Okeyka, Apong

WEN, a, kabaelam met ti agbalin a nalaing nga agistoria. Rugiam kadagiti bukodmo nga anekdota. Ababa nga istoria daytoy a makapaisem, manggudak iti katawa, ken makapagagar maipapan iti kabibiag ti maysa a tao (kas koma kenka). Masansan a maibasar iti pudno a biag, pasamak a pakainaigan dagiti pudno a tattao, nalatak man wenno saan, kadagiti pudno a lugar. Ngem nupay kunatayo a makalinglingay, kas nadakamat iti ngato, nasken met a mangtignay wenno mangkulding iti rikna.

Ni Abraham Lincoln, maika-16 a Presidente ti Estados Unidos, ti maibilang nga Ama ti Anekdota. Epektibo ti panangusarna bayat ti administrasionna. Ita, us-usaren met ti kaaduan iti isu met laeng a pamuspusan kadagiti adu nga okasion.

* * *

Ania dagiti mangpapintas iti maysa nga anekdota?

Addaan daytoy kadagiti saguday a nainsiriban, makaparayaw, positibo ken makapatignay ken mangted iti impormasion ken mangibinglay iti adal.

Ti kombinasion dagiti nadakamat nga elemento ti mangpapintas iti maysa nga anekdota, segun kadagiti topiko ken pakaituronganna, kas koma no

•Panagpaay a maysa a naisangsangayan nga agsarita wenno aglektiur

•Mangiwardas kadagiti miting ken komperensia

•Saan a pormal a taripnong/parambak

•Mangsurat iti damdamag wenno salaysay a pakaitampokan ti maysa tao wenno banag

•Agirakurak iti radio ken telebision.

* * *

Dagiti istoria wenno anekdota, mausar a ramit tapno

•Mangidur-as iti maysa a punto (diplomatiko wenno saan a direkta nga ilaban ti maysa a punto)

•Espesipiko a panangdakamat iti no ania ti kayat nga ipaawat

•Nainggayyeman a balakad ken palagip

•Panangdayaw iti maysa a tao, institusion wenno lugar

•Panangtapik iti abaga babaen dagiti balikas ken kablaaw.

* * *

Ti anekdota, kankanayon a

•Saan a mangikasaba iti maysa a relihion wenno mangawis a mamati iti maysa a pammati

•Saan a mangdillaw, nangruna kadagiti tattao

•Saan a bulgar wenno makapasugkar dagiti balikas, saan a nakadidillaw

•Saan a pamiliar wenno kadawyan dagiti topiko

*Saan a propaganda, wenno mangpolitika

•”Bato, bato sa langit” para iti amin a no adda man matiruan, saan a nairanta. * * *

Maysa met nga arte ti panagistoria. Tun-oyen ngarud ti panagistoria a ti arte ti agbalin a pagbatayan.—O