Ni Cinderella Faye ti Binibining Pilipinas Intercontinental 2021

NAGUN-OD ni Cinderella Faye Obeñita ti Binibining Pilipinas Intercontinental 2021, ti maysa kadagiti uppat a kangrunaan a korona ti Binibining Pilipinas 2021 a naiwayat itay Hulio.

Naipasngay iti Misamis Oriental, maysa daytoy a beauty queen ken modelo iti Cagayan de Oro City. Nagturpos a magna cum laude iti mass communication iti Liceo de Cagayan University.

Agtrabaho iti Provincial Tourism Office iti Misamis Oriental, kangrunaan nga adbokasiana ti pannakalapped ti cervical cancer. Binuangayna ti CROWN CDO: A Cervical Cancer Awareness Circle.

Kas pannakabagi ti Cagayan de Oro iti Binibining Pilipinas 2021, inyalatna ti People’s Choice Award a nangipaay kenkuana iti automatiko a puesto iti Top 13.

Iti paset ti panagsungbat iti saludsod, nagbalin a kontrobersial ti sungbat ni Faye nangruna iti prase nga “andingayen dagiti addaan marikrikna, pariknaan dagiti nagin-awa.” Segun ken ni Faye, inlawlawagna a nadumaduma a kita ti gin-awa ti dakdakamatenna, kas kadagiti tattao nga addaan iti bileg ken dagiti negosiante. Kayatna ketdi a sawen a masapul a matulongan dagiti mailanglangi a komunidad, wenno masapul a magunggon dagiti saan pay a tumultulong. No adda agsobsobra a rekurso wenno tulong a maipaay kadagiti agkasapulan, dakkel a banag daytoy.

Ibagian ni Faye ti Filipinas iti umay a salip a Miss Intercontinental 2021 iti Egypt iti daytoy

Nobiembre.—O