Isem
Ammok, nakaisemka iti likudan ti abungotmo nupay mabuteng ti agong iti baeng, iti sang-aw wenno iti aplaw ti naal-alia nga angin ken iti di bumaba a gurigor ti kalgaw.
Ammok, is-isemam latta ti uyek ken gurigor iti uneg ti kuarantina: aburido ti sikor ta saan a makaaliwaksay dagiti sidingan a dapan iti naibalunet a lang-ay: saan a mapaidan ti dagaang ti inaldaw a brownout ti nayatiddog a kalgaw.
Ngem ammok, is-isemam dagiti brownout iti tanap— kinatawaam pay ketdi ti bayadam iti koriente. Naulaw la ketdi ti kontador wenno nakobid ngata met? Kaano ngata, aya, a mabugiaw ti kinalkalgaw a pannakaugaw ti elektrisidad?
Naimbag ta nalamiis dagiti imam a makial-alamano iti daga: is-isemam dagiti mulam a tarong, paria, sili ken okra iti sangailgat a bangkagmo. Is-isemam pay dagiti saluyot ken kamotit, utong ken singkamas, ken ammok, naiduma ti isemmo nga agsida iti saluyot iti rabii uray awan koriente: imasem ti galisna aglalo no parisam iti tinuno a tarong: narabuy ti isemmo a mabigatan.
Wen, ammok, kanayon nga is-isemannak tunggal agbukar a sabong ti agsapa ta siak laeng met ti nabatbati a gamengmo iti kahon ni Pandora. Nabileg latta ti kidem dagiti maakub a dakulap nupay maal-alusiiska nga agur-uray iti bakuna tapno maisemannakton nga awan abungot dayta rupa.
--JOHMAR R. ALVAREZ
Pangunahing Pahina
tl
2021-09-16T07:00:00.0000000Z
2021-09-16T07:00:00.0000000Z
https://manilabulletin.pressreader.com/article/282003265568098
Manila Bulletin Publishing Corp