Nagsubli iti Hawaii; Nagmula iti Marunggay

Iti Filipinas, napadpadayawan ni Manong Victor gapu iti partuatna a food supplement manipud iti mangosteen. Ita, ditoy met Hawaii, aglatlatak gapu kadagiti partuatna a food supplement manipud iti marunggay.

TI pagduyosan nga aramid, sumursurot iti tao sadino man a disso ti papananna. Kasta ni Apo Victoriano Tobias B. Manzano (Manong Victor kadagiti papagayamna) ti Kihei, Maui, Hawaii. Agosto 1988 idi damo ni Manong Victor ti immay ditoy Maui. Pinetisionan ti American citizen a manongenna nga immuna a nakaumay iti Amerika. Manipud idi Oktubre 1989, kas Farm Manager ti Lahainaluna High School iti Lahaina, Maui, nangisuro iti panagtalon kadagiti estudiante iti LHS. Kangrunaan nga insurona ti panagmula iti natnateng ken kadagiti agbunga a kayo.

Idi agngalay ti School Year 2000, nagretiro. Kalpasan ti nabiit a panaginanana, nagsubli iti Fiipinas ta kas kunana, panawenen a sanguenna ti nabayagen nga uk-ukopan ti panunotna, ti agaramid iti bukodna a food supplement a manamnama a mangpasayaat iti salun-at ken mangpaatiddog iti biag. Kas kunana, patienna nga agur-uray laeng daytoy a food supplement manipud a mismo kadagiti mula wenno prutas nga adda iti aglawlawna.

Ket idi 2004, kalpasan ti nasurok nga uppat a tawen a panagan-anus, nagballigi ni Manong Victor a nakaaramid iti food supplement manipud iti prutas a mangosteen. Iti bilang ti Bannawag idi Agosto 14, 2006, naipablaak ti salaysay nga “Atipaen Daytoy a Bunga Dagiti Sakit” a sinurat met laeng ‘toy numo maipanggep iti panagballigi ni Manong Victor a nangtakuat kadagiti nagkaadu a benepisio a maala manipud itoy a prutas a para iti pannakasaluad ti salun-at ti tao.

Daytoy a food supplement a pinarnuayna ken pinanagananna iti GMAX Mangosteen Capsule, napadayawan a kas “Best Filipino Herbal Food Supplement” idi 2005 manipud iti National Product Quality Excellence Awards, National Council for Product and Service Quality, ken Consumer Today Magazine. Naangay ti pammadayaw a seremonia idi Pebrero 22, 2006 iti Mandarin Oriental Hotel iti Makati City. Naipaay pay iti GMAX ti Best Supplement Products manipud iti Philippine Brillance Awards for Product Services Awarding Body idi Nobiembre 9, 2006.

Iti panangpataud ni Manong

Victor iti nasao a food supplement (adda pay dua a sabsabali manipud met laeng iti mangosteen), inaramatna ti bagina a guinea pig wenno pagipadasan iti no mano a bulan tapno maamirisna ti epekto ti tubbog ti prutas a mangosteen iti bagi ti tao. Insuratna iti inaldaw ti oras a panaginumna iti tubbog ti prutas, ti nariknana, ken ti paliiwna a panagbaliw ti resistansia ti bagina iti sakit.

Dagitoy a natakuatanna iti insayangkatna a panagamiris ti balonna idi agkiddaw iti pammalubos manipud iti gobierno ti Filipinas nga agpartuat iti food supplement manipud iti mangosteen, nga idi agangay, daytoy ti nagbalin met a lisensiana a nagpartuat iti GMAX Mangosteen Capsule.

Narimat ti masakbayan ti GMAX a kas makitkita idi ni Manong Victor—a pimmudno met. Ngem idi agngalay ti tawen 2017 ken nasapa a 2018, rimmuar dagiti nagkaadu a partuat a food supplement manipud met laeng iti mangosteen. Nalawag a nakita metten dagiti dadduma a food supplement manufacturers ti potensial ti nasao a prutas ket nagaramidda metten iti kakastoy a