Pannakasubbot

NIkararagan:

Basaentayo ti Salmo 31:19-24

Madaydayaw ti Apo! Nakakaskasdaaw ti ayat nga impaayna kaniak idi linakub ken dinarupdak.—Salmo 31:21 APASAMAK daytoy idiay Soviet Ukraine idi 1987. Nagtrabahoak iti maysa a pagaramidan iti baso ket nagyanak iti dormitorio dagiti trabahador. Iti maysa nga aldaw, agpapaimbagak iti kuartok gapu ta naaksidenteak iti trabahok. Pagam-ammuan ta adda nagpilit a nanglukat iti ruangan, ket simrek ti maysa a grupo dagiti soldado. Rinugianda ti agdamag maipapan iti kaarrubak a ni Nikolai. Naammuak a nagiwarwaras daytoy kadagiti dokumento a mangkonkondenar iti Soviet ket kinettel daytoy ti bukodna a biag iti sango ti maysa nga istasion ti tren.

Natalna ken mannakigayyem ni Nikolaj isu a kasta unay ti kigtotko iti daytoy a damag. Ti pannakatayna ti nangiduron kaniak a mangpanunot no ania ti kaipapanan ti biagko. Nakariknaak iti krisis iti naespirituan a biagko. Ammo ti Dios ti kasasaadko, ket nangipatulod iti tao a silulukat a nangibingay iti pammatina ken ni Apo Cristo. Tinulongannak a nangbirok iti iglesia. Sadiay a nagdesisionak a sumurot ken ni Apo Jesus.

Adu a tawenen ti napalabas idi napasamak daytoy. Ita, naragsakakon iti denna ti asawak, ket namati metten ken ni Apo Cristo dagiti annakko. Malagipko pay laeng ti naimbag a kaarrubak a ni Nikolaj a saan a nakakita iti namnama ti biag iti daytoy a lubong. Malagipko pay laeng ti baro a nangibingay iti pammatina kaniak ken nangidiaya kaniak iti namnama a nangbalbaliw iti biagko. Babaen ti parabur ti Dios, ikumittayo ti biagtayo a mangidiaya iti dayta met laeng a namnama kadagiti gagayyem ken kaarrubatayo.

Kararag: Managayat a Dios, iturongdakami iti lawagmo, ayat ken agnanayon a biag. Amen.

Kapanunotan: Kabaelak ti agserbi kas pammaneknek iti parabur ti Dios agpaay kadagiti

sabsabali.

Dagiti tattao a makasapul iti suporta.