Masarakannak

Iti umanasaas a danum

A mangkarkaradap iti di pulos kumarantiway a waig A mamagtibnok kadagiti dara ti bantay ken taaw.

Iti sagawisiw ti angin

A mangilillili iti barikir a natina iti langto

A namagsaip kadagiti kararua ti bangkag ken kinelleng.

Iti taraok dagiti ukong ken abuyo

A mangidirdir-i iti wayawaya dagiti maris A nangbatek kadagiti barukong ti turod ken tanap.

Iti dilpat ti awan inarna nga init A mangipimpinta iti sanaang

A nangpisang kadagiti dayaw ti langit ken daga.

Iti tarakitik ti agdungdung-aw a bayakabak A mangsebsebseb iti pungtot ti gura

A nangrunaw kadagiti kired ti bagi ken anniniwan.

Iti dalipato ti nasipngetan a kandela A likawlikawen ti sumanengseng a legleg A mangud-udong iti isem ti bulan ken bituen.

Iti siplag dagiti mamarbangon a panniki

A manggundaway aringgawis ti narnuoyan bunga a tampuy A mangbambantay kadagiti tanem ti malem ken agsapa.

--RONNIE E. AGUINALDO