Ading Kosinera

ITOY a bilang, ibinglay met kadatayo ni Jannet Jane Cuepo ti Brgy. 2, Pasuquin, Ilocos Norte, ti resipena iti cheese pandesal. Saan a panagluto ti tinurpos ni Jane ngem naayat iti panaglutoluto. Iti di nagbayag, inibbatanna ti trabahona tapno maipamaysanan daytoy a pagesmanna agingga a binangonna ti H & J Cake Shop. Sinanay ti MMSU ni Jane idi 2018. Kangrunaan a nangibinglay kenkuana iti sursuro maipanggep iti panagproseso iti taraon ti College of Industrial Technology (CIT).

Dagiti Kasapulan:

2 cups, all-purpose nga arina

1 kutsarita nga asin

14 gramo wenno 1 kutsara nga instant yeast 2 bukel nga itlog

¼ cup nga asukar

1 cup a gatas

2 cup a gatas ebaporada

2 kutsara a butter

Babassit nga iwa ti keso (cheese) a para filling Bread crumbs

Panangisagana:

1. I-preheat ti orno (oven) iti 1800C.

2. Mangala iti malukong (bowl). Paglalaoken ti arina, asin, ken instant yeast.

3. Batilen ti itlog iti sabali a malukong. Ilaok ti gatas ken asukar.

4. Inayon ti egg-milk mixture iti napaglalaok a namaga nga ingrediente.

5. Paglalaoken ken masaen a nasayaat. No awan ti stand mixer, mabalin met ti ima a pagmasa. Pormaen a bolabola. Bay-an iti dua a minuto.

6. Ikabil iti butter kalpasan ti dua a minuto. Gamayen manen iti 10 agingga’t 15 a minuto.

7. Ikabil ti mixture iti malukong a nasapsapuan iti manteka. Kaluban iti nadalus a lupot. Bay-an nga umalsa iti uneg ti maysa nga oras.

8. Ikkaten ti mixture/dough iti malukong kalpasan ti maysa nga oras. Masaen manen iti maysa a minuto.

9. Iw-iwaen daytoy iti 18 a pedaso. Pormaen a bolabola. Bay-an iti apagapaman.

10. Kalpasanna, ikkan iti keso ti unegna.

11. Warakiwakan iti bread crumbs dagiti naaramid a bolabola. Ikabil iti baking pan. Bay-an manen nga umalsa iti maysa nga oras.

12. Kalpasanna, iluto daytoy iti 15 agingga iti 20 a minuto.

13. Adawen kalpasanna. Addan naimas a pandesal nga ipabulon iti kape.—O