Manila Bulletin

Panangimaton iti Pagtaengan

Ni JONALIZA P. CABISARES

ADDA dagiti inaldaw a mapan iti gym, agpagnapagna, agtaraytaray, agbisibisikleta ken dadduma pay a wagas ti panagwatwat ti maikawa iti daytoy a panawen ti pandemia.

Adu ngamin dagiti maipatpataw a restriksion wenno maiparit pay ketdin ti rummuar a mapan agwatwat kangrunaanna kadagiti nataengan.

Nupay kasta, makawatwat met latta ti asino man a kameng ti pamilia no tumulong nga agiwakas kadagiti aramid iti pagtaengan.

Adu met laeng dagiti mapukaw a kaloria (calories) babaen ti panaggarawgaraw iti uneg ti balay wenno iti las-ud ti inaladan.

Adu ngamin ti saan a mangibilbilang a panagwatwat met laeng ti panaggarawgaraw iti uneg ti pagtaengan wenno iti arubayan.

Agpayso a saan a maipaay ti panagtrabaho iti uneg ti balay dagiti pagbatayan nga alagaden ti panagwatwat. Ngem babaen ti panaggarawgaraw iti panagiwakas kadagiti aramid iti pagtaengan, adu met laeng ti ipaayna iti pannakapasayaat ti salun-at.

No ibilang ti panagiwakas kadagiti aramid iti pagtaengan a kas panagwatwat, saanen a nasken a rummuar pay a makilaoklaok kadagiti nagduduma a tattao a mabalin a pakaakaran iti sakit.

Makatulong ti panagtrabaho iti balay a kas iti panangisayangkat iti disimpeksion ken panagdalusdalus tapno mapaksiat dagiti mikrobio a pakaigapuan dagiti nagduduma a sakit malaksid iti pannakawatwat.

No adu ti pakakumikoman iti pagtaengan, maikabassit pay ti pannakatuok wenno pannakaburibor.

Mapasimbeng ti turog no awan pakaburiboran nga agtungpal iti nasaysayaat a salun-at.

Adda dagiti naisaysayangkat a panagadal a maikabassit ti risgo ti sakit ti puso no agtrabaho iti pagtaengan a kas koma iti panaglampaso iti suelo ken panagsagad a pakaigapuan ti panagling-et.

Kadawyan ngamin a bilbilangen dagiti egehersisio ti kaadu ti kaloria a mapukawda no agpagnapagna wenno agtaraytarayda. Saanda a makarkulo ti mapukaw a kaloria no nagduduma dagiti aramidenda iti pagtaengan ta kadawyan a dagiti laeng maibalbalakad a panagwatwat ti imet dagiti grapiko.

Ngem uray no kasta, saan koma a barengbarengen ti ehersisio nga ipaay ti panagtrabaho iti balay. Kinapudnona, adu itan dagiti mangibalbalakad a maysa met a wagas ti panangwatwat ti panagtrabaho iti balay, panagmulamula wenno panagdalusdalus iti arubayan.—O

“Madukotanka?” kinuna ni Rudy a nakadlaw iti garaw ni John.

“Duan nga oras ti napalabas sipud inawagam ti operation center ti black site, awan pay imbaonda a drone wenno helikopter...” kinuna ni John.

“Just be patient...” insungbat ni Rudy a nakaabay iti riple. “Namatida ngata?”

“Adda ngata rason a saanda a mamati? Inteksko pay ti location-ta.” “Ngem apay a nakaul-ulimek?” “Amangan no addan satellite a mangsisiim kadata...” Timmangad ni Rudy.

“Mabalin. Mabalin met nga awan,” kinuna ni John. Inyangklana manen dagiti matana iti largabista. Impalawlawna ti panagkitana iti tangatang, ngem awan ti makitana malaksid iti asul a law-ang. Ngem madamdama laeng, adda naparaipusanna a nakabasbassit a banag. Nagkirem. Inakkalna ti largabista kadagiti matana. Tinangadna ti langit. Sinapulna ti banag a nakitana. Ngem awan.

“Adda nakitam?” sinaludsod ni Rudy.

“Diak sigurado. Amangan no nasidsidap ti panagkitam.” Inyawat ni John ti largabista ken ni Rudy. “Padasem man...”

Inawat ni Rudy ti largabista. Siniripna sa impalawlawna ti panagkitana iti law-ang. Agingga iti nagsardeng. “Adda drone,” nayesngawna.

Pinidut a dagus ni John ti riple. Kinayangna ti tripod daytoy sa imparabawna iti beranda. Nagparintumeng a nangsirig iti scope.

“Right on top of us,” kinuna ni Rudy. “Can you see it?”

Saan a simmungbat ni John. Insapulna ketdi ti scope agingga a natumbokna ti drone. Nakataltalna ti drone nga agtaytayab iti ngatuenda.

Ingguyod ni John ti firing pin sa insublina ket naisaleksek ti dakkel a bala iti tsamber ti riple. Sinirigna manen ti nakangatngato a drone. Kabaelanna daytoy. Naipatengngan ti drone iti X iti scope. Inyapirasna ti tamudona iti gatilio. Nakataltalnan. Nakasentro pay laeng iti X ti drone. Nakain-inayad ti panangkalbitna iti gatilio.

Itoy A Bilang

tl

2021-06-16T07:00:00.0000000Z

2021-06-16T07:00:00.0000000Z

https://manilabulletin.pressreader.com/article/282093459697947

Manila Bulletin Publishing Corp