Panagpapukis
Deo M. Ramos
Domingo.
Aldaw a panagpapukisko.
Sinapak ti nagriing Amanonto a makamakamko Ti maudi a misa ti bigat Tapno mabendisionanto met Ti agbalin a baro a langak—
Langa ti panagpakada
Iti tuok ti kalman
Ken panangtaldiap
Iti rikut ti napalabas,
Ket agbalinto aminen Dagitoy a paset ti lagip Namnama ken kired Tapno dagiti amin a sumuno A bigat, napimpintasto Koma pay ti panagsaadda.
Inruar ni tatang
‘Tay getteng,
‘Tay sagaysay, ‘tay labahas Rinugianna
Ti nangpukis kaniak—
Ket tunggal pannakaregreg Ti matabtab a buok Kaibatoganna ti tedted
Ti ling-et iti pannakigubal ‘diay talon Ken pannangged para iti bassit-usit A pangsilpo iti karadkad
Igiddanmi met ti agdengngeg Kadagiti damdamag iti radio Wenno agistoria maipanggep Iti adu a “koma”
Biagmi idi ubbingkami pay Ken manangko.
Ti ayan-ayatda ken nanang Ti rigatda a nangisakad
Iti inaldaw-aldaw a panagbiag…
Ket diak payen napupuotan A nalpasen ta pinagsarmingnak No mayaten, ket wen, mayat!
Ammonan ti sukog daytoy ulok. Ammonan ti kapuskol ti buokko. Ammonan ti bibisngayak.
Ket nalawag manen daytoy rupak A mangsango iti isusungad ti sabali pay A karit ti umay a dominggo.
--DEO M. RAMOS
Itoy A Bilang
tl
2021-06-16T07:00:00.0000000Z
2021-06-16T07:00:00.0000000Z
https://manilabulletin.pressreader.com/article/281870121398555
Manila Bulletin Publishing Corp