Manila Bulletin

Ti Gasatmo

Ni MADAM CHARISMA

GEMINI (Mayo 21- Hunio 20). Dayta nasumokmo, agpapan pay digital, sugal latta dayta ket addanto tiempo ti pannakaungkos. Ti panangusarmo a naimbag kadagiti talentom ti mangyadayo kenka iti dakes nga aramid. Adda met maganar iti talento nangruna no makita ti tao a respetarem dayta bukodmo a bagi ken paglaingan. Nagasat a numero: 2, 5, 9.

CANCER (Hunio 21- Hulio 20). Apagapaman nga agduaduaka iti kabaelam. Masapul a saanka nga agdanag. Addada dagiti nasinged kenka a mabalin a pagpataklinan ken sumakduam iti pigsa ti pakinakem. Kinapraktikal ti solusion ti parikutmo. Nagasat a numero: 3, 7, 8.

LEO (Hulio 21- Agosto 20). No usaren a nasayaat ti panunot, makaramanka met iti kinasaliwanwan a saan a masapul nga agbarayuboyka. Masapul a natibkerka a mangtakder iti pammatim iti laksid a maysa kadagiti nagtamdam ti mangkuestionar iti daytoy. Nagasat a numero: 1, 6, 7.

VIRGO (Agosto 21- Septiembre 22). Dumteng laeng ti grasia no maatiwmo ti kinaliday a nangsallukob kenka. Saan met a magibusan dayta a kinaliday no naynay a nakaserra ti pusom para iti baro nga ayat. Kinaromantiko laeng ti ibagbagada nga agnanayon ti patempateg ta ti pudno, adda latta baro nga ayat a nakasagana a mangawat kenka. Nagasat a numero: 2, 5, 9.

LIBRA (Septiembre 23- Oktubre 22). Lumawag ti maysa a banag a nalidem wenno narikut kenka gapu iti pannakalukat ti panunot ket mapalugodam nga agsepen ti kinataom dagiti baro a bambanag iti aglawlaw. Masursurom met a salakniban ti bukodmo a bagi ket ad-adda pay a maitunda iti disso a pabor iti panagdur-asmo. Nagasat a numero: 1, 4, 7.

SCORPIO (Oktubre 23- Nobiembre 22). Adda dagiti nasken nga isakripisio a kas sukat dagiti balakad dagiti eksperto a kasapulam met iti idudurasmo. Dakdakkel ti magastosmo no makigasanggasatka kadagiti bambanag nga agkamtud met ti ammom. Nagasat a numero: 2, 5, 8.

SAGITTARIUS (Nobiembre 23Disiembre 20). Mapasubli ti nagtammeng a panagtalek iti bagi babaen ti panangaramid laeng kadagiti pagirayan ti rikna. Mailisi kadagiti tattao a riro laeng ti kitkitaenda. Maipaay met ti tiempo kadagiti patpatgen iti daytoy a biag. Nagasat a numero: 1, 6, 9.

CAPRICORN (Disiembre 21- Enero 19). Maiturong met laeng iti umno ti lawas baaben ti madagdagus a pannakakorehir kadagiti riro. Adda dagiti duogan a pammati a no idian, sumrek dagiti baro a mangitunda met iti grasia. Pangngeddeng nga awan ti ikikkanna ti mangipaay kenka iti respeto iti yanmo a tay-ak. Nagasat a numero: 2, 4, 8.

AQUARIUS (Enero 20- Pebrero 19). Adda dagiti bambanag a maisayangkat saan a babaen ti puersa wenno pinnilitan no di ket babaen ti panagkaykaysa ken panagtitinnulong. No saklotem dagiti dakulapmo, agammusaykanto ta addan nakauna kadagiti kayatmo nga aramiden. Nagasat a numero: 1, 5, 9.

PISCES (Pebrero 20- Marso 20). Adda dagiti lugar a pakariknaam iti talinaay ken pannakapnek. Daytoy ti nasken a mabirokam. Ditoy met a rumang-ayka iti pinansial a tay-ak ken iti kinatao. Kabayatanna, maitultuloymo ti tumulong iti sabali. Nagasat a numero: 3, 4, 7.

ARIES (Marso 21- Abril 20). Tungedan laeng ti maysa a proyekto no talaga a maipasiguradom a kabaelam nga aramiden. Masuotka kadagiti pangngeddeng a yetnagmo. Agpatarabayka laeng iti puso ken panunotmo. Asitgan ti tao a mangipakita kadagiti bambanag a kayatmo a makita. Nagasat a numero: 2, 6, 8.

TAURUS (Abril 21- Mayo 20). Agannad ta adda dagiti diaya ita a kasla naimbag ngem iti kinapudnona, kasla kanunong a mangkunnot iti adda a sustansiam. Adda dagiti gannuat a nasaysayaat nga ibbatanen tapno makainutka; dagus a mapasublim nangruna no irusat ti pagganaran nga ad-adda nga ipangrunam ti pagimbagan ti sabali. Nagasat a numero: 1, 5, 7.

Itoy A Bilang

tl

2021-06-16T07:00:00.0000000Z

2021-06-16T07:00:00.0000000Z

https://manilabulletin.pressreader.com/article/282230898651419

Manila Bulletin Publishing Corp