Manila Bulletin

Young Dreamers Club (12)

Estela A. Bisquera-Guerrero

Ti Napalabas: Inabak ni Aubrey ni Nestor a presidente ti YDC. Makapungtot ni Angkel Polding aglalo ket saanda nga innala nga adbayser idinto nga innalada ni Angkel Iniong a kabsatna. Nadegdegan pay ti suronna ta naggabbo da Nestor ken Aubrey. Saanen a kayat ni Angkel Polding a mayasideg ni Nestor ken ni Aubrey.

Naminsan, inikkan ida dagiti YDC iti gundaway a makapagsolo, ngem nakita ida ni Angkel Polding ket inungtanna ni Nestor. Nagdinamag nga adda relasion da Angkel Iniong ken Anti Soledad ket limed a napan nagdamag ni Manang Zeny ken ni Lilac. Ngem dimtengni Angkel Iniong.

(Maika-12 a Paset)

AGBIMBINNALLAET ti banarbar a timek ni Angkel Polding ken ti tibong ti taul ni Tyson. Makisamsampitaw met ti ngiaw ni Menang. Ken mayipit-ipit ti ayek-ek da Anti Laling ken Manong Boyet. Makapungpungtot latta ngamin ni Angkel Polding iti panangbisong ni Nestor ken ni Aubrey.

Pasaray agsig-am ni Manong Boyet no agpangrem ni Angkel Polding. Itedna pay met laeng ti respetona iti amana. Medmedmedan ketdi ni Richard ti katawana ta dina kayat a pabaraen pay ti pungtot ti apona a lakay. Pamrayanna ti aguyek-uyek. Pasaray kudkoden met ni Nestor ti teltelna sa kumita ken ni Manong Boyet.

Kiniddayan ni Manong Boyet ti barona. Kasla aprobaranna ti inaramid ni Nestor.

“Agtalnaka man a laklakayan!” inkusilap ni Anti Laling

ken ni Angkel Polding. Ngem ketdi, nakais-isem daytoy. “Agbabaraka unay no masapulmo ti agsudor.”

Saanen a nagawidan da Richard ken Nestor ti katawada.

Ad-addan ti luksaw ni Angkel Polding. Linayatanna dagiti dua. Dinardaras dagiti agkasinsin ti nagkamang ken ni Anti Laling.

“Dayta ketdin ti pangdisdissuam kadagita appokom!” kinuna ni Anti Laling. Inalikumkomna dagiti dida nausar a pagbalkot kadagiti yem-empake ni Manong Boyet. Adda tupig, tinapa, tuyo, saluyot, marunggay ken no ania ditan a pakailiwan a makan dagiti Filipino nga agob-obra iti ballasiw-taaw.

“Konsintidorka kadagita!” Pinabaringringan ni Angkel Polding da Nestor ken Richard sa tinaliawna ni Manong Boyet.

Medmedmedan ni Manong Boyet ti isemna. Saanna met a maala ti agunget. Ken apay koma nga agunget ket nakitana ti tured ti barona?

Kinaagpaysona, awan saan a naragsakan kadakami a nakaimatang iti inaramid ni Nestor. Ngem nagdanagkami amin ta eksakto la ketdin a sumangpet met da Manong Ador ken Manang Rosa idi bisongen ni Nestor ni Aubrey. Namimpinsan a kimmitakami kadakuada. Kasta unay ti mulagat ni Manang Rosa.

Naikkat ketdi ti danagmi idi immasideg ni Manong Boyet ken ni Manong Ador. Naginnalamanoda ket kunada, “Agabalayantan, a!”

Laglag a YDC, nakunak la ket ngarud iti nakemko. Dagitoy koma nga eksena ti mayat a maalaan iti pakalaglagipan. Ngem awan la ketdin ti nakaala iti video. Uray ladawan la koma!

Ti nakasdaawanmi, kellaat a nagsangit ni Arman. Impagarupmi no bartekna. Ngem idi kuan, ikompesarna metten ti ayatna ken ni Aubrey. Daytoy met Nestor, inasitganna ni Arman sa pinikpikna ti abaga daytoy.

“Indulinmo met ngamin. ’La, ket ikupinmo lattan, a. Ania pay ngarud.”

Kasdiay koma ti kalakana a naplantsa ti ayan-ayat da Nestor ken Aubrey. Ngem kellaat a nagallangogan ti taguob ni Tyson. Addan ni Angkel Polding! No asino ket a YDC ti nangipatayab kenkuana iti napasamak. Ania pay, rimmauten. Abakna pay ni Diego Silang ta saan la a buneng ti awitna: katana! Inggapuna pay idiay Japan ti katanana a pakalaglagipanna kano. Pinagadal ti pagilian ni Angkel Polding idiay Japan. Banag a mangipaneknek iti kinasiribna. Ngem iti langana nga immay nangsangat iti sibubukel a YDC, inabakna pay ti kalalaglagan a tulisan kadagiti kadaanan a pelikula a Filipino. Kasla pay nabainan da Tyson ken Menang ket nagsardengda a nagkinnamatan ket binuyada ni Angkel Polding a kasla malaglagawan a baket a nakapukaw iti iduldulinna a kuarta de moneda. Agpadaya, agpusipos; agpalaud, agpusipos; agpaamianan, agpusipos; agpaabagatan, agpusipos!

Siempre, timmaraykami amin, a! Sika man ti maikamatan iti katana? Baut laeng ni inang idi, itarayak pay wenno umuliak iti kayo tapno diak la mabaut, daytanto ketdin katana? Siguro, kigtotmi laeng met ti panagtaraymi. Ngem no mailaw-an ngay ni Angkel Polding? Ammomi met ngarud ti ugalina a kasla bulkan no bumtak ti pungtotna.

Idi saanen a masbaalan ni Angkel Polding ti sakit ti nakem ken bannogna, intugawnan. Impukpukkawna ti nagan daydi Angkel Plaring. Ken dagidi nagannak kadakuada. Ipulpulongna ti inaramid ni Angkel Iniong. Inang, sulpeng a talaga ni Manong Iniong! kunkunana. Innayonna nga insungsong ni Angkel Iniong iti dakes ni Nestor. Napia laengen ta da Sabut ken Briton, iti panagtarayda, iti balay da Angkel Polding ti naturongda. Inayabanda ni Anti Laling. Makasuron met ni Anti Laling ta madama ti panagbuyana iti koreanovela.

Apagbiit la a nakitaripnong ni Anti Laling. ’La, agraragsakkayo ta innak maturogen, kinunana idi makapangan. Ngem kapilitan a nagsubli gapu ken ni Angkel Polding.

Immay met amin dagiti tanod ken ni Kapitana Mering. Ngem nagkatawada laeng. Dayta ti karirigatan a pannakabartek. Daytay dika nakainum iti nasanger ngem makasaepka iti dakes a damag, kinuna ni Kapitana Mering.

Uray da amang ken Angkel Pedring, immayda met simmirip. Agay-ayek-ek ken nagal-aludoyda a pimmanaw. Napia laengen ta awan ni Angkel Iniong. Iti degges ti bara ti ayatna ken ni Anti Soledad, amangan no isarangna met ti badang a pagtabtabasna iti pan-aw iti aripit ti talonna.

Nupay agkatkatawa ti kaaduan kadakami ita, nakariknaak iti asi ken ni Angkel Polding. Talaga a nauneg ti sakit ti nakemna. Agasem ta inatiw ti riknana ti panunotna? Asino met a lakay a nakaadal pay ti makabael iti inaramidna? Awan. Isuna laeng. Ket dandani la mapanko kadkaduaen idi saan a nagun-uni a nagpanaw ken napan nakiay-ayam ken ni Tyson.

APAGISU nga aginatak idi maipallailang ti kanta ni Vhen Bautista a “Kawar ni Ayat.” Napaisemak ta nalagipko da Angkel Iniong ken Anti Soledad. Nakigtotak la ket ngarud idi adda aguni iti garreta ni inang. Ni Angkel Iniong!

Domingo ita isu a nasapa a nagudong da amang ken inang. Makimisada sa itaripnosda ti agsakada iti nayon ti lako ni inang iti garreta. Timmakias metten dagiti kabbalaymi a kakaannakak isu a siak ti mapatudon nga aglako.

Kinitak ti pagorasak, agalas-otson iti bigat. Nagkiremkiremak. Naginatak manen. Naulit ti pukkaw ni Angkel Iniong.

“Mabiit la’ng, angkel,” impukkawko met. Dinardarasko ti napan nagsugigi ken nagdiram-os.

Inabay ni Nestor ni Arman. Pinikpikna ti abaga ti ulitegna. Idi saanen a masbaalan ni Arman ti sakit ti nakemna, rinakepnan ni Nestor.

“Nalangkongankan sa met, kaanakan?” nakangiit a kinuna ni Angkel Iniong idi sumrekak iti garreta. Nalangkongan kunami no nangaton ni Apo Init ngem mayat pay laeng ti uurokan.

Nagmusiigak. Damagek koma no ania ti gatangenna ngem nakitak ti iggemna a plastic bag. Medio nabasa daytoy isu a siertok a lames ti nagyanna.

“Naggapukayo idiay yan da Manang Zeny?” Inawatko ti supot nga inted ni angkel.

Nagtung-ed ni Angkel Iniong. Timmaliaw iti deppaar da Angkel Polding. Kasla sapulen dagiti matana ti buridekda. Sa idi kuan, tinaliawna met ti balay da Angkel Pedring.

“Di pay immammingaw ni buridek ditoy?” nagdusngi ni Angkel Iniong. Buridek latta ni awagna ken ni Angkel Polding uray lallakaydan. Isu siguro a kasta ti galad ni Angkel Polding a kasla agpapauyo nga ubing. Naitulangnan ti kinaburidekna. Isu a ti kayatna, isu latta ti maay-ayo. Daytay mapaspasurotan.

Ngem da met laeng Sabut ken Briton ti makapasurot ken ni Angkel Polding. Ni Shane nga apoko daydi Angkel Plaring, suberbiaennamet. Mainayon pay ni Aubrey nga apokonanton gapu ken ni Nestor. Duanton ti puor ti kararuana!

Nakakatawaak. Nagmalanga ni Angkel Iniong. “Kimmimaw met idi naminsan, angkel,” ti naladaw a sungbatko.

Immay ngamin gimmatang ni Angkel Polding iti Knorr cubes idi naminsan a malem. Nairana a kasangsangpetko met a naggapu iti obrak. Nagmanoak met latta. Dina idi yawat ti imana ngem gapun sa ta nakasango da Nana Susan ken Kapitana Mering, ta adda met immayda ginatang, napilitan. Siempre, agparang a laklakayan nga awan nakemna no kas pagarigan.

Nagdardaras ni Angkel Polding a pimmanaw apaman a nakapagmanoak. Nalipatanna pay ti suplina. Inkamat ni Nana Susan. Ni Nana Susan met, ammona la ngaruden a makasuron ni Angkel Polding kadakami amin a YDC, inangawna pay laeng. Ania ngay met ti iregalomto kada manongmo ken Idad? kinunana. Nagpagaak ni Kapitana Mering idinto a nagngernger a kas ken ni Tyson ni Angkel Polding. Idi nakadanon ni Angkel Polding iti balayda, nagsubli da Nana Susan ken Kapitana

Mering iti yan ni inang. Intugawda iti sango ti garreta. Nasapa a pinangmalemda ni Angkel Polding. No ania ket ti pakaringgoranna, a, ket di met isu ti makiatag, inkatawada.

“Ni Anti Soledad, angkel, immay idi kalman ditoy,” inkiddayko ken ni Angkel Iniong. Nagkiet daytoy ken piwis ti isemna. Kiniddayannak met.

Tunggal malem ti Sabado ngamin, agsasarak da Nana Susan, Anti Laling ken dagiti dadduma pay a babbai a Senior Citizen ditoy garreta ni inang. Adda met pannakaopisina ti Senior Citizen iti barangay hall ngem kaykayatda nga amang ti agsisinnarak ditoy. Tungtongbalatong daytan agingga a dida mauma.

Dagiti lallakay, idiay met yan da Angkel Pedring ti ayuyangda.

“Dimmagasak dita yanda.” Kinudkod ni Angkel Iniong ti teltelna. “Indagasak iti kas met laeng iti intedko kenka.” “A, saan a rosas ken tsokolate!” Nagpagaakak. “Dagiti kas pay laeng ken ni Nestor ti kasdiay ti itedda,” nagkatawa ni Angkel Iniong. Kimmita iti yan da Angkel Polding.

Nagdangay ti katawami. Naladawen idi makitami ni Angkel Polding a lumabas a naggapu iti daya. Ukodna ni Tyson. Awan met ngamin un-uni ni Tyson.

Nagsabat ti panagkita da Angkel Iniong ken Angkel Polding. Immuna a nagbaw-ing ni Angkel Polding. Ginutadna ti kawar ni Tyson. Nasaktan sa ni Tyson, nagtaul ken nagngernger. Nakasuron ni Angkel Polding. Ginutadna manen ti kawar ni Tyson. Tinaliaw ti aso ni angkel. Sa kellaat, nakiginnutta. Nakigtot ni Angkel Polding. Naibbatanna ti kawar ni Tyson. Timmaray ti aso. Agturong iti garreta!

Nagdanagkami ken Angkel Iniong. Ngem imlekkami idi ilagid ni Tyson ti ulona ken ni angkel. Kasla agipulong. Iniggaman ni angkel ti kawar ni Tyson. Inturongna daytoy iti yan ni Angkel Polding a di agkutkuti.

Impaima ni Angkel Iniong ti kawar ni Tyson ken ni Angkel Polding. Immisem, ngem imbes nga umisem met ni Angkel Polding, nagmisuot ketdi daytoy a kasla ubing a napagura. Ingguyodna ni Tyson ket simrekdan iti inaladanda.

Agwingwingiwing ni Angkel Iniong a mangkitkita iti bukot ti kabsatna.

NAIBURAIS ti sitseria a linukatan ni Sabut. Binugtak ni Shane daytoy. Ngem nagiinuna dagiti lallaki a nangpidut kadagiti tsitseria. Awan pay lima a segundo, kunada. Ginandat ni Aubrey a pateltelan ni Sabut. Nagkakatawakami ta nasiputan ni Sabut ti layat ni Aubrey ket naglisi. Ania pay, ti bukot ni Nestor ti nagdissuan ti ima ni Aubrey. Nakigtot ni Nestor ngem sakbay a makapagsao, minasahe ni Aubrey ti bukot ni Nestor.

Immarimbangaw manen dagiti YDC. Agkikinnantiawda. Dadaulo ita ni Richard. Segunda laeng da Sabut ken Briton ta inungtan ida ni Nana Susan. Kasano, impaskilda ketdin iti YDC group ti ladawan da Nana Susan ken ti simmangpet a Hawayano a boyprenna ken da Angkel Iniong ken Anti Soledad. Ti adatna, adda nalaing a nang-capture iti ladawan ket impaskilna met iti Casantiagoan Page. Ania pay, nagbalin a Flavor of the Barangay dagitoy uppat a Senior.

“Kita’m, awan timtimekna ni manong, ne.” Kinita ni Shane ni Aubrey. Nagkatawa laeng ni Nestor.

Pudno met a naipasiding ti nagan no dadduma. Kitaem, nasirib a pangulo ti kayat a sawen ti nagan a Nestor. Ngem mapukaw ti kinasiribna iti sango ni Aubrey— a dadaulo met dagiti ansisit ti kayatna a sawen.

Innala ni Nestor ti maysa pay a sitseria. Linukatanna. Indiayana kadagiti babbai ngem impaimana ken ni Aubrey.

“Oy, saan a dayta agsaramsam ti aramidentayo ditoy,” kinuna ni Nana Susan. Kinitana da Briton ken Sabut. Siniggawat ngamin ni Sabut ti nalukatan a sitseria.

Madi a talaga ti papangresan ni Nana Susan kadagiti dua. Naipalapayag ket kadakami nga inungtan dagiti annakna. Malaksid iti dayta, iramraman pay ni Angkel Polding iti pungtotna. Sungsong dayta a baket, kuna kano ni Angkel Polding. Banag a pakasuronan ni Nana Susan aglalo ket masansan a kaduada ni Anti Laling no rummuarda. Ni met Anti Laling ti para ala iti ladawan dagiti SIL, a kas kuna dagiti YDC iti Senior in Love.

“’La, wen, anti, irugitayo ngaruden ti miting.” Immisem ni Aubrey. Binagaanna dagiti YDC nga agtalnadan.

Linawlaw dagiti YDC ti lamisaan ni Kapitana Mering. Iti barangay hall ngamin ti nagsasarakanmi. Impakadami ken ni Kapitana Mering nga usarenmi ti opisinana. Tallo a lawasen kalapasan ti naudi a pasalaan a nagbayadan ti YDC. Gapu ta adda metten serrek ti kaaduan, nairanta a Domingo daytoy.

Ipinalmi ngamin dagiti mapautangan iti nabati a pundo. Nailista met ketdi idin dagitoy. Ngem tapno makita ti amin no siasino dagiti umawat, masapul nga iti daytoy a miting a mayawat ti kuarta. Iti kasta, mabain ti umutang a di agbayad. Sibubukel a YDC ti mangapa kenkuana no kaskasano.

“’La, agyamanak unay, a,” inyumbi ni Mang Paking. Isu ti maikalima ken maudi nga umawat. ”Uray dobliekto ti tubona no mayat la ketdi ti tiempona.” Namimpinsan a nag-wen dagiti YDC. Napaisemak. Nanakem met dagitoy ubbing. Linipatdan daydi madi nga imbunga ti panagsaosao ni Mang Paking iti YDC. Ad-adda a nakitada dagiti nasayaat a naitulongna.

DINUMOGAN ni Arman ti in-inumenna a Red Horse. Diak ammo no bainna ken ni Nestor— a kasangsangona— wenno tagiimasenna unay ti in-inumenna.

Tallo a lawas itan manipud daydi padespedida ni Manong Boyet. Nakasublin ni manong iti obrana iti ballasiw-taaw ngem ita laeng nga immammingaw ni Arman. Agkulkulong, kas kuna ni Angkel Pedring. No damagek ni Arman, iturturogna ti sakit ti nakemna, ipaggaak pay ni angkel a kunaen a kasla ketdin nakakatkatawa a napaay ti barona ken ni ayat. Agasem ta dina pay nayebkas, naspaken ti namnamana? Naimatangan pay ti kaaduan ti pannakapaayna. Nagdinamag ditoy barangaymi ti panagsangitna.

Ni manen Manong Paking ti nagipadamag iti panagsangit ni Arman. Ita, no adda biktima ti saysayangguseng, “napaking,” kunada. Kinaagpaysona, nagdanaganak idi nagrana da Mang Paking ken Angkel Pedring iti garreta ni inang. Immay gimmatang ni Mang Paking iti manteka idinto nga immay met gimmatang ni Angkel Pedring iti noodles. Saanda a naginnuni ngem idi agsabat dagiti matada, kellaat ketdin a nagpaggaakda. Nakigtot pay ni inang idi. Pinukkawanna a dagus ni amang. Makarkarattot met ni amang nga immasideg. Ipagarupna kano nga agkinnabil da Angkel Pedring ken Manong Paking. Ngem idi makitana a mayat ti eellekanda, nagpairuar ken ni inang ti maysa nga sprite ken dua a dos por dos wenno kuatro kantos. Ania pay, nagsasangoda a tallo. Ket ni Angkel Polding ti pinulotanda. Katkatawaanda ta kasla kano ubing daytoy. Nadakamatda met ti napasamak ken ni (Maituloy iti sumaruno a panid)

Itoy A Bilang

tl

2021-06-16T07:00:00.0000000Z

2021-06-16T07:00:00.0000000Z

https://manilabulletin.pressreader.com/article/281784222052635

Manila Bulletin Publishing Corp