Ti Naimut a Mannalon

IDI un-unana a panawen, adda maysa a mannalon a napan naglako iti bunga ti mulana a mangga iti ili. Inkarisonna dagiti bunga. Nakaim-imas ti luom dagiti bunga ket maysa nga agpalpalama ti immasideg iti mannalon.

“Pangngaasim man, apo, ta padawatannak man iti uray maysa la a bunga,” impakaasi ti agpalpalama.

Saan nga inkaskaso ti mannalon ti agpalpalama a mangigalgalut iti bakana iti asideg ti karisonna idinto a di met mauma nga agpakpakaasi ti agpalpalama a padawatan koma ti mannalon iti kanenna a bunga. Agingga iti nakapungtot ti mannalon ket nagsasawanna ti agpalpalama.

“Apay nga agpungtotka?” kinuna ti agpalpalama iti mannalon. “Umdas kadin ti maymaysa a mangga a mamagbalin kenka a napanglaw?”

Adda nangngaasi iti agpalpalama ket inggatanganna daytoy iti maysa a bunga.

Nagyaman ti agpalpalama sa kinunana, “Ti maysa a kaniak a nangtallikud iti lubong, saan ngarud a napanglaw. Adu met dagiti bunga ti manggak. Napintas met ti luomda a kas iti daytoy!”

“No pudno,” kinuna ti maysa nga adda iti asideg ti agpalpalama, “apay pay la ngarud a dimmawatka?”

“Agmulaak pay, a!” insungbat ti agpalpalama.

Ket idi makannan ti mangga, immulana ti kabut daytoy iti padpaddakanna a nadam-eg a daga.

Kailumlumlomna iti daytoy idi pagammuan ta nagtubo. In-inut a dimmakkel ket anian a siddaaw dagiti tattao idi agbalinen a naananay a pinuon ti mangga a narnuoyan iti bunga.

Ti mannalon, pinanawanna metten dagiti lakona a bunga ti mangga ket nakilinnetlet kadagiti tattao a napalalo ti siddaawda iti napasamak.

“Ala, pagbibingayantayo ti bunga dagiti manggak!” inyawis ti agpalpalama kadagiti tattao.

Idi awanen ti uray maysa a bunga ti mangga, nagpasapul ti agpalpalama iti wasay sa pinukannan ti mangga.

Idi laeng met a malagip ti mannalon dagiti lakona a mangga. Ket anian a siddaawna ta awanen uray maysa. Naamirisna a dagiti lakona a mangga ti pinagbibingayan dagiti tattao. Ti met karisonna, narakraken daytoy. Nadagumpo daytoy a kunam la no nawasaywasay.

“Dimo kadi am-ammo daydiay nga agpalpalama?” adda nangyarasaas iti mannalon. “Maysa a nalaing a salamangkero!”

Idi agsubli ti mannalon iti yan ti napukan a mangga, awanen ti agpalpalama. Ket idi malagipna ti bakana, saanna metten a nasapulan. Adda nagkuna a nagsakayan ti agpalpalama ngem awan met makaitudo iti nagturonganna.—O