Manila Bulletin

Nangaramid ni Apo Kapitan iti Kasuratan ti Panagsina

Ni RTC Judge JOVEN F. COSTALES (Ret.)

SALUDSOD:

‘Toy kapiduak a babai, nagkallaysada ken lakayna, pito a tawenen ti napalabas. Nagbalin a managkabil ti lakay ‘toy kapiduak. Kinapudnona, iti naminsan, binekkelna pay ti kapiduak. Gapu iti daytoy, impulong ni kapid ni lakayna iti Barangay Lupon. Iti Lupon, napagnumuan dagiti agassawa nga agsinadan. Nangaramid ni Apo Kapitan iti kasuratan ti panagsinada a napauluan iti “Kontrata ti Panagsina Dagiti Agassawa.” Naipan iti kasuratan a mabalinda metten ti makiasawa iti sabali; a ti kakaisuna nga anakda nga agtawen iti lima, ni nanangna ti papananna ngem masapul a sustentuan ti lalaki, kas ama ti ubing. Nagpirma dagiti agassawa ken pinaneknekan ni Apo Kapitan ken dagiti kameng ti Barangay Lupon. Nanotarioan pay ti kontrata.

Kalpasan ti makatawen, nakiasawan ti lalaki iti sabali a babai. Ni kapiduak, impamaysana a tinaraken ti anakna. Ngem manipud met idi nagsinada ken kapiduak, di met nangnangted ti lalaki iti sustento. Ti rason ti lalaki, gapu kano ta idi kano pay laeng, adda lalaki ti kapiduak.

Ania itan ti aramiden ti kapiduak, Apo Hues? Mapadpadakes la ngaruden, awan pay sustento a maalana iti dati a lakayna a para iti anakda.—Sofia ti Ilocos Sur

SUNGBAT:

Iti pagiliantayo (Filipinas), mabalin nga agsina dagiti agassawa no masurot la ketdi ti linteg ken aprobaran ti korte. Adda ‘tay panagsina a saandan nga agkabbalay (legal separation). Adda ‘tay pannakawaswas ti kontrata (annulment of marriage).

Ti naaramid iti kapiduam ken iti lakayna, nagsinada babaen ti opisina ti barangay. Kunam a nanotarioan pay. No asino ti nangnotario, mabalin a saan a pudno nga abogado. Ta daytoy nga inaramid ti opisina ti barangay, nolo! Awan bilegna. Daydi panagkallaysa da kapiduam ken lakayna, mabalin nga iti hues wenno iti simbaan, saan a kas karina a maawan ti bilegna gapu laeng iti pribado a dokumento. Ket ita, kas nakunam, nakiasawa iti sabali ti lakay ti kapiduam; ngarud, nagbasol iti bigamia a ti dusana, pannakaibalud iti 12 a tawen (Art. 349 ti Revised Penal Code). Ti dina panangsuportar iti menor de edad a putotna, maibalud met iti 12 a tawen (Akta Republika 9272).

Isu nga ibagam iti kapiduam a mapan iti opisina ti Public Attorney’s Office (PAO) dita probinsiayo ta idarumna ni lakayna—no kayatna.—O

Pangunahing Pahina

tl

2021-09-16T07:00:00.0000000Z

2021-09-16T07:00:00.0000000Z

https://manilabulletin.pressreader.com/article/281556588969314

Manila Bulletin Publishing Corp