Ti Kuog a Mangngabel

IDI un-unana a panawen, iti maysa a lugar iti pagilian a managan iti India, adda maysa a mangngabel a naawanan iti trabaho ket kiniddawna iti maysa a mannalon nga agbalin la koman a babaonen daytoy. Iti daytoy a lugar, maibilang dagiti mangngabel nga adda kukuogda wenno nakurang ti panagpampanunotda. Ngem gapu ta naasian ti mannalon iti mangngabel, innalana daytoy a kas katulonganna.

“Bantayam dagiti tarakenko a karnero nga adda iti pasto idiay bantay,” kinuna ti mannalon. “No adda umay a tigre, mangalaka iti bato a kas iti daytoy sa batuem!” Nangala iti maysa kadagiti bato nga adda iti asideg ti balayna ket imbaberna iti yan kampay idi ti tigre.

“Nalaka la dayta, apo,” kinuna ti mangngabel ket napanen iti pasto iti bantay.

Iti di nagbayag, adda nagparang a tigre. Nalagip ti mangngabel ti bilin ti amona ket nagtartaray a simmalog a napan iti yan ti balay ti amona. Nangala iti bato sa nagtartaray manen a nagpabantay. Ngem idi makadanon iti pasto, narangrangkay aminen dagiti karnero.

Naammuan ti mannalon ti napasamak ket sinaludsodna iti mangngabel: “Apay, nagadu a bato idiay bantay ngem apay a simmalogka pay laeng a nangala iti bato?”

“Ket isu met ti kinunam idi, apo!” impapilit ti mangngabel. “Impakitam pay kaniak dagiti bato!”

Napalalo a pungtot ti mannalon iti mangngabel ket pinapanawna daytoy. Pagsayaatanna, nakadanon ti mangngabel iti purok a yan dagiti padana a mangngabel. Innem amin dagiti mangngabel iti dayta a purok ket kinuna ti maysa kadakuada a saan a dakes no alaenda daytoy a kas maikapito a kamengda ta aglanglanga kano a masirib. Isu kanon ti pannakapanguloda.

Iti maysa nga aldaw, naibusanda iti kapas ket inkeddengda ti mapan agala iti kapas iti bangir a purok. Adda lasatenda a karayan ket gapu ta awan met rangtayna, kapilitan a linangoyda daytoy.

Idi addadan iti bangir ti karayan, kinuna ‘toy baro a pannakapangulo dagiti mangngabel, “Aguraykayo ta bilangek no manotayo amin amangan no adda ketdi nalmes kadatayo.”

Ket nangrugi a nagbilang ti mangngabel. Anian a kigtotna ta in-innemda metten idinto a pitoda koma amin. Nagsasangit met dagiti kakaduana gapu iti ladingitda.

Maysa a mannalon ti nakakita kadakuada. Inamad daytoy no apay nga agsasangitda ket insungbat ti mangngabel, “Pitokami a nagluas iti purokmi ngem itan, in-innemkami laengen!”

Dandani nagpaggaak ti mannalon iti naamirisna a panagbiddut daytoy a nagbilang, ta dina inraman ti bagina idi agbilang daytoy.

Sinaggaysa ti mannalon a inkukkok ti sarukodna iti ulo dagiti pito a mangngabel bayat ti panagbilangna manipud iti maysa agingga iti pito.

Anian a ragsak dagiti mangngabel ta saanda met la gayam a naksayan. Dinaydayawda ti mannalon nga impagarupda a maysa a nalaing a salamangkero ta ti nakalawlawag nga innem, napagbalinna ketdin a pito.—O