Dua a Daniw

Saan nga Umdas

Maysaka a bukel

Intukitka ket nagtuboka Kunak agawaam ti dumakkel Ngem anian ta ti ninamnamak A nasalun-at a biag

Adut’ sinamirmo a rigat Naamirisko, masapul

Ti pannaripato

Tapno rumangpayaka

Ken maaddaan iti sanga A marnuoyan iti bunga

Ti ammok, umdasen a kunak: Ay-ayatenka

Ngem gayam ti ayat saan nga agbiag Iti sao laeng.

Kaimudingan

Addaak iti maysa a disso

Ti nalawa nga uniberso Tumtumpaw iti angin Maitaytayab

Ta maysaak laeng a tulnek ti tapok Nga awanan kaipapanan Papanak ngata? Naaronan ti panunotko

Iti nagduduma a panagduadua A napukawak

Ngem maibuyogak man iti angin Nga agpapan-agsubli Ammok, masapulakto ti bagik Gapu kenka.

--FERNANDO L. REYES