Nakapagpabalay ni Andrea Gapu iti Social Media

KUNA ni Andrea Brillantes a gapu kadagiti paskilna iti social media, nakaipatakder iti balay a maysa a Mediterranean a nabayagen nga arapaap ti pamiliada.

Inakona iti naangay a virtual mediacon ti baro a digital anthology series ti ABS-CBN a “Click, Like, Share” a saan nga umanay dagiti magangganarna kadagiti teleserye para iti nasao a balay. Daytoy ti gapuna nga inanusanna ti nagpaskil kadagiti nadumaduma a platform iti social media kas iti TikTok ken Musically tapno makaala kadagiti adu a raket (wenno anunsio).

Adda ketdi madi a naipaay kenkuana iti social media ta iti edadna a 12, napadasannan ti nabulbully. Ngem gapu ta isu ti para ganar iti pamiliada, pinatibkerna ti pakinakemna.

Iti sabali a bangir, kakaduana iti “Click, Like, Share” da Francine Diaz, Kyle Echarri ken Seth Fedelin ken mabuya iti KTX.ph, iWantTFC, ken TFC IPTV.

* * * Kalpasan ti panagpakadana iti “Ang Probinsyano,” mabuya ni Yassi Pressman kas host iti “Rolling In It Philippines” a bersion iti pagilian ti nalatak nga ay-ayam iti United Kingdom. Mabuya daytoy iti tunggal Domingo iti alas otso iti rabii iti Cignal TV CH. 3, SatLite CH. 30, ken iti Cignal Play App a mabalin a madownload a libre para kadagiti agusuar iti Android ken iOS.

Kinapudnona, daytoy “Rolling In It Philippines” ti rason ni Yassi a nagpakada iti “Ang Probinsyano” ken inakona a dakkel a risgo daytoy kenkuana.

Masapul nga agpakada iti nasao a teleserye ta marigatan met iti aggiddan a dua a trabaho.—O