iti ahensia ti kabusorna, a pakairamanan payen ti sekretario ti DOD.

Kasano a makalabanna ida iti patas?

NAKADADDADAKKEL dagiti bukel dagiti mata ni Archie Castillano a mangkitkita kadagiti ladawan ni Roberto Guerrero: ti nakalawlawag ti pannakaalana a kasla panagbukilad a mata ni Roberto Guerrero a mangmatmatmat iti paltog a nakapaturong kenkuana, ti pannakapidut ti kamera iti nakusnaw a buli a rimmuar manipud iti murdong ti paltog, ti nakalawlawag nga iseserrek daytoy a buli iti mismo a muging ni Roberto Guerrero, ken ti panagparsiak ken pannakaiburandis ti dara. Iti sabali a ladawan, dagiti kumaribuso a security detail nga aggandat a mangisalakan iti boss-da ken ti pannakatulid dagitoy iti datar.

Immanges iti nakaun-uneg ni Archie Castillano. Ginammatanna ti basona a nakaparabaw iti lamisaanna sa intangadna. Linidokna amin a nagyan daytoy sa

Sinirig ni John ti nakangatngato a drone. Naipatengngan iti X iti scope. Nakain-inayad ti panangkalbitna iti gatilio...