Nauman ni Doktora

Dear Ikit,

Lima a tawenkon a Rural Health Doctor iti tallo a naseksek nga ili a pakaibilangan ti ili a nakayanakan ken dimmakelak. Ipakpakatko amin a kabaelak nga agserbi ditoy ta dayta la ngarud ti sinapataak. Kinapudnona, kunkuna dagiti tattao a siak la kano ti nakaanus a nagserbi ditoy iti kasta ti kapautna.

Narigat ti biag ditoy, ikit, ket kaaduanna nga aggapu pay iti bolsak ti maigatgatang kadagiti iresresetak nga agas no umay dagiti agpakita kaniak a kas maudi a pagkamanganda ta ania ngarud ket gagangay met nga unaenda ti mapan iti erbolario.

Itoy a panawen ti COVID, iti kaasi ti Apo, awan pay ti naapektaran iti nasao a sakit. Nupay kasta, agilislistakamin kadagiti mabakunaan. Kaaduanna met ti agkedked a mabakunaan ta amangan no matayda met a kas kano kadagiti madamdamagda.

Iti liman a tawen a kaaddak ditoy, ikit, patiek a naitedkon amin a kabaelak ket kasla mamatiakon iti ibagbaga dagiti kakabagiak ken gagayyemko a pumawakon ditoy ket mapanak iti siudad wenno iti pay ketdin ballasiw-taaw ta no ditoyak laeng, lumlumotenakto laeng. Uray agkubboakto kanon, diakto pay la masubbot dagiti nagastos dagiti dadakkelko iti panagadalko iti Medisina nupay gastos ti gobierno ti dadduma a pinagadalko.— Kaanakam a Doktora

Kaanakan,

Kunam a dagiti tattao dita, ibagbagada a sika pay laeng ti nakaanus nga agserbi dita iti kasta ti kabayagna. Patiek nga ibagbagada daytoy a kas pagraemda kenka.

Ita, no dimon maanusan ket panawam ti panagserbim iti lugaryo, naragsakka kadi a mangbaybay-a kadagiti kakailiam? Dikanto pay makaanus, maanusanto ngata dagiti aggapu iti sabali a disso a mangngagas?

Sika ti makaawat kadakuada, ta nayanak ken dimmakkelka kadagita a lugar. Ammom ti ugalida ket masirokmo no ania ti pangsumram iti saan a rumbeng nga aramid tapno mataginayon ti salun-at dagiti kakailiam.

Kakaisuna a sika ti nakagun-od iti kapapatgan a kurso a mangtulong kadagiti kakailiam maipapan ti nasalun-at a panagbiag isu a dimo koma ipaidam ti tulongmo. Agbalinka pay nga inspirasion ken pagwadan dagiti umili tapno agturongda iti nasayaat a dana a mangparang-ay iti lugaryo.

Saanmo kadi a panunotenen, kaanakan, ti lang-ay nga ited ti siudad wenno ‘diay doliar nga inka masapulan iti ballasiw-taaw tangay saan sa met a sapsapulen dagiti dadakkelmo daytoy. Saanmo nga ipanaw ti siribmo dita probinsia a dinakkelam. Umdasen ti sueldo nga aggapu ti gobierno a para ti agbalinto a pamiliam no simple a panagbiag ti inka pilien.

Makilangenka a nasayaat ken makitinnulongka kadagiti agturay kadagiti ili a masakupam. Patiek a saankanto nga agbabawi no ituloymo ti agpaay iti ilim ken kaparangetna a lugar.—Ikitmo