Ti Puga

Ti Napalabas: Pinabettak da John ti cottage a sinerrek ti strike team ti CIA. Naalada pay ni Mr. Hutchison ngem naipasuli ida da Sekretario Sandoval. Pinalubosanda ida ngem inikkanda laeng ida iti 24 nga oras a wayawaya. Naamiris ni John a kasapulanna ti tulong ti Al-Sujud Brotherhood ket inawaganna ni Sgt. Ramirez. Inkeddengda a mulaan iti “bug” ti pagtaengen ti Sekretario. Dina ammo a kasta met ti ranta da Melanie. Nasukalanda ken Agent Schummer iti uneg ti inaladan ti pagtaengan ti Sekretario. Dimteng ti helikopter a mangala ken ni Agent Schummer ket bimmitin ni John, ngem timmapuak idi addadan iti paset ti bantay a nabengbeng ti niebe. Natiliw met ti polis ni Rudy ket imbilin ti Sekretario iti Direktor a mapanda alaen ni Rudy.

N(Maika-38 a Paset) AKATUGAW nga agmaymaysa ni Rudy iti sango ti bassit a lamisaan iti nailet a kuarto. Nakaposas ti kanawan a takiagna ken nayangkla iti landok a naimontar iti ngatuen a mismo ti lamisaan. Ipalpalawlawna ti panagkitana iti uneg ti kuarto. Sapsapulenna ti nakaikapetan ti kamera. Ngem awan makitana.

Nagintek dagiti matana iti dakkel a sarming a pannakatawa ti kuarto. One-way mirror daytoy. Masiguradona nga adda tao a mangbuybuya kenkuana iti bangir dayta a sarming.

Napaanges iti nauneg. Naliklikanna dagiti mangkamkamat kenkuana a dina am-ammo ngem nagtinnag iti ima dagiti polis. Ammona ketdi a saanda a mabalin a tenglen iti mabayag. Ammona, awan ti pakakitaan a nagaramid iti krimen.

Madamdama pay, nailukat ti ridaw. Nagparang ti maysa a lumakay metten. Inrikepna met laeng ti ridaw sa nagturong iti sango ni Rudy. Indissona iti lamisaan ti iPad nga iggemna sa ginuyodna ti tugaw. Insagpatna ti kanawan a sakana iti daytoy sa kinunana, “Good morning, Mr. Rudy Agnes.”

“Good morning, sir...” insungbat ni Rudy.

“I’m Detective Roland Everett, Senior Investigative Officer, Violent Crime Unit.” Inruar ti lakay ti wallet-na sa inukradna ket impakitana ken ni Rudy ti tsapana.

“Nice meeting you, Detective Everett...” kinuna ni Rudy. “Can I go now?”

“No nakasaganakan a mangibaga no ania ti kaaddam iti daydiay nga eksklusibo a subdibision... ken ibagam no asino ti kaduam a nakastrek iti uneg ti inaladan ti maysa a nangato a turayen ti gobierno...”

“Nasungbatak amin dagiti saludsod ti immun-una nga imbestigadoryo. Awanen ti sabali pay a mainayonko.”

“Nayaw-awanka laeng iti daydiay a subdibision, kasdiay?” Nagkatawa ti detektib.

Nagtung-ed ni Rudy. “Kas kinunakon itay.” “Saanka nga agnaed sadiay. Adda maskaram, adda paltogmo, ken, nakakaskasdaaw, adda pay emergency remote control-mo iti gate a dagiti laeng polis ken first responder ti rumbeng a maaddaan... Ken nakasuotka pay iti bulletproof vest. Normal kadi dagita kenka? Kasano a mailawlawagmo dagita?”

“Tapno ammoyo, sir, dayta naisangsangayan a remote control, adda magatang iti black market...”

“Isu a naaddaanka tapno makastrekka iti subdibision... a naka-bulletproof vest...”

Saan a naguni ni Rudy.

“Ket nairanrana laeng ti kaaddam iti dayta a subdibision iti nairana met a pannakaserrek ti maysa a pribado a pagtaengan...”

“Diak man ammo nga adda naserrek, sir...” “Dimo nangngeg dagiti nagsasaruno a kanalbuong?” “Nangngegko, sir... isu a pumanawak koman ta diak kayat ti mairamraman...”

“Ket inan-anom ti maysa a guardia?”

“Ania a guardia?”

Kellaat, minaso ti detektib ti lamisaan babaen ti imana.

Timmangad ni Rudy; saan a nagun-uni. “Kitaem dayta video dita.” Biniag ti detektib ti iPad. “Asino dayta?”

Kinita ni Rudy ti video. Ti panangilibbaagna iti ridaw ti luganna iti guardia. Sa ti panangkugtarna iti natulid a guardia ken ti panangguyodna iti daytoy tapno ipaknina.

“Nakapaturong ti paltogna kaniak, sir. Dinepensaak laeng ti bagik. Sa adda nangkamat kaniak a maysa nga SUV. Pinaltogandak. Dinungparda ti luganko. Yan ti video-na? Apay nga awan?” Tinangad manen ni Rudy ti detektib.

“Saannak a yaw-awan!” indil-ag ti detektib.

“Sa ti video dagiti guardia iti gate a nakapaturong dagiti paltogda kaniak...”

“A natayda gapu ta adda nangpaltog kadakuada... Sa pinadungparmo a dinadael ti gate...”

“Awan ti ammok iti pannakatay dagiti guardia...” “You are lying... and who the hell are you?”

“I am nobody...”

“Agkuskusitka!” imbugkaw manen ti detektib. “Asinoka? Apay nga addaka iti daydiay a subdibision?”

“Imbagakon ti naganko. Naitedko payen ti social security number-ko tapno ma-trace-yo ti kinasiasinok...” Naparasaw ti detektib.

Madlaw ni Rudy ti suron ti detektib. Ammona nga insearch-dan ti naganna iti computer ngem masiguradona nga adun ti pinunas ti ahensia kadagiti rekordna. Dida kayat a maammuan nga agtrabaho iti CIA.

“Saysayangem laeng ti orasmo, detektib. Awan krimen nga inaramidko. Agpayso a simrekak iti pribado a subdibision ngem awan ti tinakawko. Isu a palubosandakon...”

Nagtanabutob ti detektib. Nagturong iti sango ti dakkel a one-way mirror a kasla adda sapsapulenna a tao iti likudan daytoy.

CIA CLANDESTINE OPERATION CENTER, LOS ANGELES, CALIFORNIA: Mangemkemkem pay laeng ni Melanie. Agpagnapagna iti uneg ti serveillance room. Mabuybuyada pay laeng kadagiti adu a monitor ti mapaspasamak iti pagtaengan ni Secretary Sandoval. Adu pay laeng dagiti pannakabagi ti linteg— a siguradona a kaaduan kadagitoy ti kameng ti Crime Scene Unit ta kayatda a mapidut amin a mabalin nga ebidensia tapno matuntonda ti kinaasino dagiti simrek iti pagtaengan. Ngem agtalek iti kabaelan ni Agent Schummer. Ammona nga awan ti imbati daytoy a tugot sadiay ket siguradona nga awanto ti makaammo nga adda pannakainaig ti ahensia iti daytoy pasamak. Isuna laeng ta napaayda a mangammo ti pakainaigan ni Secretary Sandoval kada Mr. Aleksandr ken Pablo Sarmiento.

Ngem makauray dayta. Ti nasken, mapengdanda ti pannakaiserrek ti dirty bomb iti Amerika.

Nasinga iti panagkiriring ti selponna. Ginammatanna a dagus sa kinitana ti caller ID. Ni Agent Schummer.

1

Narukopkami a mannaniw. Nakalaklaka a mabubuong ti tunggal maysa kadakami. A, ket, no kua, bukodanmi met laeng ti mangpidut iti tunggal ribak ti nabuong a kinataomi. Sa saggaysa nga idekdekketmi dagiti ribak babaen dagiti balikas a mapidpidutmi iti parparaangan, balikas nga igaygayyagay ti puyupoy. Balikas ti pamigket tapno mabukelkami manen. Isu laeng met ti maistoriami, istoria dagiti piglat manipud pannakabuongmi. Ta narukopkami a mannaniw. Isu ti ilemlemmengmi iti likudam, narasi a kortina.

2

Sika ti mangiduldulin kadagiti ilimlimedmi a liday ken rag-o. Sika ti saksi ti iduldulinmi nga ayat, a saanmi a maipeksa iti uray asino man. Sika ti kakaisuna a gayyemmi, kakaisuna a kabsat. Nangngegko nga agkatkatawaka idi agsapa a nariingak iti abay ti kaayan-ayat. Sa pinadasmo a gaw-aten koma ti nakaturog a rupana, sa kusokusuem koma ti buokna. Sa idi apagriingna, sika ti immuna a namatmatanna. Sa immisem iti isem a para laeng kaniak. Pakawanennak, gayyem, ngem kaniak latta ti isem ken aprosna.

Ngem sika laeng ti makaammo iti pudno a naganko ken iti pudno a naganna. Sika laeng ti makapaneknek iti kinalamolamo ti bagi ken kinakawaw ti kararua, a pinilitmi a pinunno iti tinaktakawmi nga agek. Sika laeng ti makaamiris iti kinapudno ken kinasin-aw ti ayat a kinepkepanmi iti panawen ti didigra. Sika laeng ti makaduktal iti pudno nga ayat nga indulinmi idi a kasla naitabon a gameng.

Ngem uray pay, sika latta ti saksi iti daytoy nga ilemlemmengmi a liday, iduldulinmi a rag-o. Sika ti kakaisuna a gayyemmi, kakaisuna a kabsat.

3

Ay, no kasano nga inayatmo ti lawag! No kasano nga impapatim nga arakupen ti naanus nga init kadagiti babassit a takiagmo. Nakadakdakkel la unay ti lawag; agluplupias manipud iti nakalukat a tawa. Mariknam ti barana, masay-upmo ti angesna, ngem dina latta kayat a maikarsel kadagiti imam. Isu sa met, no apay nga uray no awan ti napigsa nga angin, makitak latta nga ipaypayapaymo dagiti imam, sa itawtawingmo kadagiti dakulapmo ti sumangsangbay a lawag.

Ay, no kasano nga inayatmo ti sipnget! No kasano nga indurduronmo a madayo iti naatap a rabii, ta maimaimka gapu iti kinalamolamom. Nakalawlawa la unay ti sipnget; inabbonganna amin-amin, ti tunggal paset ken suli ti lubong. Mariknam ti lamminna, mangngegmo ti lallayna, ngem dina latta kayat a maibalud iti lagipmo. Isun sa met, no apay nga uray no awan dagiti bituen, madlawko latta a gawgaw-atem dagiti anniniwanda, sa sitatalna nga inungnguam ti nakaturogen a tangatang a mayan-anninaw iti sarming ti nakaserra a tawa.

Ay, no kasano nga agayatka, aya!

--RIA REBOLLEDO

“Where are you now?” sinaludsodna a dagus ta nasken a makasubli ni Agent Schummer iti kabiitan a panawen iti Los Angeles.

“We are airborne heading towards Los Angeles...” “Approximate arrival time?”

“About 3 hours...”

Immanges iti nauneg ni Melanie.

Sa simmengngat ti kasla di matukod nga ulimek.

“You wanna talk about it?” Ni Agent Schummer ti nangburak iti ulimek.

Naklaat ni Melanie. “About what?”

“Come on, Melanie... Can I just call you your name? I’m older than you.”

Immanges iti nakaun-uneg ni Melanie.

“That was John... John Villa...”

“That son of a bitch. He should have died.”

“Do you really want him dead?”

Bimmaet manen ti ulimek.

“Isu ti gapuna a kastoyka, nga agpupungtotka a kankanayon, a kasla isebsebbam ti bagim iti peggad, a kasla dimo kailalaan ti biagmo, a kasla kayatmo pay ketdin ti matay...”

“Nagbiddutka.”

“Ngata?”

Nagari manen ti ulimek.

“Ay-ayatem pay laeng...”

“Liniputannak. Dinadaelna ti panagtalekko kenkuana.” Agarubos lattan dagiti lua ni Melanie.

“Diak kayat nga untonen no ania ti inaramidna... ta diak kayat nga ad-adda laeng a masaktanka, ngem ti kayatko a saludsoden: nagpakawan kadi?”

Kinaem ni Melanie dagiti bibigna. “Namin-adu... nagparintumeng pay...”

“Nariknam kadi a naimpapusuan ti panagpakawanna?” “Adda kadi pay serbina? Nalpasen a liniputannak.” “Taotayo laeng, Melanie. Agbidduttayo. Maitublaktayo. Agbasoltayo. And we learn from those mistakes...”

“He’s gonna die, you know that... He did not only messed up with me... but also with the agency...”

“Mamatika kadi kadagiti pammabasol ti ahensia kenkuana?”

“Does it matter?”

“He is trying to clear up his name...”

“He is gonna die...”

“Are you gonna let him? Insalakannaka, saan kadi? Inanupnaka met ti ahensia iti naminsan. Ginandatdaka a papapatay. Ngem nalabanam ida. Nagballigika... nagballigikayo... isu nga agbutengda.”

“Adda bukodko a parikut, Agent Schummer...” Saan a simmungbat ni Agent Schummer. Nangngeg ketdi ni Melanie ti nauneg nga anges daytoy.

“For all it’s worth, John saved my life... and I’m thankful for that...”

“I’m sure he’ll take that to his grave. But enough of that. As soon as you land at Bradley International Airport, there’ll be a car waiting for you. The mission is in two days... We have to make sure that we can secure that dirty bomb before it crosses the border.”

INSIMPA nga imbitin ni John ti disabled parking sticker iti ima ti rear view mirror. Addada iti sango ti Langley Police Department. Pinilida ti nagparada iti disabled parking space tapno nalaklaka a makapanawda no kas pagarigan ta adda dakes a mapasamak.

Liningayna ni Sgt. Ramirez a nakataltalna a

mangisimsimpa iti korbatana. Nakalinlinis ti suotna a coat. Dimmagasda itay iti nakaserra pay a laeng a laundry service ket nangpili lattan ni Sgt. Ramirez iti kalalainganna. Agpammarang nga abogado ni Rudy.

“Aglanglangaak met laeng nga abogado?” Umis-isem ni Sgt. Ramirez a kimmita ken ni John.

“Of course you are. Come on, go! Sakbay nga adda makauna kadata.”

Linukatan ni Sgt. Ramirez ti glove compartment iti sangona. Gammatanna koman ti paltog nga adda dita ngem inatipa ni John.

“Dimon alaen... Dimo met kasapulan. Sa lumasatka iti metal detector...” impatigmaan ni John.

Napaanges iti nauneg ni Sgt. Ramirez. “Kalasag laeng no kaskasano...”

“Addaka iti mismo nga estasion ti polisia...” “Okey...” kinuna ti sarhento. Binitbitna ti briefcase nga adda iti sibayna ket dimsaagen iti lugan.

“Agan-annadka,” impatigmaan ni John sakbay nga inrikep ti sarhento ti ridaw ti lugan.

Naminsan pay nga implastar ni Sgt. Ramirez ti korbata ken coat-na sa nagturongen ridaw ti estasion. Tinangadna ti aglawlaw ti pasdek. Napaunoran daytoy kadagiti CCTV. Ammona, adda mangbuybuya kenkuana bayat ti pannagnana nga agturong iti pasdek. Nagdumog.

“Are you listening to me?” impadasna no mangngeg met laeng ni John.

“Roger that...” insungbat ni John.

“I feel naked without my gun...”

“Sumrekka iti opisina ti polisia, nakapaltog amin dagiti adda dita, kabaelandaka a salakniban no kaskasano.” “No ngay ipapanda a maysaak a kabusor?”

“Ti la adda a mapampanunotmo. Sardengam daytan...” Nagsanamtek ni John.

Nagtarus ni Sgt. Ramirez iti desk sergeant a