Ti Tarakenmo ken Sika

MALAKSID iti pannakailiklikda iti rabies, nasken a mabakunaan dagiti uken ken babassit pay nga aso tapno masalaknibanda kadagiti nakaro a sakit. Makatulong ti pannakabakuna dagiti uken tapno mapakired ti sistema ti naturalesada (immune system) a mangsalaknib kadakuada kadagiti nagduduma a nakaro a sakit.

Kangrunaan kadagiti sakit ti taraken nga aso a salakniban ti bakuna ti canine parvovirus, canine distemper, hepatitis, rabies ken leptospirosis.

Nalaka a mayakar ti sakit a canine parvovirus a mangapektar kadagiti aso. Dumanon iti 91 a porsiento a pakaigapuan ti ipapatay dagiti taraken nga aso no saanda a mabakunaan iti daytoy a sakit.

Magun-od ti uken daytoy a sakit no angot-angoten wenno dilpatanna ti naimpektaran a banag ken uray pay ti panangipaunegna iti impektado a takki ti ayup.

Kadawyan a maipan iti beterinario dagiti aso nga agsagaba iti daytoy a sakit.

Makaakar met ti canine distemper a mangimpektar iti sistema ti panaganges, pangtunaw iti makan, ken iti utek dagiti dagiti uken ken dadakkel nga aso.

Aglulua iti kasla ano ti maimpektaran nga aso, aggurigor, agbuteg, aguyek, aglaladut, saan mangan ken agsaruasarua.

Seknan met ti hepatitis ti dalem dagiti ayup. Napateg ti dalem a mangproseso kadagiti sustansia, mangsagat iti dara ken mangsaranget iti impeksion.

Maysa a nakaro a nasakit ti leptospirosis a kadawyan nga agtungpal iti ipapatay ti ayup. Sumrek ti mikrobio iti bagi ti ayup babaen ti sugat ken garumiad wenno iti ngiwat, agong ken mata ti ayup.

Maliklikan ti rabies no mabakunaan ti taraken nga ayup.

Mayakar ti rabies babaen ti kagat dagiti ayup. Apektaran ti bayrus ti rabies ti utek ti ayup agraman ti tao.

No maakaran ti tao iti bayrus ti rabies, kasla saan a maibturan dagiti sintomana a pakairamanan ti nalabes pannakariribuk, panagamammangaw, pannakaparalisa ken panagbuteng iti lawag ken danum. Kadawyan a tinawen ti pannakaited ti bakuna kadagiti taraken nga aso. Malaksid kadagiti nadakamat iti ngato, adda pay dagiti sabsabali a sakit a salakniban ti bakuna dagiti taraken nga aso.—O