Siled ti Kararag
Ni JANE REID ti Oregon, USA
Basaentayo ti Juan 6:5-13
Adda maysa nga ubing a lalaki ditoy a nagbalon iti lima a tinapay a sebadab ken dua nga ikan,” kinuna ni Andres a maysa kadagiti adalanna ken kabsat ni Simon Pedro. “Ngem ania met dagitoy iti kastoy a kaadu ti tao?”—Juan 6:9
NADLAWKO a kasapulan ti baro nga iglesia a yanko ti koro a mangidaulo iti pannakaikanta dagiti himno ti kongregasion. Maysaak a kameng ti koro ti iglesia manipud kinaubingko ket kiniddaw dagiti nataengan ti iglesia ti panangbukelko iti koro. Ngem immapay kaniak ti panagbuteng a mangpanunot iti panagidaulok iti koro. No awatek daytoy a dawat, mabalin nga igasanggasatko ti panagballigi wenno pannakapaayko iti sanguanan ti sibubukel nga iglesia.
Iti mabasa iti daytoy nga aldaw, kasla awan kaes-eskan ti sumagmamano nga ikan ken tinapay nga indaton ti ubing a lalaki no maidilig iti kaadu dagiti tao a mabisin iti dayta a gundaway. Ngem babaen ti ima ni Jesus, naaddaan ti tunggal maysa iti taraon. Idi indatonko ti nanumo a kabaelak iti musika, ninayonan ti Dios daytoy ket nabukel ti koromi. Ti kongregasionmi a dati a saan a makakanta a nasayaat gapu iti kaawan ti koro a mangidaulo kadagiti himno, makakanta itan a napnuan ragsak ken talged.
Adu dagiti kasapulantayo iti inaldaw. No dadduma, mapanunottayo a masapul nga adda mangaramid kadagitoy. Mabalin a datayo dayta. Kabaelantayo kadi nga igasanggasat ti panagballigi wenno pannakapaaytayo babaen ti panangaramidtayo kadagiti addang a kasla imposible? Napno ti Biblia kadagiti padas dagiti tattao a nangirisgo iti biagda, ket nagbalinda a kasla nakuneng ken saan a naballigi. Nagaramid da Noe, Gideon, Ester, ken David kadagiti imposible a bambanag babaen ti tulong ti Dios. Kabaelantayo met nga aramiden daytoy.
Kararag: Nailangitan nga Ama, adu dagiti kasapulan, ket nanumokami. Babaen ti tulongmo, posible amin a banag. Iti nagan ni Jesus, agkararagkami. Amen.
Kapanunotan: Kabaelan ti Dios a paaduen dagiti babassit a datonko tapno mapennek dagiti kasapulan ti adu a tattao.
Ikararagan: Dagiti koro ti iglesia.
Itoy A Bilang
tl
2021-06-16T07:00:00.0000000Z
2021-06-16T07:00:00.0000000Z
https://manilabulletin.pressreader.com/article/281728387477787
Manila Bulletin Publishing Corp