Agannad iti Panagaramat iti Paglutuan nga LPG

NALATAK ti LPG (Liquified Petroleum Gas) iti paglutuan ngem nasken a naannad no aramaten.

Siguraduen nga autorisado ti paggatangan iti aramaten nga LPG. No magatang kadagiti babassit a pagtagilakuan, siguraduen nga aggapu iti opisial a distributor.

Maysa ngamin kadagiti pangawis dagiti dadduma a saan nga autorisado nga aglaklako iti LPG ti panangideliber ken panangiplastarda payen iti kosina iti daytoy a tagilako.

Saan a liplipatan a kitaen no adda selio ti kompania ken serra de seguridad a naisullat iti tangke no maitulod ti LPG. Saan nga awaten no nadadael ti selio de seguridad.

Naimarka pay iti tangke ti panagpaso ti prueba (due for testing wenno DFT) ti LPG. Kadawyan a dagiti letra nga A, B, C ken D ti pagtandaan ti DFT. No A ti naimarka, kayatna sawen a ma-test iti Marso, B- Hunio, C – Septiembre ken D – Disiembre. No A-22 ti adda iti tangke, kayatna a sawen a ma-test ti tangke ti Marso 2022. Saan nga awaten ti tangke no nagpason ti rumbeng a pannaka-test-na.

Kitaen pay no adda pagruaran ti gas kadagiti pagroskasan ti tangke. Mangikabil iti danum a nakanawan iti sabon kadagiti nagsisilpuan ti roskas ken iti tubo nga agturong iti burner. Aglabutab ti sabon no adda pagruaran ti gas.

Saan nga agaramat iti segden, kandela wenno gurabis no kayat nga amirisen no adda paglibasan ti gas.

No aramaten ti LPG a dalikan a pagluto, luktan dagiti tawa ken ridaw para iti nawaywaya a bentilasion. Saan a yasideg iti sumsumged a dalikan dagiti banag a nalaka a kapten ti apuy ken uray ti plastik. Saan pay a pampanawan ti lutlutuen. Saan nga agaramat iti kawes a nalaka a sumged no agluto.

Irikep ti regulador ti tangke no saan nga aramaten. Ikkaten ti regulador ken isubli ti serra de seguridad ti tangke no mabayag a saan nga usaren ti LPG.

Idulin ti tangke ti LPG a nakatakder ken adayo kadagiti nalaka laeng a sumged a bambanag.

Siguraduen pay a natalged dagiti aramaten a tubo, dalikan, regulador ken dadduma pay nga aparato ti LPG.

Saan a mataranta no adda emerhensia a mainaig iti panagaramat iti LPG. Dagdagus ketdi a rikpan ti regulador ken dagiti burner. Iddepen pay dagiti sumsumged a bambanag a kas iti kandela, segden, silaw, sigarilio ken uray katol. Luktan dagiti tawa ken ridaw. Saan a luktan uray ti silaw a dekoriente, switches ken uray ania man nga aparato iti asideg ti paglutuan. Dagdagus pay nga awagan ti distributor ti LPG a paggatgatangan.

Nadagdagsen ti LPG ngem ti angin. Agarinsaed daytoy iti baba isu nga aramiden amin a kabaelan tapno maiwaras ken pumanaw ti gas.—O